ەل تاۋەلسىزدىگىنىڭ 20 جىلدىق مەرەكەسى قۇرمەتىنە ارناپ استانا قالاسى اكىمدىگى مەن قازاقستان جازۋشىلار وداعىنىڭ استانا فيليالى بىرىگىپ جاريالاعان رەسپۋبليكالىق جىر ءمۇشايراسى ءوز مارەسىنە جەتتى. كورنەكتى قالامگەرلەر تورەلىك ەتكەن قازىلار القاسى بايگەگە قاتىسقان 125 اقىننىڭ شىعارمالارىن جان-جاقتى ساراپتاي كەلە ەڭسەلى ەلىمىزدىڭ اسىل مۇراتتارىن جارقىراتا جىرلاي بىلگەن جۇلدەگەر اقىنداردى انىقتادى.
سونىمەن, استاناداعى الامان جىر بايگەسىندە باس بايگەنى – «ازاتتىق» اتتى تولعاۋىمەن وڭايگۇل تۇرجان, ءبىرىنشى ورىندى – «اسپاننان قازاق جاۋعان كۇن» پوەماسىمەن جاركەن بودەش ۇلى, ەكىنشى ورىنداردى – «اللا مەنەن الاشتىڭ اراسىندا» اتتى ولەڭ توپتاماسىمەن سەرىك اقسۇڭقار ۇلى جانە «اقبوز اتتى ارۋلار», «تاۋەلسىزدىك» تولعاۋلارىمەن بيعايشا مەدەۋوۆا, ءۇشىنشى ورىنداردى – تاۋەلسىزدىككە ارنالعان ءبىر توپ ولەڭدەرىمەن گۇلنار سالىقباەۆا, توقتاربەك حامزين, ناۋرىزبەك سارشاەۆ جەڭىپ الدى. ىنتالاندىرۋ سىيلىقتارىن – تولىباي ابىلاەۆ, اقىلبەك شاياحمەتوۆ, جۇما-نازار سومجۇرەك, ساۋلە دوسجان, دينارا مالىكوۆا يەلەندى.
مۇشايراعا قاتىسقان بارلىق اقىنداردىڭ بايگەگە تۇسكەن شىعارمالارى ىرىكتەلىپ, كەلەر جىلى «تاۋەلسىزدىككە تارتۋ» دەگەن اتپەن جەكە كىتاپ بولىپ شىعاتىن بولدى. جيناقتىڭ جارىق كورۋىنە استانا قالاسى اكىمدىگى دەمەۋشىلىك جاساماق.
«ەگەمەن-اقپارات».