بۇگىن الماتىدا قازاقستان ۇلتتىق قۇراماسىن يندونەزيادا وتەتىن XVIII جازعى ازيا ويىندارىنا شىعارىپ ءسالۋ راسىمى ءوتتى.
سالتاناتتى راسىمگە ازيادا الدىنداعى سوڭعى جاتتىعۋ جيىندارىن الماتىدا وتكىزگەن سپورتتىق گيمناستيكا, ساداق اتۋ, نىسانا كوزدەۋ, ستەند اتۋ, ەركىن كۇرەس, سپورتتىق قۇزعا ورمەلەۋ, سۋ دوبى جانە ۆولەيبول كوماندالارى قاتىستى.
«قۇراما كوماندالار ازياداعا دايىندالۋ ءۇشىن ۇوك مادەنيەت جانە سپورت مينيسترلىگىمەن بىرلەسە وتىرىپ, بارلىق مۇمكىندىك جاسادى. قازاقستان ۇوك پرەزيدەنتى تيمۋر اسقار ۇلى ق ۇلىباەۆ سپورتشىلاردى كەشەندى-عىلىمي توپتارمەن, تەحنيكالىق ماماندارمەن قامتاماسىز ەتىپ, وليمپيادالىق سپورت تۇرلەرى بويىنشا وقۋ-جاتتىعۋ جيىندارىن تولىقتاي وتكىزۋدى ءوز باقىلاۋىنا الدى. ءبىز بۇل ەڭبەك اقتالىپ, ءوز جەمىسىن بەرەدى دەپ ۇمىتتەنەمىز. قازاقستان اتلەتتەرى قۇرلىقتىق دودادا ءداستۇرلى تۇردە ۇزدىكتەر قاتارىنان كورىنەدى. سوندىقتان, سپورتشىلارىمىز بيىلعى ويىنداردا دا جانكۇيەر قۋانىشىن ەسەلەي تۇسەدى دەپ سەنەمىن», دەدى قازاقستان ۇوك باس حاتشىسى ەلدوس رامازانوۆ.
جازعى ازيا ويىندارى 18 تامىز كۇنى باستالادى. اتالعان ويىندارعا قازاقستان ۇلتتىق قۇراماسى اتىنان 440 سپورتشى قاتىسادى, ونىڭ ىشىندەگى 404 سپورتشى 25 وليمپيادالىق سپورت تۇرىنەن باق سىنايدى.
دجاكارتاداعى (يندونەزيا) ازيا ويىندارىندا جالپى ەسەبى 462 مەدالدار جيىنتىعى ساراپقا سالىنادى, ونىڭ ىشىندە 363 جۇلدە وليمپيادالىق سپورت تۇرلەرىنەن ءوز يەسىن تاپپاق. تاعى ءبىر ايتا كەتەرلىگى, بيىل ازيا ويىندارىنىڭ باعدارلاماسىنان نىسانا كوزدەۋ جانە ستەند اتۋدان كوماندالىق جارىس پەن بوكستان ەرلەر اراسىندا اۋىر سالماق دارەجەلەرى (81 كەلى, 91 كەلى, +91 كەلى) الىنىپ تاستالدى.
قۇرلىق دوداسى دجاكارتا جانە پالەمبانگ قالالارىندا وتەدى. اتلەتيكالىق اۋىلدار ەكى قالادا دا ورنالاسقان.
دجاكارتادا سپورتتىڭ مىنا تۇرلەرىنەن جارىس وتەدى: جەڭىل اتلەتيكا, بوكس, دزيۋدو, كۇرەس تۇرلەرى, ۆەلوسپورت (ترەك, شوسسە, ماۋتينبايك), سۋ دوبى, قازىرگى بەسسايىس, تاەكۆوندو, سەمسەرلەسۋ, كاراتە, رەگبي, سۋدا ءجۇزۋ, گاندبول, سينحروندى ءجۇزۋ, ساداق اتۋ, كوركەم گيمناستيكا, جەلكەندى سپورت, كوگالداعى حوككەي, ەسكەك ەسۋ (سلالوم), سپورتتىق گيمناستيكا, ۆولەيبول, گولف, باسكەتبول, باسكەتبول 3ح3, باتۋتتا سەكىرۋ.
پالەمبانگتا سپورتتىڭ مىنا تۇرلەرىنەن جەڭىمپازدار انىقتالادى: اكادەميالىق ەسۋ, بايداركا مەن كانوەدە ەسۋ, نىسانا كوزدەۋ, ستەند اتۋ, ترياتلون, جاعاجاي ۆولەيبولى, سپورتتىق قۇزعا ورمەلەۋ, تەننيس.
اتلەتيكالىق اۋىلدا رەسمي تۇردە قازاقستان بايراعىن كوتەرۋ ءراسىمى 16 تامىز كۇنى دجاكارتادا وتەدى. پالەمبانگتاعى اتلەتيكالىق اۋىلعا ءبىرىنشى بولىپ اكادەميالىق ەسۋشىلەر كومانداسى اتتاندى. بۇگىن, 12 تامىز كۇنى گاندبول, سۋ دوبى جانە باسكەتبولدان ايەلدەر كومانداسى, سونداي-اق, گرەك-ريم كۇرەسىنىڭ بالۋاندارى بارادى. يندونەزياعا بارلىق سپورتشىلار الدىن الا بەكىتىلگەن كەستە بويىنشا ساپار شەگەدى.
قازاقستان قۇراماسىنىڭ بارلىق سپورتشىلارى كەشەندى-عىلىمي توپ ماماندارىمەن جابدىقتالعان. اتالعان توپ مۇشەلەرى قازاقستان ۇوك باستاماسىمەن وليمپيادالىق سپورت تۇرىندەگى كوماندالارمەن جۇمىس ىستەي باستادى. دجاكارتا مەن پالەمبانگتا دارىگەرلەر شتابى, پسيحولوگتار مەن كەزەكشى ماسساجشىلار تاۋلىك بويى قىزمەت ەتەدى. كعت ماماندارى العاش رەت جارىس كەزىندە ۇلتتىق قۇراما سپورتشىلارىنا كاسىبي كومەك كورسەتپەك.
ازيا ويىندارى 18 تامىز بەن 2 قىركۇيەك ارالىعىندا وتەدى. قازاقستان تۋىن بوكسشى ءابىلحان امانقۇل كوتەرىپ شىعادى.