قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى نازارباەۆ جارلىققا جاريا تۇردە قول قويار راسىمىندە شىمكەنت قالاسى ميلليوننان استام تۇرعىنى بار استانا مەن الماتى قالالارىنىڭ قاتارىنا قوسىلعانىن ايتتى.
ەلىمىزدىڭ جۇرەگى سانالاتىن ەلوردانىڭ 20 جىلدىق مەرەيتويىمەن تۇسپا-تۇس كەلگەن شىمكەنت قالاسى تۇرعىندارىنىڭ سانى ميلليونعا جەتىپ, رەسپۋبليكالىق ماڭىزى بار قالالار قاتارىنا جاتقىزىلعانى تۋرالى جاعىمدى تاريحي وقيعانى زيالى قاۋىم, ارداگەرلەر, ءوڭىردىڭ ءماسليحات دەپۋتاتتارى, جاستار, باق وكىلدەرى, جالپى قالا حالقى ۇلكەن ىقىلاسپەن, وتە جوعارى اسەردەگى زور قۋانىشپەن قارسى الدى.
شىمكەنت قالاسى وسىنداي دارەجەگە ەلباسىمىز نۇرسۇلتان ءابىش ۇلى نازارباەۆتىڭ كەمەل ساياساتىنىڭ, شىمكەنت قالاسىنا دەگەن ەرەكشە نازارىنىڭ, قامقورلىعىنىڭ ارقاسىندا قول جەتكىزدى دەپ نىق سەنىممەن ايتا الامىن, ويتكەنى ەلىمىز ەگەمەندىك العان ۋاقىتتان بەرى قالا حالقىنىڭ سانى وسۋىمەن قاتار, الەۋمەتتىك-ەكونوميكالىق دامۋى قارقىندى ءجۇرىپ وتىردى. بۇگىندە قالامىزدىڭ قۇلپىرىپ وزگەرگەنى, دامىپ, ءوسىپ-وركەندەگەنى بۇكىل ءوڭىر حالقى ءۇشىن زور ماقتانىش.
وڭتۇستىك ءوڭىرىنىڭ ورتالىعى بولىپ كەلگەن شىمكەنتكە جاڭا مارتەبە بەرىپ جانە وبلىس ورتالىعىن كيەلى تۇركىستان دەپ بەلگىلەپ, تۇركىستان وبلىسى دەپ اتاۋ تۋرالى ەگەمەن ەلىمىزدىڭ تاريحىندا قالاتىن جارلىق شاھاردىڭ الداعى ۋاقىتتاعى جان-جاقتى دامۋ باعىتىن ايقىنداۋعا, ۇلتتىق رۋحتىڭ ۇيىتقىسى, ادەپ-عۇرىپتىڭ التىن بەسىگى سانالىپ كەلگەن, حالقى ەڭبەكقور قالانىڭ تۇرعىندارىنا ۇلكەن جاۋاپكەرشىلىك پەن مىندەتتەر جۇكتەپ, مول مۇمكىندىكتەر تۋعىزاتىنى انىق.
ەلىمىزدىڭ ءۇشىنشى مەگاپوليسى رەتىندە ەكونوميكالىق جانە الەۋمەتتىك دامۋىنىڭ جوعارى ساتىسىنا قادام باسۋىنا سونى سەرپىن قوسىپ, جاڭا مۇمكىندىكتەر, تىڭ جوبالار مەن جوسپارلارعا داڭعىل جول اشىپ بەرەتىنى دە كۇمانسىز.
قالا حالقىنىڭ بولاشاقتا ءوسىپ-وركەندەۋىنە تەرەڭ ءمان بەرىپ, بۇگىنگى جانە كەلەر ۇرپاقتىڭ جارقىن بولاشاعىنا كورەگەندىكپەن كوز تىككەن ەلباسىنا حالىقتىڭ اق نيەتتى العىسى شەكسىز.
ەلىمىز ەگەمەندىك العان كەزدەگى شىمكەنت پەن قازىرگى شىمكەنتتى سالىستىرۋ مۇمكىن ەمەس. ول كەزدە حالىق سانى 400 مىڭداي ادام, شەكاراسى 13 مىڭ گەكتار, بيۋدجەت كولەمى 1 ملرد تەڭگە كولەمىندە عانا بولاتىن.
بۇگىنگى تاڭدا قالا تۇرعىندارىنىڭ سانى 1 ميلليوننان اسىپ, ءۇش ەسەگە جۋىق, جەر كولەمى 117 مىڭ گەكتارعا جەتىپ, ونداعان ەسەگە ءوسىپ, بيۋدجەت كولەمى 135 ملرد تەڭگەنى قۇراپ وتىر. ال وسى ارالىقتا كوز تارتاتىن ءزاۋلىم تۇرعىن ۇيلەر مەن اكىمشىلىك عيماراتتاردىڭ بوي كوتەرۋى, مادەني وشاقتاردىڭ, سپورت كەشەندەرىنىڭ كوپتەپ سالىنۋى, قالا تۇرعىندارىنىڭ مادەنيەت دەيگەيىنىڭ جوعارىلاۋى قالامىزدىڭ ىرگەسى بەكي تۇسۋىنە سەپتىگىن تيگىزدى.
