قوستانايدا «ايالا» قايىرىمدىلىق قورى وبلىستىق بالالار اۋرۋحاناسىنا جابدىقتار سىيلادى

مەديتسينالىق جابدىق قۇرامىندا اۋىر جاعدايداعى نارەستەلەر مەن شالا تۋعان  سابيلەردى ەمدەۋگە, كۇتۋ بارىسىندا سىرتقى ورتانىڭ  وڭتايلى جاعدايلارىن جاساۋعا ارنالعان Amelie  قارقىندى  تەراپيا ينكۋباتورى ورناتىلادى.  مۇنىڭ باعاسى  6 ملن 700 مىڭ تەڭگە تۇرادى. سونىمەن قاتار 4 ملن 460 مىڭ تەڭگە تۇراتىن  Amenic اشىق جانە جان ساقتاۋ جۇيەسىن دارىگەرلەر  شالا تۋعان سابيلەردىڭ جانە ايى-كۇنى جەتىپ تۋعان نارەستەلەردىڭ جان ساقتاۋ جانە ودان كەيىنگى كۇتىم شارالارى كەزىندە پايدالانادى.

– Amelix ءۇش فوتوتەراپيا شامىنىڭ قۇنى 2 ملن 940 مىڭ تەڭگە تۇرادى. ولاردىڭ ساۋلەسىنىڭ استىندا سارى اۋرۋ تۋعىزاتىن بيليرۋبين دەڭگەيى جوعارى سابيلەردى ۇستايمىز. بۇل اپپاراتتىڭ كەرەمەتتىگى ەمدەۋ ەشقانداي ءدارى-دىرمەكسىز وتەدى. قارقىندى تەراپيادا جاتقان ناۋقاس بالالاردىڭ ومىرلىك اسا ماڭىزدى كورسەتكىشتەرىن مىنا ەكى مونيتور ارقىلى باقىلاپ وتىرامىز. ولاردى «ايالا» قورى 1 ملن 900 مىڭ تەڭگەگە اپەرىپ وتىر. قىسقاسى وسى  زاماناۋي مەديتسينالىق جابدىقتاردىڭ بارلىعى دا اۋرۋحانادا بار. بىراق ولاردىڭ  كەيبىرىنىڭ توزىعى جەتىپ كەلەدى,  ءارى ناۋقاستارعا جەتىمسىز بولاتىن. ەندى بىزگە قوسىمشا كۇش كەلدى دەپ بىلەمىز, – دەيدى وبلىستىق بالالار اۋرۋحاناسىنىڭ باس دارىگەرى يگور بەلوبرەجينسكي.

«ايالا» قايىرىمدىلىق قورىنىڭ وبلىستىق بالالار اۋرۋحاناسىنا جابدىقتاردى تاپسىرۋ شاراسىنا وبلىس اكىمى ارحيمەد مۇحامبەتوۆ قاتىستى.

– استانانىڭ 20 جىلدىعى قارساڭىندا وبلىستا يگى شارا ءوتىپ وتىر. ەلباسى دەنساۋلىق ساقتاۋ سالاسىنداعى قىزمەت ساپاسىن  جوعارىلاتۋ ءاردايىم تاپسىرىپ كەلەدى. وبلىستا سول تاپسىرمالار ورىندالىپ كەلەدى. كوپتەگەن دەنساۋلىق ساقتاۋ  نىساندارىنا كۇردەلى جوندەۋلەر جاسالدى, مەديتسينالىق قۇرىلعىلار ساتىپ الىنىپ جاتىر. 2018 جىلى تەك وسى مەديتسينالىق قۇرىلعىلار مەن جابدىقتار ءۇشىن وبلىس بيۋدجەتىنەن 2,8 ميلليارد تەڭگە ءبولىندى. دەنساۋلىق ساقتاۋ سالاسىنىڭ قىزمەتى جاقسارا ءتۇسۋى ءۇشىن بۇل دا جەتكىلىكسىز. سوندىقتان دەمەۋشىلەر كومەگى ارقاشان دا قاجەت. «ايالا» قايىرىمدىلىق قورىنىڭ بۇگىنگى شاراسى وسىنداي يگى ءىستىڭ ءبىرى, – دەدى ارحيمەد بەگەجان ۇلى.

«ايالا» قايىرىمدىلىق قورى مەديتسينالىق جوبالارىنىڭ جەتەكشىسى  بەرىك دارجانوۆ تەك وبلىستىق اۋرۋحاناعا عانا ەمەس,  مادەنيەت جانە ءبىلىم سالاسىنا دا كومەك بەرەتىنىن ايتا كەلىپ, ول جەتىم جانە اتا-اناسىنىڭ قامقورلىعىنسىز قالعان بالالارعا ارنالعان №2 قوستاناي  تۇزەتۋ مەكتەپ-ينتەرناتىنا, ليساكوۆ جانە ارقالىق قالالارىنداعى وسىنداي مەكەمەلەرگە,   ينتەراكتيۆتىڭ تاقتالار سەرتيفيكاتىن تابىس ەتتى.  سونداي-اق سارىكول اۋدانىنداعى اۋداندىق كىتاپحاناعا 1 ملن 536 302 مىڭعا بالالرعا ارنالعان كىتاپتار ساتىپ الىنعانى جونىندە سەرتيفيكات تاپسىردى.  وسى كىتاپحاناعا  قوماقتى قارجىعا تسيفرلاندىرۋ قۇرىلعىلارى دا تابىس ەتىلدى.

قور ماماندارى وسىنداي قايىرىمدىلىق ىسكە دەمەۋشىلىك جاساعان قور مەن قازاقستاندىقتار Halk onlaine banking جانە SMS («بيلاين», كسەll, Activ, Tele2) ارقىلى قارجى جينالعانىن,     قاراپايىم قازاقستاندىقتار  «ەير استانا» ساتۋ وفيستەرىندە, «قاعانات» اسحانالار جەلىسىندە, Mamma Mia مەيرامحانالار جەلىسىندە ورناتىلعان بوكستاردا ءتۇرلى اقشا سومالارىن قالدىرعانىن ايتتى.

ءنازيرا جارىمبەت

«ەگەمەن قازاقستان»

قوستاناي