ورتالىق كوممۋنيكاتسيالار قىزمەتىندە قازاقستان رەسپۋبليكاسىنىڭ ءبىرىنشى پرەزيدەنتى – ەلباسى قورى, ادىلەت مينيسترلىگى جانە «ۇلتتىق زياتكەرلىك مەنشىك ينستيتۋتى» رمك-مەن بىرلەسە وقۋشىلار اراسىندا كولىك سالاسى بويىنشا بايقاۋ جاريالانعانىن مالىمدەدى.
«بايقاۋ وقۋشىلاردىڭ كولىك سالاسىنا دەگەن قىزىعۋشىلىعىن ارتتىرۋعا جانە وقۋشىلاردىڭ ماماندىق تاڭداۋدا سانالى شەشىم قابىلداۋىنا باعىتتالعان. بايقاۋ العاشقى رەت جاسوسپىرىمدەردىڭ اراسىندا فۋنكتسيونالدىق ساۋاتتىلىق پەن سىني تۇرعىدان ويلاۋ قابىلەتىن دامىتۋ قاجەتتىلىگى اتالىپ وتكەن قازاقستان رەسپۋبليكاسىنىڭ پرەزيدەنتىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى قازاقستان حالقىنا جولداۋىن جۇزەگە اسىرۋ اياسىندا 2017 جىلى وتكىزىلدى. بايقاۋدىڭ قوسالقى ۇيىمداستىرۋشىلارى بولىپ ۇلىبريتانيانىڭ عىلىم, تەحنيكا, تەحنولوگيا جانە باسقارۋ سالالارىنداعى كوشباسشى جوو ءبىرى بولىپ تابىلاتىن فرانك-بريتاندىق كرەنفيلد عىلىمي-زەرتتەۋ ۋنيۆەرسيتەتى ( ۇلىبريتانيا), سونداي-اق نازارباەۆ ۋنيۆەرسيتەتى تابىلادى. كونكۋرستىڭ ارىپتەستەرى رەتىندە ەير استانا ۇلتتىق تاسىمالداۋشىسى جانە «Samruk-Kazyna Trust» كق بولىپ تابىلادى», دەدى ادىلەت مينيسترلىگى زياتكەرلىك مەنشىك قۇقىعى دەپارتامەنتىنىڭ ديرەكتورى قارلىعاش ەسەنباەۆا.
ۇيىمداستىرۋشىلاردىڭ سوزىنە سۇيەنسەك, بايقاۋدىڭ قاتىسۋشىلارى رەتىندە اعىلشىن ءتىلىن جەتىك بىلەتىن, فيزيكا-ماتەماتيكا جانە جاراتىلىستانۋ عىلىمدارىنىڭ سالاسىندا وليمپيادا جەڭىمپازدارى بار, سونداي-اق وزدىك جوبالىق جۇمىس جاساۋ تاجىريبەسى بار, قازاقستان رەسپۋبليكاسىنىڭ جالپى ءبىلىم بەرەتىن مەكتەپتەردىڭ 16-دان 18-گە دەيىن جاس ارالىعىنداعى وقۋشىلار قاتىسادى. كوماندالار وبلىستار مەن رەسپۋبليكالىق ماڭىزى بار قالالاردىڭ اكىمدىكتەرىمەن قۇرىلادى.
ايتا كەتەتىن تاعى ءبىر جايت, ىرىكتەۋ كەزەڭى 2018 جىلى شىلدەنىڭ 24-26 ارالىعىندا استانا قالاسىندا وتەدى, قورىتىندىلارى بويىنشا اقتىق سىنعا شىققان كوماندالار 19-26 تامىز ارالىعىندا كرەنفيلد ۋنيۆەرسيتەتىنە وقۋ-تانىسۋ ساپارىنا اتتاندىرىلادى.
راۋان قايدار, «ەگەمەن قازاقستان»