قوستاناي وبلىستىق تاريحي-ولكەتانۋ مۋزەيىندە وڭىرگە عانا ەمەس, جالپى ەلگە بەلگىلى تۇلعالاردىڭ ۇستاعان دومبىرالارى ساقتاۋلى تۇر. سولاردىڭ ىشىندە 1916 جىلعى كوتەرىلىس باسشىلارىنىڭ ءبىرى امانكەلدى باتىر – امانكەلدى يمانوۆ تۇتىندى دەيتىن شاناعى جىڭىشكە دومبىرا بىردەن كوزگە تۇسەدى.
موينى ۇزىن, شاناعى وتە كىشكەنتاي اسپاپتىڭ تۇرقى دا قىزىق. كادىمگى كوز ۇيرەنگەن دومبىرالارعا ۇقساڭقىرامايدى. شاناعىنىڭ سىرتىن مۇيىزبەن ورنەكتەگەن جانە كانىگى شەبەردىڭ قولىنان شىقانى كورىنىپ تۇر. جادىگەردىڭ قۇجاتىندا الدىمەن جالپى دومبىرا تۋرالى تۇسىنىك بەرىلەدى.
امانكەلدىنىڭ دومبىراسىن مۋزەيگە كىمنىڭ تاپسىرعانى تۋرالى جانە اسپاپتىڭ باتىرعا تيەسىلى ەكەنىن انىقتايتىن ەشقانداي جازبا جوق. 1963 جىلى تورعايداعى مۋزەي جابىلىپ قالادى دا, 1964 جىلى ونىڭ بارلىق جادىگەر وبلىستىق تاريحي-ولكەتانۋ مۋزەيىنە كوشىرىلەدى. 1969 جىلى تورعاي وڭىرىندە مۋزەي اشىلادى دا بۇرىنعى جادىگەرلەر قايتارىلادى. سوندا امانكەلدىنىڭ دومبىراسى وبلىستىق مۋزەي قورىندا قالا بەرەدى.
– مۋزەي ماماندارى دومبىرانى شەبەر ءحىح عاسىردىڭ اياعىندا نەمەسە حح عاسىردىڭ باسىندا جاساعان دەپ توپشىلايدى. شەبەردىڭ بىلىكتىلىگى جوعارى ادام بولسا كەرەك. اسپاپتىڭ شاناعىنداعى ورنەكتە دە, دومبىرانىڭ جالپى جاسالۋىنان دا ءمىن تاپپايسىز. داۋىسى كۇيگە كەلمەسە دە, ارقانىڭ ءانىن ايتۋعا لايىقتالعان با دەپ ويلايمىز. مۇمكىن ۇنەمى ات ۇستىندە جۇرەتىن باتىردىڭ يىعىنا اسىنۋىنا ىڭعايلى بولسىن دەپ, شاناعىن وسىلاي كىشكەنتاي ەتتى مە, كىم ءبىلسىن. قازىرگى دومبىرالاردىڭ شاناعى يىققا اسىنىپ جۇرۋگە كەلە بەرمەيدى, سىنىپ قالادى, – دەيدى وبلىستىق تاريحي-ولكەتانۋ مۋزەيىندەگى تاريحي-مادەني مۇرالاردى قورعاۋ جانە پايدالانۋ ءبولىمىنىڭ مەڭگەرۋشىسى ەلميرا الشىموۆا.
دومبىرانىڭ ۇزىندىعى 87 سانتيمەتر- دەن اسادى. قانداي اعاشتان جاسالعانى ايتىلماعان. داۋىسى جاي شىعاتىنى ايتىلعان سيپاتتامادا. شاناعى اعاشتان ويىپ جاسالعان.
ءنازيرا جارىمبەت,
«ەگەمەن قازاقستان»
قوستاناي