تۇركيانىڭ جوعارى سايلاۋ كوميسسياسى ەلدەگى پرەزيدەنتتىك جانە پارلامەنتتىك سايلاۋدىڭ العاشقى مالىمەتتەرىن جاريالادى. قازىرگە دەيىن داۋىستاردىڭ 40 پايىزعا جۋىعى سانالعان.
Hurriyetdailynews.com سايتى تاراتقان مالىمەتكە سۇيەنسەك, سانالعان داۋىستاردىڭ 56,9 پايىزى قازىرگى پرەزيدەنت رەدجەپ تايىپ ەردوعانعا بەرىلگەن. ەكىنشى ورىندا مۋحاررەم ينجە تۇر. وعان ەلەكتوراتتاردىڭ 28,4 پايىزى داۋىس بەرگەن كورىنەدى.
ال پارلامەنتتىك سايلاۋ بويىنشا ادىلەت جانە دامۋ پارتياسى وق بويى وزىپ تۇر. وعان 48,1 پايىز ادام داۋىس بەرگەن. بۇدان كەيىنگى ورىنداعى مەملەكەتتىك حالىق پارتياسىن 18,6 پايىز ەلەكتورات تاڭداعان ەكەن.
جالپى, تۇركيادا 60 ميلليونعا جۋىق ەلەكتورات بار. بيىلعى سايلاۋعا سونىڭ 87,1 پايىزى قاتىسقان.
ەل اۋماعىنداعى سايلاۋ ۋچاسكەلەرى جەكسەنبى كۇنى تاڭعى ساعات سەگىزدە تۇگەل اشىلدى, ال شەتەلدەگى تۇركيا ازاماتتارى 19 ماۋسىم كۇنى داۋىس بەرىپ قويعان.
داۋىس بەرۋ تۇركيا ۋاقىتىمەن كەشكى ساعات 17.00-دە (استانا ۋاقىتىمەن 20.00-دە) اياقتالدى. سايلاۋدىڭ ناقتى قورىتىندىسى جەرگىلىكتى ۋاقىتپەن تۇنگى ساعات 23.00-دە بەلگىلى بولادى دەپ كۇتىلۋدە.
ايتا كەتۋ كەرەك, سايلاۋ ناتيجەسىندە پرەزيدەنتتىك سايلاۋدىڭ ەكىنشى تۋرى ءوتۋى مۇمكىن. ساراپشىلار قازىرگى ۇمىتكەرلەر ىشىندە وپپوزيتسيا وكىلى, حالىقتىق رەسپۋبليكالىق پارتيا مۇشەسى مۇحاررەم يندجە رەجەپ تايىپ ەردوعانمەن بىرگە ەكىنشى تۋرعا ءوتۋى مۇمكىن ەكەنىن, ولاي بولعان جاعدايدا, سايلاۋدىڭ ەكىنشى كەزەڭى 8 شىلدە كۇنى وتەتىنى بولجانىپ وتىر.