ەلوردا اكىمى اسەت يسەكەشەۆ كۇزدە قاتتى وتىن قۇنىنىڭ نەگىزسىز كوتەرىلۋىنە جول بەرمەۋ ماقساتىنا ارنالعان جيىن وتكىزدى.
استانا نارىعىنداعى كومىردىڭ احۋالىمەن قالالىق وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسىنىڭ باسشىسى ەربول تولەۋوۆ تانىستىردى. ونىڭ ايتۋىنشا, قالانىڭ جالپى قورىندا 9590 توننا كومىر بار. اتاپ ايتقاندا, «ماگنيت 21 عاسىر» جشس-دە شۇباركولدىڭ (14 500 تەڭگەدەن) جانە كۋزنەتسكىنىڭ 1 700 توننا (12 مىڭ تەڭگەدەن), جەكە كاسىپكەر ايتقوجىنوۆادا مايكوبەنىڭ 500 توننا (10 مىڭ تەڭگەدەن), «ۋمار KZ» جشس-ىندە قاراجىرانىڭ 1 مىڭ توننا (13 500 تەڭگەدەن), «سەۆەرەنەرگوۋگولسناب» جشس-ىندە قاراجىرانىڭ 4 800 توننا (13 مىڭ تەڭگەدەن) كومىرى بار. ارينە كومىر توڭىرەگىندەگى الەۋمەتتىك تارتىستىڭ نەگىزگى سەبەبى, ساتۋ كەزەڭى شارىقتاعان كەزدە كومىردىڭ جەتپەي قالۋىنان تۋادى.
«بۇل قاتتى وتىن جاعاتىن قالا حالقىنىڭ كۇن سۋىتا باستاعاننان جاپپاي كومىر ساتىپ الۋىمەن تىكەلەي بايلانىستى جاعداي. ساتىلىم قىزعان كەزدە كومىردىڭ باعاسى دا شارىقتايدى. سونداي-اق كومىر تاسىمالىنا تاپسىرىستىڭ كوپ تۇسكەندىگىنەن «قازاقستان تەمىر جولى» ۇك» اق تاراپىنان دا ۆاگونداردىڭ جەتىسپەۋشىلىگى بايقالادى», دەدى ە.تولەۋوۆ.
شاھار باسشىسى وسىعان بايلانىستى «قتج – جۇك تاسىمالى» اق-تىڭ كومىر جەتكىزەتىن ۆاگوندارمەن قامتاماسىز ەتۋ ماسەلەسىن ەرەكشە باقىلاۋعا الۋ قاجەتتىگىن ايتادى. ال «قتج – جۇك تاسىمالى» اق باس ديرەكتورى قايرات ساۋرباەۆ الەۋمەتتىك تارتىستىڭ بولماۋى ءۇشىن كومىردى ايتارلىقتاي مولشەردە تاسىمالداۋدىڭ جۇمىستارى جاز ماۋسىمىندا-اق قارقىندى باستالىپ كەتكەنىن جەتكىزدى.
«استانا ءۇشىن كوممۋنالدىق-تۇرمىستىق كومىردى ارتۋدا تەمىر جول ترانسپورتى ارقىلى 60,5 مىڭ توننا, ياعني وتكەن جىلمەن سالىستىرعاندا 17,8 مىڭ تونناعا كوپ جەتكىزىلدى. ءبىز جۇك ارتۋشىلارمەن وسى جاز كەزەڭىندە كومىردىڭ ماكسيمالدى تۇردە جەتكىزىلۋىن جانە كۇزدە كومىر تاسىمالداۋدىڭ اراسى ۇزىلمەۋىن تالقىلاعان جيىن وتكىزدىك», دەدى ق.ساۋرباەۆ.
استانالىقتاردىڭ قاتتى وتىنعا جوعارى سۇرانىسى بار ەكەنىن باسا ايتقان ءا.يسەكەشەۆ كاسىپكەرلەرگە كومىر جەتكىزەتىن كەستەنى ۇسىنۋ جانە كۇندەلىكتى تۇراقتى تۇردە 109 قاۋىرت جەلىسى ارقىلى قالعان كومىر مەن جەتكىزىلۋى ءتيىس جوسپارلانعان كومىر تۋرالى ناقتى اقپاراتپەن قامتاماسىز ەتۋدىڭ قاجەتتىلىگىن اتاپ ءوتتى. سونداي-اق قالا اكىمىنىڭ ورىنباسارى قوسمان ايتمۇحامەتتىڭ توراعالىعىمەن شتاب قۇرىلىپ, كومىر مەن جانار-جاعارمايعا قاتىستى بارلىق ماسەلەنى شەشۋ باقىلاۋعا الىنباق.
ال مەملەكەتتىك كىرىستەر دەپارتامەنتى مەن وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسى ۇلتتىق ەكونوميكا مينيسترلىگىنىڭ تابيعي مونوپوليالاردى رەتتەۋ جانە باسەكەلەستىكتى قورعاۋ كوميتەتىمەن بىرلەسىپ, كومىر باعاسىنىڭ وسۋىنە جول بەرمەۋ الگوريتمىن قاراستىرادى. ەگەر باعا ءوسىمى انىقتالعان جاعدايدا زاڭدا قاراستىرىلعان قاجەتتى شارالار جۇرگىزىلمەك. بىلتىر تابيعي مونوپوليالاردى رەتتەۋ جانە باسەكەلەستىكتى قورعاۋ كوميتەتى اتالعان نارىققا تالداۋ جۇرگىزگەن بولاتىن.
بيىل «سەۆەرەنەرگوۋگولسناب», «مەدينا ترەيد», ايتقوجىنوۆا جك, «ۋمار KZ» جانە «جيگەر استانا» كاسىپكەرلىك نىساندارىنا قاتىستى تەكسەرۋ اياقتالدى. سوتتىڭ شەشىمىنە سايكەس, اتالعان سۋبەكتىلەرگە جالپى كولەمى 7 ملن تەڭگەنى قۇرايتىن مونوپوليالىق 20 ملن تەڭگە تابىسىن تاركىلەيتىن اكىمشىلىك ايىپپۇل سالىندى. وسى باعىتتاعى جۇمىستار جالعاسىن تابا بەرمەك.
«استانا-ەنەرگيا» اق مالىمەتىنشە, ەلوردادا 2017-2018 جىلۋ ماۋسىمى كەزەڭىندە كومىردى تۇتىنۋ 2 ملن 945 مىڭ تونناعا جەتتى. ونىڭ ىشىندە ەنەرگيا كوزدەرى – 2 ملن 545 مىڭ توننا, ال حالىق مۇقتاجدىعى ءۇشىن 400 مىڭ توننا بولعان. وسى ورايدا استانا قالاسىنىڭ اكىمدىگى تۇرعىندارعا قىسقى وتىندى كومىر باعاسى قىمباتتاماي, كەزەك كوبەيمەي, الەۋمەتتىك داۋ-داماي تۋىنداماي تۇرعاندا ساتىپ الۋعا شاقىرىپ وتىر. ەلوردالىقتارعا جوسپارلانعان كومىردى جەتكىزۋ IKomek (109) قىزمەتى ارقىلى حابارلانادى.
دۋمان اناش, «ەگەمەن قازاقستان»