وبلىس ورتالىعىنداعى دوستىق ءۇيى ەلىمىزدەگى حالىقتار دوستىعىن ناسيحاتتاۋ ماقساتىندا ءتۇرلى شارالار ۇيىمداستىرىپ جاتادى. سونىڭ اراسىندا سۋرەتشىلەر مەن فوتوسۋرەتشىلەردىڭ شىعارمالارىنان كورمەلەردى دە ءجيى وتكىزەدى. ازەربايجان حالقىنىڭ «بىرلىك» ەتنومادەني بىرلەستىگى وسىلاردىڭ بارلىعىنا بەلسەندى قاتىسادى.
2016 جىلى اتالعان قوعامداستىقتىڭ مۇشەلەرى وبلىستاعى ينتەرناتسيونالدىق وتباسىلارىنىڭ بالالارىن بەينەلەيتىن كورمە ۇيىمداستىرۋ جونىندە باستاما كوتەرگەن بولاتىن. العاشقى جوباعا 10 جاسقا دەيىنگى 25 بالا قاتىستى. ولاردىڭ ەڭ كىشىسى ورىس, موردۆا, وزبەك ۇلتتارى وكىلدەرىمەن ناعاشىلى-جيەندى ون ايلىق تەونە شەرەمەت بولعان ەدى.
– بۇل باستاما ارالاس نەكەنى دارىپتەۋ ەمەس, دوستىقتى ناسيحاتتاۋ نيەتىنەن تۋعان. ارالاس نەكەدەن تۋعان بالالار سۋرەتتەرىنىڭ اۆتورى, وبلىسقا بەلگىلى فوتوسۋرەتشى گەورگي شاپوۆالوۆ بۇلدىرشىندەردىڭ رياسىز جىميىسى مەن كوزىنەن قازاقستاندا سالتانات قۇرعان دوستىقتى, بىرلىكتى, بەيبىت كۇنىمىزدى كورسەتۋگە تىرىسقان, – دەيدى «بىرلىك» ەتنو-مادەني بىرلەستىگى جاستار قاناتىنىڭ جەتەكشىسى زۋلفيا نابيەۆا. فوتوسۋرەتشى العاشقى سۋرەتتەرىندە بالالاردىڭ قولىنا جاۋقازىن ۇستاتىپ قويىپتى. قازاق دالاسىنداعى كوكتەمنىڭ نىشانى بولىپ ەسەپتەلەتىن بۇل گۇل ادامدار اراسىنداعى مەيىرىمنىڭ, نازىكتىكتىڭ دە بەلگىسى ىسپەتتى. ول وبلىس ەمبلەماسىنان دا ورىن العان. 2016 جىلى 1 مامىر, ياعني قازاقستان حالقى بىرلىگى كۇنى كورمەنىڭ تۇساۋكەسەرى وتكەن بولاتىن.
بيىل ء«بىز – ءبىر ەلدىڭ بالالارىمىز!» جوباسى استانانىڭ 20 جىلدىعى مەرەكەسىنە ارنالدى. الەۋمەتتىك جەلىلەر ارقىلى وتكىزىلگەن بايقاۋعا وبلىستىڭ بارلىق شالعايىنان 76 بالا قاتىستى. سولاردىڭ اراسىنان الەۋمەتتىك جەلىلەردە داۋىس بەرۋ ارقىلى 3 جەڭىمپاز: ليانا حلىنوۆا, ادەلينا جاقانوۆا جانە ايلين بولاتحاننىڭ ەسىمى انىقتالدى. ولارعا جاز باسىندا وتكەن تاتارلاردىڭ «سابانتۋي» مەرەكەسىندە بالانىڭ ويىن دامىتاتىن ويىنشىقتار تابىس ەتىلدى. سونىمەن قاتار جەڭىمپازدار مەن بەينەسى جۇرتتىڭ ەسىندە قالاتىن تاعى دا 22 ءبۇلدىرشىندى گەورگي شاپاۆالوۆ فوتوسەسسياعا شاقىردى.
– سۋرەتىنە قاراعاندا كىمنىڭ دە بولسا جۇرەگى ەرىپ كەتەردەي سۇيكىمدى, جۇزىكتىڭ كوزىنەن وتكەندەي ادەمى وسى 25 بالانىڭ بەينەسى تاتۋ-ءتاتتى, ءبىر اتانىڭ بالاسىنداي كەلىسىم مەن بىرلىكتە, سىيلاستىقتا تۇرىپ جاتقان جۇزدەن اسا ەتنوستىڭ وتانىنا اينالعان قازاقستانداعى بەيبىت ءومىردى بەينەلەيدى, – دەيدى ءزۇلفيا نابيەۆا.
سوندىقتان جانارى زەڭگىر اسپانداي, بۇلاق سۋىنداي تازا وسى بالالار دوستىق ءۇيى قىزمەتكەرلەرى دايىنداعان فوتوكورمەلەردىڭ, كوركەم فوتوالبومداردىڭ كەيىپكەرىنە اينالدى.
ءنازيرا جارىمبەتوۆا,
«ەگەمەن قازاقستان»
قوستاناي