وسى كوكتەم مەن جاز اۋدانىمىز ءۇشىن مەرەكەگە تولى بولدى. سولاردىڭ ىشىندە مادەنيەت سالاسىنىڭ باستى جايدارلى جاڭالىعى – «ايگىلى ءالنۇر مەيىربەكوۆ» دەگەن جاڭا كىتاپتىڭ جارىققا شىعۋى. بۇل كىتاپتا رايىمبەك اۋدانىنا بەلگىلى جازۋشى-جۋرناليست ءالنۇر مەيىربەكوۆتىڭ اڭگىمەلەرى, ولەڭدەرى, باتا-تىلەكتەرى, ەستەلىكتەرى توپتاستىرىلعان.
تۇساۋكەسەر راسىمىندە سويلەگەن رايىمبەك اۋدانىنىڭ اكىمى جولان وماروۆ اتالعان كىتاپتا ءالنۇر مەيىربەكوۆتىڭ ونەگەلى ءومىرى, نارىنقول وڭىرىنەن شىققان مۇقاعالي ماقاتاەۆ, ەركىن ءىبىتانوۆ, ساعات اشىمباەۆ, باققوجا مۇقاي, جانبولات اۋپباەۆ سىندى تالاناتتى اقىن-جازۋشىلار مەن جۋرناليستەرگە كورسەتكەن اعالىق قامقورلىعى, رەداكتورلىق تالىمگەرلىگى كەڭىنەن كورىنىس تاپقانىن اتاپ ءوتتى. بۇدان كەيىن ساحنادا جازۋشى ءومىرىنىڭ ءاربىر ساتىنەن, قوعامدىق ورىنداردا اتقارعان ەلەۋلى ەڭبەكتەرىنەن ەستەلىك رەتىندە بەينەكورىنىس ۇسىنىلدى.
العاشىندا اۋداندىق باسپاحانادا, ودان كەيىن گازەت رەداكتسياسىندا ءتىلشى بولىپ قىزمەتتەر اتقارعان ءا.مەيىربەكوۆ ۇلى وتان سوعىسى باستالعاندا ءبىر توپ قۇرداستارىمەن بىرگە قان مايدانعا اتتانادى. ۇرىس كەزىندە مەرگەندىگىمەن كوزگە ءتۇسىپ, اجال ءتوندىرىپ كەلە جاتقان جاۋ تانكىسىن جايراتىپ, جانىنداعى جاۋىنگەرلەردى ولىمنەن قۇتقارىپ قالادى. بۇل جونىندە سوعىستان كەيىن جازىلعان «قاراپايىم قاھارماندار» كىتابىندا جان-جاقتى ايتىلادى. مايداننان جاراقات الىپ ەلگە ورالعان ءالنۇر اتامىز 1950-جىلداردىڭ ورتا شەنىندە الماتىداعى پارتيا مەكتەبىنىڭ جۋرناليستيكا بولىمىندە وقىپ, ءبىلىمىن تولىقتىرادى. مىنە, سودان باستاپ ول كىسى اۋداندىق «سوۆەتتىك شەكارا» گازەتىندە (قازىرگى ء«حانتاڭىرى» گازەتى) كوپ جىلدار بويى باس رەداكتور بولادى.
ساحناداعى بەينەكورىنىستەن كەيىن الەكەڭنىڭ توتە تاربيەسىنەن وتكەن, وسى جيىنعا قوناق بوپ كەلگەن قالامگەر داۋلەت جەلدىكباەۆ وتكەن مەن بۇگىننىڭ ءبىرشاما اڭگىمەسىن الەكەڭدى ەسكە الا وتىرا وي تارازىسىنا سالدى.
– «ايگىلى ءالنۇر مەيىربەكوۆ» دەسە دەگەندەي. ول كىسى شىن مانىندە ايگىلى ادام. ۇلكەننىڭ دە, كىشىنىڭ دە ءتىلىن تاباتىن, باتا بەرگەندە تىلىنەن بال تامىزاتىن, سول بەتىمەن جۇرگەن جەرىندە, تۇرعان ورنىندا بارىمىزگە ۇلگى كورسەتەتىن. الەكەڭدى جۋرناليست رەتىندە ايتپاي-اق قويايىن. ادام رەتىندە, ازامات رەتىندە, ۇستاز رەتىندە, اكە رەتىندە نارىنقول اۋدانىنداعى ەكى ادامنىڭ ەڭبەگى سىڭسە بىرەۋى, بىرەۋىنىڭ ەڭبەگى سىڭسە سونىڭ ءوزى الەكەڭ بولاتىن, – دەدى داۋلەت اعا جەلدىكباەۆ.
راسىمەن دە اۋدانىمىز رايىمبەك بابانىڭ اتىمەن اتالادى. اۋداندىق گازەتىمىزدى ء«حانتاڭىرى» دەيمىز. سونداي-اق ەل سۇيىنەر رايىمبەك باتىرعا ارنالعان ەسكەرتكىشىمىز بوي كوتەردى. وسى ءۇش جۇمىستىڭ ۇشەۋىنىڭ دە باسىندا الەكەڭ تۇر. ونىڭ يدەياسىن گازەت ارقىلى دا ۇسىنىپ, بىلايشا دا حالىققا ناسيحات ايتىپ دەگەنىنە جەتكەن ءوزى بولاتىن.
جەتىسۋ وڭىرىنە بەلگىلى توققوجا ەستەنوۆ مىرزانىڭ قارجىلاي دەمەۋشىلىگىمەن جارىق كورگەن كىتاپتى باستان-اياق قولعا الىپ, ءالنۇر اتانىڭ شاكىرتتەرى بۇگىندە بەلدى جۋرناليستەر, ءبىر-ءبىر گازەت-جۋرنالدارعا تۇتقا بولىپ وتىرعان قوعام قايراتكەرلەرى, اقىندار مەن جازۋشى ىنىلەرىنىڭ ەسكىرمەيتىن ەستەلىكتەرىن جيناقتاپ, كەلەشەك ۇرپاققا قۇندى دۇنيە قالدىرىپ جاتقان اقىن ايتاقىن ابدىقالدىڭ ەڭبەگى ەلەۋلى.
سونىمەن كىتاپتىڭ تۇساۋى كەسىلدى. ءالنۇر قاريانىڭ سۇيىكتى نەمەرەسى, ومىردەن وزعان التاي دەگەن بالاسىنىڭ ۇلى ايبەككە ساحنا تورىندە كىتاپتىڭ ءبىر پاراسى سىي ەتىپ تارتىلدى. سودان سوڭ قالعان زالدا وتىرعان اۋىل ازاماتتارىنا تاراتىلىپ, قولدان-قولعا ءوتتى. جاقسىنىڭ شاراپاتىن كورگەن قالامگەردىڭ نەمەرەسى قولىنداعى كىتابىن اۋىلداس اعا-اپكەلەرىنە, ۇستازدارىنا, تۋعان-تۋىستارىنا ۇلەستىرىپ, كوپشىلىك قاۋىمنىڭ باتاسىن الدى.
سەرىكجان مۋراسيلوۆ
الماتى وبلىسى, رايىمبەك اۋدانى, نارىنقول اۋىلى