2018 جىلعى 9 تامىزدا تەڭگە باعامى وتكەن كۇنمەن سالىستىرعاندا ءبىر اقش دوللارى ءۇشىن 354,06 تەڭگە دەڭگەيىنە دەيىن نەمەسە 1,6%-عا السىرەدى. بۇل رەسەيگە قاتىستى سانكتسيالاردى قاتاڭداتۋ تاۋەكەلدەرىنىڭ كۇشەيۋى جانە مۇناي باعاسىنىڭ تومەندەۋى اياسىندا ءرۋبلدىڭ قۇنسىزدانۋىنىڭ سالدارى بولدى, دەپ حابارلايدى ۇلتتىق بانكتىڭ ءباسپاسوز قىزمەتى.
رەسەي ءرۋبلى اقش دوللارىنا قاتىستى ءبىر كۇندە 4,2%-عا (63,6-دان 66,3-كە دەيىن) جانە ەۋروعا قاتىستى 4,1%-عا (73,8-دەن 76,8-گە دەيىن) السىرەدى. اقش سەناتورلارىنىڭ رەسەيگە قارسى سانكتسيالارى جايىنداعى جاڭا زاڭ جوباسى تۋرالى اقپارات ءرۋبلدىڭ السىرەۋىنە سەبەپ بولدى, ول زاڭ جوباسى رەسەي فەدەراتسياسىنىڭ مەملەكەتتىك بورىشىن قارجىلاندىرۋعا جانە رەسەيدىڭ بىرقاتار جەتەكشى بانكتەرىنىڭ مۇلكىمەن مامىلەلەرگە شەكتەۋ سالۋدى كوزدەيدى. زاڭ جوباسى قابىلدانعان جاعدايدا ول 2018 جىلعى 22 تامىزدا كۇشىنە ەنۋى مۇمكىن.
رەسەي رۋبلىمەن بولىپ جاتقان اعىمداعى احۋال, نەگىزىنەن, ساياسي فاكتورلارمەن تۇسىندىرىلەدى جانە نارىققا قاتىسۋشىلاردىڭ كۇتۋلەرىنە نەگىزدەلەدى. امەريكانىڭ مۇناي ونىمدەرىنە قىتايدىڭ باج سالىقتارىن ەنگىزۋى مۇمكىن تۋرالى اقپارات اياسىندا Brent ماركالى مۇناي باعاسى ءبىر باررەل ءۇشىن 72 دوللارعا دەيىن تومەندەدى.
قازىرگى ۋاقىتتا باعامنىڭ بەلگىلەنۋى ۇلتتىق بانكتىڭ قاتىسۋىنسىز ءجۇرىپ جاتىر. ۇلتتىق بانك ۆاليۋتا نارىعىنداعى احۋالعا ۇنەمى مونيتورينگ جۇرگىزىپ وتىر جانە قاجەت بولعان جاعدايدا تەڭگە باعامىنىڭ ايتارلىقتاي جانە تۇراقسىزدىق تۋدىراتىن قىسقا مەرزىمدى اۋىتقۋلارىن رەتتەۋگە باعىتتالعان وكتەمدىكتەردى جۇزەگە اسىرۋعا دايىن.