وبلىس اكىمى بەردىبەك ساپارباەۆ پارلامەنت ءماجىلىسىنىڭ وڭىردە جۇمىس ساپارىمەن جۇرگەن ءبىر توپ دەپۋتاتتارىمەن كەزدەستى. كەزدەسۋگە گلەب ششەگەلسكي, سەرگەي سيمونوۆ, دانيا ەسپاەۆا, ماگەررام ماگەرراموۆ, نارينە ميكاەليان, سونىمەن قاتار, وبلىستىق ءماسليحات حاتشىسى ءسانيا قالدىعۇلوۆا قاتىستى.
ءوڭىر باسشىسى ءماجىلىس دەپۋتاتتارىنا وبلىستىڭ اعىمداعى جىلدىڭ ءبىرىنشى جارتى جىلدىعىنداعى الەۋمەتتىك-ەكونوميكالىق دامۋى مەن مەملەكەت باسشىسى تاپسىرماسىن ورىنداۋ اياسىنداعى جەتىستىكتەرى تۋرالى مالىمدەدى.
– مۇناي ءوندىرۋ كولەمىنىڭ تومەندەۋىنە قاراماستان ءبىزدىڭ وبلىستاعى ەكونوميكا ءوسىمى 5,1 پايىزدى قۇرادى, بارلىق نەگىزگى الەۋمەتتىك-ەكونوميكالىق كورسەتكىشتەر بىلتىرعىدان جوعارى. بۇل بىزدە بەلگىلى ءبىر رەزەرۆتەر بار دەگەن ءسوز. ءبىز شيكىزاتتىق ەمەس سالالاردى ارتاراپتاندىرۋعا جانە دامىتۋعا باسا نازار اۋدارامىز. وسى جىلدىڭ قورىتىندىسى بويىنشا مەملەكەت باسشىسىنىڭ ەكونوميكا ءوسىمىن 4-5 پايىزعا جەتكىزۋ تاپسىرماسىن قامتاماسىز ەتەمىز دەپ سەنەمىن, – دەدى بەردىبەك ساپارباەۆ.
سونداي-اق, وبلىس اكىمى دەپۋتاتتارعا دەنساۋلىق ساقتاۋ, ءبىلىم بەرۋ, سپورت, تۇرعىن ءۇي-كوممۋنالدىق شارۋاشىلىعى سالالارىنىڭ دامۋى جايلى جەتە ايتىپ بەردى.
ءوز كەزەگىندە ءماجىلىس دەپۋتاتتارى اقتوبە وبلىسىنىڭ دامۋ قارقىنىنا جوعارى باعا بەرىپ, تۇرعىندارعا كوپتەگەن جاڭا الەۋمەتتىك نىسانداردىڭ سالىنعانىن جانە اشىلعانىن اتاپ ءوتتى.
بۇدان باسقا, سۇحباتتاستار پرەزيدەنتتىڭ بەس الەۋمەتتىك باستاماسىنىڭ, مەملەكەتتىك جانە سالالىق باعدارلامالاردىڭ اقتوبە وبلىسىندا جۇزەگە اسىرىلۋىنا قاتىستى بىرقاتار سۇراقتاردى تالقىلادى.
تەمىر قۇسايىن
«ەگەمەن قازاقستان»
اقتوبە