اقتوبە ايماعىندا «ەلەكتروندى وتىنىشتەر» اتتى قاناتقاقتى جوبا قولعا الىندى. بۇل باستاما بۇل باستاما «تسيفرلىق قازاقستان» مەملەكەتتىك باعدارلاماسىنا ارقا سۇيەيدى. ونىڭ باستى ماقساتى ازاماتتاردىڭ مەملەكەتتىك ورگاندارعا ءوتىنىش جازۋىن جەڭىلدەتۋ. وسى ارقىلى كەز-كەلگەن ادام قاجەتتى ورگانعا اناۋلى مينۋتتاردىڭ ىشىندە ءوتىنىش جولداپ, وعان تەز جاۋاپ الا الادى.
مۇنىڭ ءوزى قاراپايىم تۇرعىندار مەن انشەيىندە قول جەتپەستەي بولىپ كورىنەتىن جوعارى مەملەكەتتىك ورگانداردىڭ اراسىن جاقىنداتا تۇسەدى. ءتىپتى تىكەلەي بايلانىستىرادى. قر باس پروكۋراتۋراسىنىڭ باستاماسى بويىنشا تۇساۋى كەسىلگەن قاناتقاقتى جوبا رەسپۋبليكا وبلىستارى اراسىندا تۇڭعىش رەت اقتوبە وبلىسىندا ىسكە قوسىلعان. بۇل ءۇشىن وزگە ەمەس, ناقتى وسى ءوڭىر نەلىكتەن تاڭدالعان؟
قر باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتى توراعاسىنىڭ ورىنباسارى باقىت ابىشەۆتىڭ ايتۋىنشا اقتوبەدە «تسيفرلىق قازاقستان» باعدارلاماسى بريىنشا جۇرگىزىلىپ جاتقان جۇمىستاردىڭ دەڭگەيى جوعارى. بۇل ءوز كەزەگىندە «ەلەكتروندى وتىنىشتەر» جوباسىن جۇزەگە اسىرۋعا باستى نەگىز قالايدى. وبلىس ورتالىعىنداعى حالىقتىق كەڭسە قىزمەتى دە ونى جۇرگىزۋگە ەلەۋلى سەپتىگىن تيگىزبەك. سوندىقتان دا رەسپۋبليكا ۇكىمەتى قاناتقاقتى جوبانى اقتوبەدەن باستاۋ جونىندە شەشىم الىپتى.
ازاماتتاردىڭ مەملەكەتتىك ورگاندارعا جازعان وتىنىشتەرى قوعامنىڭ تامىر سوعىسىن انىقتايتىن بارومەتر ىسپەتتەس. ويتكەنى تۇرعىندار مەملەكەتتى باسقارۋعا وسىنداي ەلەكتروندىق تۇردەگى وتىنىشتەرى مەن ۇسىنىستارى ارقىلى قاتىسا الادى. اتالعان جوبانى ودان ءارى جەتىلدىرۋدىڭ قاجەتتىلىگى دە وسىندا. تاعى ءبىر ءتۇيىندى ماسەلە: ازاماتتار العاشقىدا ءوز وتىنىشتەرىن قاي ورگاننىڭ اتىنا جولداۋىن ءدال بىلمەۋى دە مۇمكىن.پرەزيدەنت اكىمشىلىگىنە مە, جوق الدە ۇكىمەت پەن سالالىق مينيسترلىكتەرگە مە؟ نەمەسە «نۇر وتان» پارتياسى اتىنا ما؟ سوندىقتان دا ولاردىڭ ەلەكتروندى وتىنىشتەرى وسى ماسەلەلەرمەن ناقتى تۇردە اينالىساتىن ورگاندارعا كەلىپ ءتۇسۋى وڭتايلى دەپ تانىلدى. جوبا حالىقتىق كەڭسە, ءموبيلدى قوسىمشا, «كازپوشتا» بولىمشەلەرى جانە حالىققا قىزمەت كورسەتۋ ورتالىقتارى ارقىلى جۇرگىزىلەدى. قاناتقاقتى جوبانىڭ ءپروتوتيپىن قر باس پروكۋراتۋراسى مەن «زەردە حولدينگى» ۇلتتىق كومپانياسى بىرلەسىپ ازىرلەدى دەيدى باس پروكۋراتۋرا وكىلى. ءوز باستاۋىن اقتوبەدەن العان جارقىن جوبا تامىز ايىندا ەلىمىزدەگى ءۇشىنشى مەگوپوليس شىمكەنتتە, قىركۇيەكتە جاڭا وبلىس ورتالىعى تۇركىستاندا, قازان ايىندا استانا قالاسىندا ەنگىزىلمەك. ال 2020 جىلى «ەلەكتروندى وتىنىشتەر» جۇيەسى تۇتاستاي ەل اۋماعىن قامتىماق. مۇنداي جاعدايدا بەرىلگەن وتىنىشتەرگە جىلدام جاۋاپ الۋ تۇتقالارى ەنگىزىلگەنى ەۋروپالىق جانە الەمدىك ستاندارتتارعا تولىقتاي سايكەس كەلەدى. سەبەبى «ەلەكتروندى وتىنىشتەر» جاعدايىندا كەڭسەلىك سىرعىتپا جاۋاپتار بولمايتىنى ايتپاسا دا تۇسىنىكتى. ەكىنشى جاعدايدا جاڭا جۇيە قاي سالا بويىنشا تۇرعىنداردىڭ وتىنىشتەرى كوبىرەك كەلۋىنە وراي ءتيىستى ساراپتامالار جاساۋعا سەپتىگىن تيگىزبەك.
ءدال قازىرگى كۇنى اقتوبەدە قاناتقاقتى جوبا ءوز قىزمەتىن «حالىقتىق كەڭسەنىڭ» كومەگى ارقىلى باستاپ وتىر. مۇنداعى جۇمىس ىستەۋ قاعيداتتارى قانداي دەگەنگە كەلسەك, بۇل جەردە وتىنىشتەردى قابىلداۋدىڭ باستى قوسىنى جۇمىس ىستەيدى. ءدال وسى جەردە اقتوبە قالاسى اكىمدىگىنىڭ جاۋاپتى قىزمەتكەرلەرى ازاماتتاردىڭ وتىنىشتەرىن قابىلداۋ مەن ونى ءتيىستى جوعارى مەملەكەتتىك ورگاندارعا جىبەرۋدىڭ جولدارى مەن تارتىپتەرىن تۇسىندىرەدى. بۇل ارينە العاشقى قادامدار ەكەنى بەلگىلى. كەيىن تۇرعىندار بۇل ءىستىڭ بۇگە-شەگەسىنە قانىققاننان كەيىن «الەۋمەتتىك وتىنىشتەردى»دەربەس وزدەرى جولداي بەرمەك.
تەمىر قۇسايىن,
«ەگەمەن قازاقستان»
اقتوبە