كەشە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە مادەنيەت مينيسترلىگى ءتىل كوميتەتىنىڭ ۇيىمداستىرۋىمەن ەل تاۋەلسىزدىگىنىڭ 20 جىلدىعىنا ارنالعان «مەملەكەتتىك ءتىل – ەل بىرلىگىنىڭ باستى فاكتورى» اتتى حالىقارالىق عىلىمي-تاجىريبەلىك كونفەرەنتسيا بولىپ ءوتتى.
باسقوسۋدا العاشقى باياندامانى مادەنيەت ۆيتسە-ءمينيسترى عازيز تەلەباەۆ جاساپ, جيىلعان جۇرتشىلىقتى الداعى كەلە جاتقان ءتاۋ ەتەر تاۋەلسىزدىگىمىزدىڭ 20 جىلدىق ايتۋلى مەرەكەسىمەن قۇتتىقتادى. جيىندا حالىقارالىق «قازاق ءتىلى» قوعامىنىڭ پرەزيدەنتى, اكادەميك ومىرزاق ايتباي ۇلى, قوعام قايراتكەرى ورازالى سابدەن, «مەملەكەتتىك ءتىل» قوزعالىسى توراعاسىنىڭ ءبىرىنشى ورىنباسارى سماعۇل ەلۋباي, قىرعىز-تۇرىك ۋنيۆەرسيتەتىنىڭ پروفەسسورى ق.قوڭقوباەۆ جانە مارمارا (تۇركيا) ۋنيۆەرسيتەتىنىڭ پروفەسسورى م.كاچالىن مەملەكەتتىك ءتىلدىڭ بولاشاعى تۋرالى كەڭىنەن ءسوز قوزعادى. سونىمەن بىرگە كونفەرەنتسياعا پرەزيدەنت اكىمشىلىگى ىشكى ساياسات ءبولىمى مەڭگەرۋشىسىنىڭ ورىنباسارى الىبەك اسقاروۆ تا ارنايى كەلىپ قاتىستى.
«مەملەكەتتىك ءتىل – بارشا قازاقستاندىقتاردى بىرىكتىرەتىن نەگىزگى فاكتور رەتىندە تاۋەلسىزدىكتىڭ باستى بەلگىسى ءارى رۋحاني بايلىعى. سوندىقتان دا ەل تاۋەلسىزدىگىنىڭ 20 جىلدىعى اياسىندا ءوتىپ جاتقان بۇگىنگى كونفەرەنتسيانىڭ ماڭىزى وتە زور. ول ەلىمىزدەگى مەملەكەتتىك ءتىلدىڭ دامۋىنا تالداۋ جاساۋ مەن ونىڭ قولدانىس اياسىنىڭ كەڭەيە تۇسۋىنە ىقپال ەتەر تىڭ ۇسىنىستار جاساۋعا مۇمكىندىك بەرەدى», – دەدى شارانى ۇيىمداستىرۋشىلار.
كونفەرەنتسيا اياسىندا مادەنيەت مينيسترلىگى ءتىل كوميتەتىنىڭ تاپسىرىسى بويىنشا «جازۋشى», «ارۋنا LTD», «ولكە», «ءداۋىر», «اۋدارما» باسپالارى مەن «قازاق ەنتسيكلوپەدياسى» جشس بيىلعى جىلى شىعارىلعان كىتاپ ونىمدەرىنەن كورمە ۇيىمداستىردى. وندا 15 تومدىق «قازاق ادەبي ءتىلىنىڭ ءسوزدىگى», «الەم بالالار ادەبيەتىنىڭ ءىنجۋ-مارجاندارى», «الەمدىك كلاسسيكا», «مەن وقىعاندى ۇناتامىن», «ەرتەگىلەر ەلىندە», «ەنتسيكلوپەديالىق انىقتامالىقتار» توپتامالارى جانە مەكتەپكە دەيىنگى بالالارعا ارنالعان قازاق ادەبيەتىنىڭ ەڭ ۇزدىك شىعارمالارىنان اۋديوكىتاپتار قويىلعان.
ءابدىراحمان قىدىربەك.