مەملەكەتتىك باعدارلامالاردىڭ ماڭىزدىلىعى مەن بيۋدجەت قارجىلارىن ءتيىمدى پايدالانۋ ناتيجەسىندە قالامىزدا قىرۋار جۇمىستار اتقارىلدى. ماسەلەن, اتاپ ايتار بولساق, بىرنەشە شاعىن اۋدان پايدا بولدى, ونىڭ ىشىندە ەرەكشە اتاپ وتەرلىگى «نۇرسات» شاعىن اۋدانى, سول جەردەگى اكىمشىلىك-ىسكەرلىك ورتالىقتىڭ اشىلۋى. سونداي-اق يندۋستريالىق-يننوۆاتسيالىق دامۋ, «بيزنەستىڭ جول كارتاسى», «جۇمىسپەن قامتۋ-2020», «100 مەكتەپ, 100 اۋرۋحانا», «بالاپان», ء«بىزدىڭ اۋلا» باعدارلامالارى نەگىزىندە بىرنەشە كاسىپورىن ىسكە قوسىلسا, بالاباقشالار, مەكتەپتەر, اۋرۋحانالار مەن ەمحانالار پايدالانۋعا بەرىلىپ, ناتيجەسىندە كوپتەگەن ادام جۇمىسپەن قامتىلدى. سونىمەن قاتار قالامىزداعى ساياباقتاردىڭ كوركەيە ءتۇسۋى, كوشەلەر مەن كوپقاباتتى ۇيلەردىڭ اۋلالارىنىڭ جوندەلۋى, باسقا دا كورىكتەندىرۋ, اباتتاندىرۋ جۇمىستارىنىڭ جۇرگىزىلۋى قالا اجارىن اشا ءتۇستى, ەڭبەكسۇيگىش, جاڭاشىل باستامالارعا تەز بەيىمدەلگىش شىمكەنتتىكتەر ەلىمىزدىڭ دەموگرافيالىق ءوسۋ قارقىنىنا دا ۇلكەن ۇلەس قوستى.
قازىرگى كەزدە قالامىزدىڭ ءۇشىنشى قالا مارتەبەسىنە لايىق بولۋىنا ۇلكەن سەرپىن بەرەتىن «Shymkent City» زاماناۋي تۇرعىن جانە ىسكەرلىك ورتالىعىنىڭ قۇرىلىسى باستالىپ كەتتى. ال شىمكەنتتىڭ رەسپۋبليكالىق مارتەبە الۋى قالامىزعا ينۆەستيتسيا تارتۋعا دا كەڭ جول اشىپ وتىر. بىزدەگى جوبالارعا قىزىعۋشىلىق تانىتقان ينۆەستورلار وتە كوپ.
ماقساتىمىز ايقىن. شىمكەنت قالاسىن اقىلدى قالا قاتارىنا ەنگىزۋ. ول ءۇشىن بىزدە مۇمكىنشىلىكتەر جەتەرلىك.
شىمقالانىڭ مارتەبەسىنىڭ وسۋىنە نەگىز بولعان وڭتۇستىك قازاقستان وبلىسىنىڭ تۇركىستان اتاۋىن يەلەنۋى, كيەلى دە قاسيەتتى تۇركىستان قالاسىنىڭ وبلىس ورتالىعى بولۋى سانادا سىلكىنىس تۋعىزىپ, وتانشىلدىق سەزىمدى تەرەڭدەتەتىن تىڭ باستاما, رۋحاني جاڭعىرۋدىڭ ايقىن كورىنىسى, تۋريزم سالاسىنىڭ دامۋىنا دا ۇلكەن سەرپىلىس بەرەتىن جاڭاشىلدىق دەسەم, قاتەلەسپەيتىنىم انىق.
تۇركىستاننىڭ تاريحى تەرەڭدە. قاسيەتتى جەردىڭ الەۋمەتتىك, ەكونوميكالىق الەۋەتى زور. بۇكىل تۇركى الەمىنىڭ ساياسي ءارى رۋحاني ورتالىعى بولعان تۇركىستاننىڭ بۇكىل قازاقستاندىق ءۇشىن ماڭىزى ەرەكشە.
قاسيەتتى تۇركىستان اتاۋى وبلىسىمىزدىڭ جانە ەلىمىزدىڭ ءۇشىنشى مەگاپوليسى – شىمكەنتتىڭ ودان ءارى قارقىندى دامۋىنا ۇلكەن سەرپىلىس بەرەتىنىنە سەنىمىم كامىل.
قالامىزداعى حالىقتىڭ ەڭبەككە قابىلەتتى ساناتىن جۇمىسپەن قامتۋ, جاستاردى پاتريوتتىق باعىتتا تاربيەلەۋ, ەڭبەككە باۋلۋ, باتاگوي قاريالارىمىزدىڭ قۇرمەتكە يە بولىپ وتىرۋىن قامتاماسىز ەتۋ ءۇشىن بىزدە مۇمكىندىكتەر بار. ەڭ نەگىزگىسى, نىق سەنىمنەن كەندە ەمەسپىز.
ەلباسىنىڭ شىمكەنتتىكتەرگە ارتىپ وتىرعان سەنىمىن اقتاۋ ءۇشىن ايانباي ەڭبەك ەتىپ, بارلىعىمىز ءبىر جاعادان باس, ءبىر جەڭنەن قول شىعارۋىمىز قاجەت.
بۇكىل قازاقستاننىڭ ماقتانىشى بولعان, جاڭارعان, جاڭعىرعان استانا قالاسىنىڭ 20 جىلدىق مەرەيتويىمەن تۇسپا-تۇس كەلگەن قوس قۋانىشقا يە بولعان وڭتۇستىك ءوڭىرى بىرلىك پەن ىنتىماقتى كوزدىڭ قاراشىعىنداي ساقتاپ, استاناعا قاراپ بوي تۇزەيتىنىنە كامىل سەنەمىن.
نۇرلان بەكنازاروۆ, شىمكەنت قالالىق ماسليحاتىنىڭ حاتشىسى
تۇركىستان وبلىسى