بۇگىن بەس ەل پرەزيدەنتتەرىنىڭ قاتىسۋىمەن كاسپي ءسامميتى باستالادى

اقتاۋدا وتەتىن كاسپي ماڭى مەملەكەتتەرى باسشىلارىنىڭ سامميتىندە كاسپي تەڭىزىنىڭ قۇقىقتىق مارتەبەسى تۋرالى كونۆەنتسياعا قول قويىلادى.  قۇجات تەڭىز اكۆاتورياسىن, كاسپي تەڭىزى ءتۇبىن بولۋگە, بيورەسۋرستاردى قورعاۋعا, بالىق اۋلاۋعا, سونىمەن قاتار كاسپي تۇبىمەن قۇبىر تارتۋعا قاتىستى ەرەجەلەردى قامتيدى.

11 تامىز كۇنى قۇرىق پورتىنداعى مۋلتيمودالدىق كولىك حابىن تانىستىرۋ شاراسىندا قر پرەزيدەنتى 12 تامىزدا وتەتىن اقتاۋ سامميتىندە تاريحي شەشىم قابىلداناتىنىن ايتقان ەدى. 

«ەرتەڭ اقتاۋدا كاسپي ماڭى مەملەكەتتەرى باسشىلارىنىڭ بەسىنشى ءسامميتى اشىلادى. سوڭعى 20 جىلدا كاسپي تەڭىزىندە ورتاق جۇمىستارىمىزدىڭ بارلىق ماسەلەلەرىن شەشۋ ءۇشىن ۇستانىمدارىمىزدى كەلىسۋگە تالپىندىق, كۇردەلى كەلىسسوزدەر جۇرگىزدىك. بۇل تۇرعىدا كەمە قاتىناسى, رەسۋرستار, بيولوگيالىق رەسۋرستاردى قورعاۋ جانە مەملەكەتتەردىڭ ساۋدا ىنتىماقتاستىعى سەكىلدى تاقىرىپتار نازاردا بولدى. بۇگىندە بارلىق ماسەلەلەر بويىنشا ۋاعدالاستىققا قول جەتكىزىلدى دەپ ايتا الامىن. ەرتەڭ تاريحي شەشىمنىڭ قابىلدانۋىن كۇتىپ وتىرمىز. بۇل وتە ماڭىزدى», - دەدى مەملەكەت باسشىسى.