انە-مىنە دەگەنشە وقۋ جىلىنىڭ باستالۋىنا دا از ۋاقىت قالدى. جاز مەزگىلىنىڭ ەكى ايى زىمىراپ وتە شىقتى. اسىرەسە بۇل مەزگىلدىڭ مەكتەپ وقۋشىلارى ءۇشىن قىزىقتى بولاتىنى ءسوزسىز. جاز بويى تىنىققان بالالار جاڭا وقۋ جىلىندا دا ءبىلىم باسەكەسىنە دايىن بولادى. ساپالى ءبىلىم الىپ, ونى كادەگە جاراتۋعا ۇمتىلادى.
تالاس اۋدانىنا قاراستى «جۇرىندىساي» مەملەكەتتىك ساۋىقتىرۋ ورنى بار. مۇندا جىل سايىن جۇزدەگەن بالا كەلىپ دەمالىپ, جاز ماۋسىمىن ويداعىداي وتكىزەدى. اتالعان لاگەر 100 ورىندىق اسحانامەن, 5 شاعىن جاتاقحانامەن قامتىلعان. كەلۋشىلەرگە ارنالعان باسسەينمەن قاتار, بىرنەشە دۋش تا بار. ال مۇنداعى اشىق الاڭقاي سپورتتىق جاتتىعۋلار جاساۋعا قولايلى. بۇل جەردەگى تۇنىق تابيعاتتىڭ كەرەمەتى سول, سىلدىراپ اققان تاۋ بۇلاعى, سول تاۋدان ەسكەن سامال جەل جان جادىراتادى. «جۇرىندىساي» لاگەرىنىڭ جوعارى دەڭگەيدە جۇمىس اتقارۋىنا اۋدان اكىمى دوسماحانبەت اليەۆ ءاردايىم قولداۋ ءبىلدىرىپ كەلەدى.
جۋىردا قارت قاراتاۋدىڭ قويناۋىنداعى «جۇرىندىساي» لاگەرىندە 100 بالانىڭ قاتىسۋىمەن ونەر ساعاتى ءوتتى. مۇندا ءۇشىنشى اۋىسىمدا 12 كۇن بويى دەمالعان بۇلدىرشىندەردىڭ جۇزىنەن قۋانىش لەبىن اڭعارۋ قيىن ەمەس ەدى. ءبىر عاجابى, وسىندا جينالعان بالالاردىڭ بارلىعى دا ونەرلى ەكەن. ءبىرى وقۋ وزاتى, ءبىرى ءانشى, ءبىرى كوركەمسوز وقۋدان بايقاۋ جەڭىمپازى, ءبىرى ەركىن كۇرەستەن وبلىستىق باسەكەدە جۇلدەگەر, ءبىرى ءبيشى. لاگەردە وتكەن ونەر ساعاتىنىڭ ەرەكشەلىگى دە وسىندا بولسا كەرەك. بۇل رەتتە بالالاردىڭ دا تاربيەشى اعايلار مەن اپايلارعا دەگەن ريزالىعى شەكسىز. كەۋدەلەرىن ماقتانىش سەزىمى كەرنەگەن بالالار مۇندا «نەپتۋن ءتۇنى» شاراسىنىڭ كۋاسى بولعاندارىن, سونداي-اق فۋتبول, اسىق اتۋ, ۆولەيبول, جۇگىرۋ, سەكىرۋ سياقتى ويىن تۇرلەرىنە قاتىسقاندارىن جارىسا ايتتى. ءارى ولار مۇندا كوپ دوس تاپقان. ەلىمىزدىڭ بولاشاعى سانالاتىن بۇلدىرشىندەردىڭ ءتاتتى تىلەكتەرىنە سۇيسىنبەسكە بولمايدى.
تاريحى سوناۋ 1965 جىلدان باستاۋ الاتىن بۇل لاگەردى دارحان بايىمبەتوۆ دەگەن ازامات باسقارادى ەكەن. ول وسى ۋاقىتقا دەيىن 300 وقۋشى دەمالىپ قايتقانىن, ەندى بالالار ءۇشىن ءتورتىنشى ماۋسىم باستالاتىنىن جەتكىزدى. ەلۋ جىلدان استام ۋاقىتتان بەرى جۇمىس ىستەپ كەلە جاتقان دەمالىس ورنى ءبىر كەزدە جەكەمەنشىككە ساتىلىپ كەتەيىن دەپ تۇرعان جەرىنەن رۇستەم سەڭگىرباەۆ دەگەن ازاماتتىڭ ارالاسۋىمەن امان قالعان. ەندى مىنە, تاريحى تەرەڭ تالاس جەرىندە بالالارعا قۋانىش سىيلاپ كەلە جاتقان «جۇرىندىساي» لاگەرى ءالى دە ەل بولاشاعىنا قىزمەت كورسەتە بەرمەك.
حاميت ەسامان,
«ەگەمەن قازاقستان»
جامبىل وبلىسى