حوككەيدەن استانادا وتكەن قازاقستان رەسپۋبليكاسى پرەزيدەنتى كۋبوگى حالىقارالىق جارىسىندا رەسەيدىڭ «امۋر» حوككەي كلۋبى جەڭىمپاز اتاندى.
تامىز ايىنىڭ 9-12-ءسى كۇندەرى ارالىعىندا وتكەن باسەكەدە حوككەيدەن قازاقستاننىڭ ۇلتتىق قۇراماسى, ەلوردانىڭ «بارىس» كلۋبى مەن قۇرلىقتىق حوككەي ليگاسىنىڭ وكىلدەرى «امۋر» جانە «نەفتەحيميك» كوماندالارى باق سىنادى. «بارىس ارەنا» مۇز سارايىندا وتكەن ءتۋرنيردىڭ سوڭعى كۇنىندە حاباروۆسكىنىڭ «امۋر» كومانداسى نيجنەكامسكىنىڭ «نەفتەحيميك» كلۋبىمەن ويناپ, 2:1 ەسەبىمەن باسىم ءتۇستى. «امۋر» حوككەيشىلەرى بۇل جەڭىستەن سوڭ جالپى سانى ءۇش ويىندا جەتى ۇپاي جيناپ, توپتا ءبىرىنشى ورىن يەلەنىپ قانا قويماي, پرەزيدەنت كۋبوگىنىڭ جەڭىمپازى اتاندى. «نەفتەحيميك» جۇلدەلى ەكىنشى ورىندى قاناعات تۇتتى.
ال استانانىڭ «بارىس» حوككەي كلۋبى ءۇش ويىننىڭ بىرەۋىندە جەڭىسكە جەتىپ, ءۇشىنشى ساتىعا تۇراقتادى. «بارىس» العاشقى ويىندا «امۋر» كومانداسىن جەڭگەنىمەن, قالعان ەكى ماتچتا «نەفتەحيميك» جانە قازاقستاننىڭ ۇلتتىق قۇراماسىنان جەڭىلدى. «بارىس» سوڭعى ويىنىن قازاقستان ۇلتتىق قۇراماسىنىڭ حوككەيشىلەرىنە قارسى وتكىزىپ, تارتىسقا تولى وتكەن كەزدەسۋدە 3:4 ەسەبىمەن وۆەرتايمدا ەسە جىبەردى. «بارىس» كومانداسىنا جۋىردا عانا باس جاتتىقتىرۋشى بولىپ تاعايىندالعان اندرەي سكابەلكي ءۇشىن پرەزيدەنت كۋبوگى العاشقى تۋرنير بولدى.
ەسكە سالا كەتەيىك, وتكەن جىلعى پرەزيدەنت كۋبوگى ءۇشىن حالىقارالىق جارىستا «نەفتەحيميك» كومانداسى توپ جارعان بولاتىن. بيىل اتالعان كوماندانى «بارىس» كلۋبىنىڭ ەكس-جاتتىقتىرۋشىسى اندرەي نازاروۆ جاتتىقتىرادى.
ءالي بيتورە,
«ەگەمەن قازاقستان»