149 ادامنان تۇراتىن قازاقستاندىق قاجىلاردىڭ ءبىرىنشى توبى جيددا قالاسىنا جەتتى. بيىل ساۋد ارابياسى كورولدىگىنىڭ ۇكىمەتى تاراپىنان بولىنگەن كۆوتالارعا سايكەس, ەلىمىزدىڭ ءۇش مىڭ ازاماتى قاسيەتتى جەرلەرگە زيارات جاسايدى. ۇلى قاجىلىق مەرزىمى 19-23 تامىز ارالىعىنا سايكەس كەلەدى.
قازاقستاننىڭ كونسۋلدىعى ەلىمىزدىڭ ءتيىستى مەملەكەتتىك مەكەمەلەرىمەن بىرلەسە جۇمىس ىستەۋدە. قاجىلىق ماۋسىمدا ەكى جىل قاتارىنان قازاقستاندىق قاجىلاردى تاسىمالداۋ وتاندىق «SCAT» اۋەكومپانياسى جانە «FlyNas» ساۋديالىق سەرىكتەسى ارقىلى جۇزەگە اسىرىلۋدا. اتالعان اۋەكومپانيالاردىڭ ۇشاقتارى قازاقستاندىقتاردى كورولدىكتىڭ جيددا مەن مەدينا قالالارىنا استانا, الماتى, شىمكەنت جانە اقتاۋدان تىكەلەي رەيسپەن الىپ كەلىپ, 27 تامىز بەن 1 قىركۇيەك ارالىعىندا كەرى الىپ قايتادى.
قالىپتاسقان تاجىريبە بويىنشا جىل سايىن كونسۋلدىق تاراپىنان قاجىلار اراسىندا كورولدىكتىڭ زاڭنامالارىن ساقتاۋ, ءتۇرلى جۇقپالى اۋرۋلاردىڭ (تۇماۋ, مەنينگيت) الدىن الۋ ءۇشىن سانيتارلىق-گيگيەنالىق ەرەجەلەردىڭ ساقتالۋىنا ءمان بەرۋ, جەرگىلىكتى سالت-داستۇرلەرگە قۇرمەتپەن قاراۋ جانە تاعى باسقا دا ماسەلەلەر بويىنشا ءتيىستى تۇسىندىرمە جۇمىستارى جۇرگىزىلەدى.
مەككە مەن مەدينا قالالارىنىڭ ورتالىق شتابتارىندا قازاقستان مۇسىلماندارى ءدىني باسقارماسى ۇيىمداستىرعان ستاتسيونارلىق بولىمشەلەر تاۋلىك بويى جۇمىس ىستەيتىن بولادى. ول جەردە قازاقستاندىق دارىگەرلەر تاراپىنان قاجىلارىمىزعا العاشقى مەديتسينالىق كومەك كورسەتىلەدى.
«ەگەمەن-اقپارات»