استاناداعى «بارىس-ارەنا» سارايىندا قازاقستاننىڭ ەڭبەك سىڭىرگەن سپورت شەبەرى, سوچي وليمپياداسىنىڭ قولا جۇلدەگەرى دەنيس تەنمەن قوشتاسۋ ءراسىمى ءوتتى.
ازاماتتىق جانازاعا مەملەكەتتىك ورگانداردىڭ باسشىلارى جانە باسقا دا وكىلدەرىمەن قاتار سپورتشىلار, دەنيستىڭ دوس-تانىستارى كەلدى. ولار جىلى ەستەلىكتەرىمەن ءبولىستى.
قارالى جيىنعا قاتىسقان اقپارات جانە كوممۋنيكاتسيالار ءمينيسترى داۋرەن اباەۆ قازاقستاننىڭ ماقتانىشىنان ايىرىلىپ قالۋىمىز بارىمىزگە ساباق ەكەنىن ايتتى.
«بۇل كۇنى دەنيستىڭ جاقىندارىنا كوڭىل ايتۋعا دا ءسوز تابۋ قيىن. بۇل ۇلكەن قايعى جانە بارلىعىمىز ءۇشىن ساباق بولدى. مۇنداي قاتەلىككە ەندى جول بەرمەۋ كەرەك. قوش بول جانە ءبىزدى كەشىر, دەنيس», - دەدى د.اباەۆ.
دەنيس تەنمەن قوشتاسۋعا ارنالعان ازاماتتىق جانازا ەلىمىزدىڭ بارلىق وڭىرلەرىندە ءوتىپ جاتىر. ال سپورتشىنى اقتىق ساپارعا اتتاندىرۋ ءراسىمى الماتىدا ءوتتى.