بۇگىنگى تاڭدا جالپى ءبىلىم بەرۋ باعدارلاماسى شەڭبەرىندە 5-7 سىنىپتارعا «قازاقستان تاريحى», «قازاق ادەبيەتى», «گەوگرافيا», «مۋزىكا» پاندەرىن جاڭاشا بايىتىپ, ءوز ولكەلەرىنىڭ وتكەنى مەن بۇگىنىن قامتيتىن «ولكەتانۋ» كۋرستارىن ەنگىزۋ جوسپارلانۋدا.
بىردەن ايتا كەتەيىك, ولكەتانۋ كۋرسى ءبىلىم جانە تاربيە جۇمىستارى باعىتىندا جۇزەگە اسىرىلاتىن جالپى ءبىلىم بەرۋ ءىسىنىڭ قۇرامداس بولىگى. نەگىزگى ماقساتى – وقۋشىلارعا تۋعان ولكەسىن تەرەڭىرەك تانىتىپ, ولاردىڭ بويلارىنداعى ازاماتتىق بەلسەندىلىكتى ارتتىرىپ, پاتريوتتىق سەزىمدەرىن ۇشتاۋ بولىپ تابىلادى. مەملەكەت باسشىسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا ءپاتريوتيزمدى دامىتۋ ماسەلەلەرى تۋعان جەرگە دەگەن سۇيىسپەنشىلىكپەن تىكەلەي بايلانىستى ەكەندىگى اتاپ كورسەتىلگەن بولاتىن.
وسى ماقساتتى جۇزەگە اسىرۋعا وراي ءار ايماقتىڭ ءوز وقۋلىقتارى دايىندالۋ ۇستىندە. تاياۋدا كوكشەتاۋ قالاسىنداعى «كەلەشەك-2030» باسپاسى بىرنەشە اۆتورلارمەن بىرلەسە وتىرىپ وقۋ-ادىستەمەلىك قۇرالدى ازىرلەپ, تانىستىرۋ ءراسىمىن وتكىزدى.
– وقۋ ادىستەمەلىك قۇرالىن دايىنداۋ بارىسىندا وقۋشىلاردىڭ جاس ەرەكشەلىگى, قابىلداۋ مۇمكىندىگى ءارى جاڭارتىلعان وقۋ باعدارلاماسىنىڭ سايكەستىگى ەسكەرىلدى, – دەدى وبلىستىق ءبىلىم بەرۋ باسقارماسى باسشىسىنىڭ مىندەتىن اتقارۋشى ۆالەري گامازوۆ.
«ولكەتانۋ. اقمولا وبلىسى» مەكتەپ كۋرسى جوعارىدا اتالعان ءتورت ءپاننىڭ شەڭبەرىندە جيىرما ساعاتقا ارنالىپ جۇرگىزىلگەن 5-سىنىپ وقۋشىلارىنا تۋعان ولكەنىڭ تاريحى 4 ساعات, مۋزىكالىق مۇرا 1 ساعات, ال, 6-سىنىپ وقۋشىلارىنا ولكە تاريحىن وقىتۋعا 4 ساعات ءبولىنىپ وتىر. قازاق ادەبيەتى ءپانى شەڭبەرىندە 2 ساعات, ال مۋزىكا ساباعىنا ءبىر ساعات قوسىمشا كۋرس وتكىزىلەدى. 7-سىنىپ وقۋشىلارى ولكە تاريحىن 4 ساعات وقىسا, گەوگرافياعا ەكى ساعات ءبولىنىپ وتىر.
ەندىگى ارادا وبلىستىڭ وقۋشىلارى ءوز ايماقتارىندا بار عۇمىرىن تۋعان جەردى قورعاۋعا ارناعان ابىلاي حان, بوگەنباي باتىر, كەنەسارى قاسىم ۇلى, بالۋان شولاق ءتارىزدى ايتۋلى تۇلعالاردىڭ بولعاندىعىن جانە ولاردىڭ كوكىرەكتەرىندەگى ەلگە دەگەن ىستىق ماحابباتتارىن, وتان قورعاۋ جولىنداعى قايتپاس ەرلىكتەرىن تانىپ بىلەتىن بولادى. ال مۋزىكا پانىنە ەنگىزىلگەن كۋرس ساعاتتارىندا قازاق ءان ونەرىنە مول ولجا سالعان ءبىرجان سال, اقان سەرى, ۇكىلى ىبىراي ءتارىزدى ونەر جۇلدىزدارىنىڭ تەلەگەي-تەڭىز شىعارماشىلىعىمەن ەتەنە تانىسادى. 6-سىنىپقا ارنالعان وقۋلىق وڭىردەگى تاماشا تابيعاتتىڭ نۇر ديدارىن جاس تولقىننىڭ كوز الدىنا مولدىرەتىپ اكەلەتىندەي. كوگىلدىر كولدەر مەن قولدىڭ سالاسىنداي اق قايىڭدار كومكەرگەن دالا ديدارى سول ادەمى ايشىعىمەن كوركەم بەزەندىرىلىپ, قىزىقتى دەرەكتەر كەلتىرىلگەن. جالعىز تابيعات قانا ەمەس, تاماشا ادامدار تاعدىرى دا ومىرشەڭ ونەگە. ونداي ادامداردىڭ قاتارىنان تالعات بيگەلدينوۆ, ماريا سميرنوۆا-كۋحارسكايا, كلارا ءامىروۆا ءتارىزدى تاريحي تۇلعالار تۋرالى تاعىلىمدى دەرەكتەر كەلتىرىلگەن. سونداي-اق وقۋلىقتا وبلىستىڭ تۋريستىك باعىتتارى دا بار.
وقۋلىققا قوسىمشا ەلەكتروندىق ۇلگى دە بەرىلىپ وتىر. بۇل ءادىس وقۋلىقتىڭ جۇگىن جەڭىلدەتۋگە سەبەپ. ءارى شالعايداعى اۋىل-ايماقتىڭ مۇعالىمدەرى ەلەكتروندى ۇلگىگە ءوز ەلدى مەكەندەرىنىڭ تاريحىن, تاماشا ادامدار تاعدىرىن قوسۋ مۇمكىندىگى بار. مۇنداي جۇمىستار مۇعالىم مەن وقۋشىلاردىڭ بىرلەسكەن ۇجىمدىق شىعارماشىلىعى ارقىلى جۇزەگە اسىرىلادى. بارلىق جۇمىس جاڭارتىلعان وقۋ باعدارلاماسىنا سايكەس اتقارىلعان. ساراپشى ماماندار وقۋشىلارعا ۇسىنىلىپ وتىرعان وقۋلىقتاردىڭ مەملەكەتتىك ستاندارتقا سايكەس ەكەندىگىن انىقتاپ, وڭ باعا بەرگەن. ولكەنىڭ تاريحىن جاس كوكىرەككە تولايىم قوتارۋعا سەپتىگى مول جۇمىس بولاشاقتى باعدارلاۋعا جاسالعان اۋقىمى مول, يگى ۇمتىلىس دەپ ايتۋعا ابدەن بولادى.
بايقال ءبايادىل, «ەگەمەن قازاقستان»