«رۋحاني جاڭعىرۋ» باعدارلاماسى اياسىندا استانا قالاسىنىڭ 20 جىلدىق مەرەيتويىنا وراي انكارادا « ۇلى دالا استاناسى» (Ulu Bozkır Başkenti Astana) اتتى كىتاپ جارىق كوردى.
جاڭا جيناق استانا قالاسىنىڭ 20 جىلدىق مەرەيتويىنا تارتۋ رەتىندە قازاقستاننىڭ تۇركياداعى ەلشىلىگى تاراپىنان ارنايى دايىندالدى. كىتاپتا تۇركيانىڭ 11-پرەزيدەنتى ابدوللا گۇل, پرەزيدەنت رەجەپ تايپ ەردوعاننىڭ باس كەڭەسشىسى يالچىن توپچۋ, تۇركيا ۇلى ۇلتتىق ءماجىلىسىنىڭ ەكس-توراعالارى حيكمەت چەتين مەن جەميل چيچەك, بۇرىنعى مادەنيەت ءمينيسترى نامىك كەمال زەيبەك, تۇرىك كەڭەسىنىڭ بۇرىنعى باس حاتشىسى حاليل اكىنجى باستاعان ساياسي تۇلعالار, مەملەكەت جانە قوعام قايراتكەرلەرىنىڭ, زيالى قاۋىم وكىلدەرىنىڭ ارايلى استانا مەن ەلباسى نۇرسۇلتان نازارباەۆتىڭ ەكى ەلدىڭ ساياسي-ەكونوميكالىق بايلانىسىن دامىتۋداعى ماڭىزدى ءرولى تۋرالى ساراپتامالىق ماقالالارى, زەرتتەۋ ەڭبەكتەرى جانە شىنايى پىكىر مەن جىلى لەبىزدەرى بەرىلگەن.
كىتاپتىڭ العىسوزىندە قازاقستان رەسپۋبليكاسىنىڭ تۇركياداعى توتەنشە جانە وكىلەتتى ەلشىسى ابزال ساپاربەك ۇلى «قازاقستان پرەزيدەنتىنىڭ «استانا – ەڭ الدىمەن ازاتتىعىمىزدىڭ سيمۆولى, قازاقستاننىڭ جاڭا تاريحىنىڭ شىنايى شەجىرەسى, قارقىندى دامۋىمىزدىڭ, قول جەتكەن تابىستارىمىزدىڭ, ابىروي-بەدەلىمىزدىڭ, بەرەكە-بىرلىگىمىزدىڭ جارقىن كورىنىسى» دەگەن ۇلاعاتتى ءسوزى ءاردايىم جادىمىزدان شىققان ەمەس.
قازاق جانە تۇرىك تىلىندە جارىق كورگەن جيناق باۋىرلاس ەلدەردىڭ دوستىعىن كۇشەيتىپ, سەنىمىن ارتتىرا تۇسەدى دەگەن ويدامىن. سونداي-اق الداعى ۋاقىتتا قازاقستان مەن تۇركيا ىنتىماقتاستىعىن زەرتتەۋشىلەر ءۇشىن قۇندى ەڭبەك بولارىنا سەنەمىن» دەيدى.
تۇركيا رەسپۋبليكاسىنىڭ ەكس-پرەزيدەنتى ابدوللا گۇل «عالامات جەتىستىكتىڭ جەمىسى» اتتى ماقالاسىندا «وسىدان ون جىل بۇرىن تۇركيا رەسپۋبليكاسىنىڭ پرەزيدەنتى رەتىندە قىمباتتى باۋىرىم نۇرسۇلتان نازارباەۆپەن بىرگە حالىقارالىق دەڭگەيدەگى سالتاناتتى جيىنعا قاتىسىپ, تىلەكتەستىگىمدى بىلدىرگەن ەدىم. استانانىڭ جاڭا مەگاپوليس رەتىندە قالىپتاسۋى – جوعارى مارتەبەلى نۇرسۇلتان نازارباەۆتىڭ ۇستانعان ستراتەگيالىق ساياساتى مەن كەمەل كورەگەندىلىگىنىڭ ناتيجەسى دەپ نىق سەنىممەن ايتۋعا بولادى.
