وتاندىق ءتۋريزمدى دامىتۋ ماقساتىندا مادەنيەت جانە سپورت مينيسترلىگىنىڭ تۋريزم يندۋسترياسى كوميتەتى مەن «Kazakh Tourism» ۇلتتىق كومپانياسى بىرلەسىپ بىرقاتار شارالاردى جۇزەگە اسىرۋدا.
اتاپ ايتقاندا, ەلىمىزدىڭ تاريحي مەكەندەرى مەن تابيعاتى تاڭعاجايىپ وڭىرلەرىنە ساياحاتتاۋ جوباسى بويىنشا وتاندىق جانە شەتەلدىك مامانداردان قۇرالعان ەكسپەديتسيالىق توپ بىرنەشە باعىتتا ساپارعا شىقتى. « ۇلى دالا ەلىنە ساياحات» اتتى ۇرانمەن جالاۋ كوتەرگەن جوبانىڭ ەكى باعىتى بويىنشا شارالار ويداعىداي اياقتالدى. الىس-جاقىن شەتەلدەن شاقىرىلعان ترەۆەل-بلوگەرلەر, تەلەجۋرناليستەر جانە تۋروپەراتورلاردىڭ وكىلدەرى جينالىپ «تيان-شان مارجاندارى» جانە «التاي – وركەنيەت بەسىگى» باعىتىندا ارنايى ساياحات تۋرىمەن ءجۇرىپ ءوتتى. جالپى, بۇل باعىتتاعى جۇمىستاردىڭ بارلىعى استانا قالاسىنىڭ 20 جىلدىعىنا وراي ۇيىمداستىرىلىپ وتىر.
كۇنى كەشە تۋريستىك ەكسپەديتسيا توبى ءۇشىنشى باعىت بويىنشا ساپارعا شىقتى. بۇل جولعى باعىت – جەتىسۋ الاتاۋى. جوباعا قاتىسۋشىلار جەتى وزەن بەزەندىرگەن, بەلەستەر مەن تاۋلار قورشاعان اۋماقتاعى كيەلى جەرلەردى ارالاۋدى ماقسات ەتىپتى. ەكسپەديتسيا قۇرامىندا تانىمال تەلەجۋرناليستەر, جيھانكەز بلوگەرلەر جانە كاسىبي ساياحاتشىلار بار.
اق باستى الاتاۋدىڭ جەتىسۋ ولكەسىنە ورنالاسقان بولىگىن ارالاۋدى ماقسات ەتكەن جاننىڭ ءبىرى – شۆەيتساريالىق فوتوگراف-پەيزاجشى كاي گروسسمانن مىرزا. دۇنيە ءجۇزىنىڭ كوپتەگەن ەلدەرىندە بولىپ, تۇمسا تابيعاتتىڭ تالاي عاجابىن كوزبەن كورگەن كانىگى فوتوكوز قازاق دالاسىنىڭ كەرەمەتتەرىنە سىرتتاي قانىق ەكەن. ول وزىنە سەرىك رەتىندە بريتان ساياحاتشىسى ءارى فوتوگراف دجەك حاردين مەن جيھانكەز-بلوگەر اندرەي كۋلاگيندى تاڭداپ, ەرتىپ الىپتى.
ساياحاتشىلار الدىمەن «التىن ەمەل» مەملەكەتتىك ۇلتتىق تابيعي ساياباعىنا ات شالدىرماق. وسى ساياباق اۋماعىنداعى بەسشاتىر قورىق-كەشەنىن ارالاماقشى. بۇل جەردە سوناۋ ساق داۋىرىنەن بەرى ساقتالىپ كەلگەن كونە وبالار جاتىر. وسى ماڭداعى اتاقتى ايعايقۇمعا دا ارنايى بارىپ, تابيعاتتىڭ كەرەمەتىنە كوز قاندىرماقشى. بۇدان ءارى جەر بەتىندە 700 جىلعا جۋىق ءوسىپ تۇرعان اۋليەاعاشقا دا بارىپ, ءتاۋ ەتۋدى جوسپارلاپتى. ايتپاقشى, شەتەلدىك ساياحاتشىلار شاجى وزەنىن بويلاپ ءجۇرىپ وتۋگە بەل بۋىپتى. بۇل وزەندە «قىزىل كىتاپقا» ەنگەن جەتىسۋ اياقتىبالىعى مەكەندەيدى. كاي گروسسمانن ادام كوزىنە سيرەك تۇسەتىن ماقلۇقاتتى سۋرەتكە ءتۇسىرۋدى ارماندايدى ەكەن. مۇمكىن ونىڭ جولى بولار...
جالپى, «جەتىسۋ الاتاۋى» جوباسى بويىنشا ساياحاتقا شىققان توپ جەر ءجانناتىنىڭ جاۋھارلارى – كوكسۋ وزەنىندە سالمەن ءجۇزىپ, بايانجۇرەك تاۋىنا, بۇيەن وزەنىنە, بۇرقانبۇلاق سارقىراماسىنا, سول ماڭداعى جاسىلكولگە, تەنتەك وزەنى مەن اتاپقان اسۋىنا, تاستاۋ بازاسى مەن قويلىق قالاشىعىنا دا بارۋدى جوسپارلاپ وتىر.
– جەتىسۋ القابى – بىرنەشە عاسىرلاردىڭ قۇپياسى مەن اڭىزدارىن ساقتاپ كەلە جاتقان ايرىقشا ولكە. بۇل ايماقتاردان ادامعا مۇلدەم بەيمالىم جانۋارلاردى نەمەسە ادام اياعى باسپاعان اسۋلاردى كەزدەستىرۋگە بولادى. ەجەلگى تەمىر جانە قولا داۋىرىنەن قالعان كوپتەگەن ەسكەرتكىشتەر دە بار. بۇل باعىت كوشپەلى ەلدىڭ مادەنيەتى مەن تابيعي نىسانداردىڭ پاك سۇلۋلىعىنا ءتانتى بولعىسى كەلەتىن تۋريستەرگە وتە قىزىق بولادى دەپ ويلايمىن, – دەدى جيھانكەزدەردى ساياحات ساپارىنا شىعارىپ سالۋ بارىسىندا «Kazakh Tourism» كومپانياسىنىڭ باسقارما توراعاسى راشيد كۇزەمباەۆ.
قالماحانبەت مۇقامەتقالي,
«ەگەمەن قازاقستان»