قىزىلجار وڭىرىندە شىنى شيكىزاتىنان ءتۇرلى بۇيىمدار جاساپ, ونى پايدالى كاسىپكە اينالدىرىپ وتىرعانداردىڭ ءبىرى – اننا گەرمان. ول العاشقىلاردىڭ ءبىرى رەتىندە وسى سالانىڭ دامۋىنا ءوز ۇلەسىن قوسىپ, بۇگىندە تاپسىرىس بويىنشا دا جۇمىس ىستەيدى. ايتۋىنا قاراعاندا كىشكەنتاي كەزىنەن بالشىقتان, قىشتان ءارتۇرلى زاتتار جاساۋعا بەيىم بولىپتى. ەسەيە كەلە شەبەرلىگىن جەتىلدىرۋ ماقساتىمەن رەسەيدىڭ ەكاتەرينبۋرگ قالاسىنداعى شىنى ءوندىرىسى اكادەمياسىنا وقۋعا ءتۇسىپ, كوپشىلىككە بەيمالىم قولونەردىڭ قىر-سىرىن تەرەڭ يگەرۋگە دەن قويادى.
– ول كەزدە پەتروپاۆل ونەر كوللەدجىن ءبىتىرىپ, ساندىك-قولدانبالى ونەر جانە كەراميكا پاندەرىنەن ساباق بەرىپ جۇرگەن ەدىم. ديپلوم الىپ, كاسىبي مامان اتانعاننان كەيىن الماتىداعى ت.جۇرگەنوۆ اتىنداعى ونەر اكادەمياسىنان, وزگە دە وقۋ ورىندارىنان شاقىرتۋ الدىم. بىراق كەنجەلەۋ قالعان سالانى جەرگىلىكتى جەردە وركەندەتەيىن دەگەن شەشىمگە كەلدىم, – دەيدى اننا ميحايلوۆنا وتكەندى ەسكە ءتۇسىرىپ.
ونەر الەمىنە فيۋزينگتىڭ دەندەپ ەنگەنىنە اتتاي الپىس جىل وتسە دە, قازاقستاندىقتارعا ءالى دە تاڭسىق كورىنەدى. ويتكەنى, ەلىمىزدە ارنايى وقۋ ورنى بولماعاندىقتان, تالاپكەرلەر سىرتقا كەتۋگە ءماجبۇر. جاڭاشىلدىققا جانى قۇمار اننانىڭ ءبىر ويى – جاستاردى فيۋزينگكە ۇيرەتە وتىرىپ, شەبەرلىك مەكتەبىن قالىپتاستىرۋ. قازىردىڭ وزىندە وعان تولىق نەگىز بار. شەبەردىڭ باستى قۇرالى – ارنايى پەش. ونى ەكاتەرينبۋرگتەن الدىرتقان. زاۋىت باسشىلىعى اننانىڭ تىڭ ىستەرگە جەتەلەيتىن تالابىن قولداپ, ەكىنشى پەشتى قولجەتىمدى باعاعا بەرگەن. بۇل سالا كوپ شىعىندى قاجەت ەتەدى. ماسەلەن, ەڭ ارزان دەگەن پەشتىڭ قۇنى رەسەيدە 50 مىڭ رۋبل توڭىرەگىندە. وعان شىنى كەسەتىن تەمىر جانە الماس پىشاقتار مەن قايشىلاردى, شىنى سىندىراتىن قۇرالداردى قوسساق, جۇمسالاتىن قاراجاتتىڭ ەسەلەنە تۇسەرى انىق. شيكىزات امەريكادان, يتاليادان ارنايى تاپسىرىس بويىنشا الىنادى. اننانىڭ «قولونەر يەلەرىنە مەملەكەت تاراپىنان قولداۋ كورسەتىلۋىن قالار ەدىم. رەسەيدە جەڭىلدىكتى شارالار قاراستىرىلادى. نيەت ەتكەندەر بيزنەس-جوسپار ءتۇزىپ, تيىمدىلىگىن دالەلدەي السا, قارجى بولىنەدى» دەگەن سوزىنە الىپ-قوسارىمىز جوق.
باستاپقىدا ساعات, بىلەزىك, جانۋارلاردىڭ بەينەسىن, گۇلدەر, اشەكەي زاتتار, سىرعا, كادەسىيلار جاساپ, تاجىريبە تولىسقاننان كەيىن كۇردەلى ديزايندارعا كوشكەن. الدىمەن بۇيىمنىڭ نوبايىن سىزىپ, سول بويىنشا كەسىلگەن شىنىدان اپپليكاتسيا جاسايمىز, سوسىن پەشكە سالىپ, بالقىتامىز. پەشتەن كوزدىڭ جاۋىن الاتىن دا- يىن ءونىم شىققانىمەن, قىرلاۋ, ارلەۋ جۇمىستارى ۇزاق ۋاقىت الادى. كوزدىڭ مايىن تاۋىساتىنداي بەينەتتى ەڭبەكتى قاجەت ەتەدى», دەيدى ول.
قازىر اننانىڭ جەكە شەبەرحاناسى, «لەپوتا» دەپ اتالاتىن ستۋدياسى بار. وندا سۋرەت سالۋدىڭ, بالشىقتان بۇيىمدار جاساۋدىڭ, ءبىر سوزبەن ايتقاندا, فيۋزينگتىڭ تىلسىم قۇرپيالارى ۇيرەتىلەدى. وزىمەن بىرگە جانار سالحانوۆا, ۆاسيلينا بەلوۋسوۆا سىندى وقىتۋشىلار ساباق بەرەدى. ستۋديادا 30 بالا مەن ون شاقتى ەرەسەك ادام ءتالىم الىپ ءجۇر. كەيبىرەۋلەرى بىرنەشە جىلدان بەرى وقيدى. مىسالى, ستۋديا تابالدىرىعىن 7 جاسىندا اتتاعان انجەليكا راحيموۆا – كوللەدج ستۋدەنتى. بالالارعا ساباق بەرۋگە جاراپ قالعان. مۇندا شاكىرتتەر سۋرەت سالادى, اپپليكاتسيالار جاسايدى, سان الۋان تەحنيكاعا كوڭىل ءبولىپ, پاپە-ماشە, باتيك, ارالاس تەحنيكانىڭ ءبارىن ۇيرەنەدى. وعان بور دا, بوياۋ دا, گۋاش تا قولدانىلادى.
اننا گەرماننىڭ باستى ۇستانىمى – شەبەرلىگىن توقتاۋسىز دامىتا بەرۋ.
روزا شاكەنوۆا,
جۋرناليست
سولتۇستىك قازاقستان وبلىسى