تۇركىتىلدەس مەملەكەتتەردىڭ ىنتىماقتاستىق كەڭەسىن قۇرۋ تۋرالى ناحچىۆان كەلىسىمىنىڭ ەڭ بەلسەندى قولداۋشىسى نۇرسۇلتان نازارباەۆ بولعاندىقتان, مەن ونى «تۇركى الەمىنىڭ اقساقالى» دەپ جاريالاعان ەدىم. قازاقستان پرەزيدەنتى بۇل قۇرمەتكە ابدەن لايىق تۇلعا!» دەپ اعىنان جارىلىپتى.
تۇركيا رەسپۋبليكاسى پرەزيدەنتىنىڭ باس كەڭەسشىسى يالچىن توپچۋ «ازات ەلدىڭ التىن ءتاجى» ماقالاسىندا «بولاشاقتا قازىرگى الەم تاريحى جازىلار ۋاقىتتا قازاقستان مەن قازاق تۇركىلەرى بولىمىندە «تۇڭعىش پرەزيدەنت», «تۇركى دۇنيەسىنىڭ اقساقالى نۇرسۇلتان نازارباەۆ», «استانا قالاسى» دەگەن سوزدەر ءبىر ۇعىمعا اينالىپ, قاتار اتالاتىن بولادى. استانا – «اسيتانەي شاحانە», ياعني «پاتشانىڭ تابالدىرىعى, تاڭعاجايىپ باس قالا» دەگەندى بىلدىرەدى. بۇل انىقتاما كەزىندە ىستانبۇل ءۇشىن قولدانىلعان ەدى. مەملەكەتتەر مەن ەلدەردىڭ قالىپتاسۋ تاريحىندا ۇلى كوشباسشىلار قانداي رولگە يە بولسا, باستى شەشىمدەر شىعارىلعان شاھارلار دا ماڭىزدى ورىن العان. قازىرگى قازاقستاننىڭ نەگىزىن سالعان اقساقالىمىز – كوشباسشى نۇرسۇلتان نازارباەۆ تاۋەلسىز ەلدىڭ سيمۆولى رەتىندە استانانى ىرگەتاسىنان باستاپ تۇبەگەيلى جوسپارلاپ, ءاربىر عيماراتتىڭ قۇرىلىسىن قالتقىسىز قاداعالاپ, ءار كىرپىشىن قامقور قولمەن قالادى», دەيدى.
تۇركيا رەسپۋبليكاسىنىڭ سىرتقى ىستەر ءمينيسترى مەۆليۋت چاۆۋشوعلۋ «تۇركى الەمىنىڭ اقساقالى, جوعارى مارتەبەلى پرەزيدەنت نۇرسۇلتان نازارباەۆتىڭ بايىپتى بايلامىنان كەيىن, 1998 جىلى قازاقستاننىڭ باس قالاسى رەتىندە استانانىڭ بەكىتىلۋى تاۋەلسىز قازاق ەلى تاريحىنداعى ايشىقتى وقيعالاردىڭ ءبىرى بولدى. قادىرمەندى نۇرسۇلتان نازارباەۆتىڭ ايقىن ۇيعارىمى شامامەن ءجۇز جىل بۇرىن تۇركيا رەسپۋبليكاسىنىڭ اكىمشىلىك ورنىن انكاراعا كوشىرگەن ۇلى كوشباسشىمىز گازي مۇستافا كەمال اتاتۇرىكتىڭ بولجاعىشتىق قاسيەتىن ەسكە سالادى. استانا – ەل ورداسى بولىپ جاريالانعان كۇننەن باۋىرلاس شاھار انكارا سىندى جەدەل دامىپ, قازاقستاننىڭ سيمۆولىنا اينالدى, پرەزيدەنت نۇرسۇلتان نازارباەۆتىڭ دانالىعىمەن مودەرنيزاتسيالانعان ەلدىڭ الەمدىك ارەناداعى بەت-بەينەسىن تانىتتى», دەگەن پىكىرىن بىلدىرگەن.
باعاشار تۇرسىنباي ۇلى,
«ەگەمەن قازاقستان»