جاقىندا الماتى مۋزەيىندە «اقىسكا» تۇرىك ەتنومادەني ورتالىعىنىڭ كورمەسى اشىلدى. بۇل قازاقستان حالقى اسسامبلەياسىنىڭ «ەل بىرلىگى – دوستىقتا» كورمەلەر تسيكلى اياسىندا ۇيىمداستىرىلىپ وتىرعان 13-كورمە.
مۋزەيدە ەلىمىزدە تۇرىپ جاتقان ورىس, بۋريات, بەلورۋس, ۋكراين, تۇركىمەن, تاتار, كورەي, ت.ب. ۇلت وكىلدەرى مادەني ورتالىقتارىنىڭ كورمەلەرى تۇراقتى وتكىزىلىپ كەلەدى.
«اقىسكا» تۇرىك مادەني ورتالىعىنىڭ ماقساتى رۋحاني-مادەني قۇندىلىقتاردى, ۇلتارالىق تاتۋلىقتى ساقتاۋ بولىپ تابىلادى. بۇگىنگى تاڭدا ەلىمىزدە شامامەن ەكى ءجۇز مىڭعا جۋىق تۇرىك حالقىنىڭ وكىلدەرى تۇرادى.
اتالعان كورمەدە احىسكا تۇرىكتەرىنىڭ ۇلتتىق كيىمدەرى, زەرگەرلىك جانە تۇرمىستىق بۇيىمدارى قويىلعان. ەكى ايعا سوزىلاتىن كورمەنى الماتىلىقتار مەن قالا قوناقتارى تاماشالاي الادى.
ەلۆيرا سەرىكقىزى,
«ەگەمەن قازاقستان»
الماتى