كەشە استانادا «سامۇرىق- قازىنا» ۇاق» اق باسشىسى ت.ق ۇلىباەۆ پەن Deutsche Bank AG ورتالىق جانە شىعىس ەۋروپا بويىنشا اتقارۋشى ديرەكتورى پ.ءتيلستىڭ تەڭ توراعالىعىمەن ارەكەت جاسايتىن ستراتەگيالىق ىنتىماقتاستىق ءجونىندەگى قازاقستان-گەرمانيا ىسكەرلىك كەڭەسىنىڭ ءۇشىنشى وتىرىسى بولىپ ءوتتى. وندا ينۆەستيتسيالار مەن ولاردى دامىتۋ سالاسىنداعى وزەكتى ىنتىماقتاستىق ءماسەلەلەرى تالقىلاندى.
ۇلتتىق ەكونوميكانى ويداعىداي دامىتۋ ءوندىرىستى ءارتاراپتاندىرۋعا, يننوۆاتسيالاردى ەنگىزۋگە جانە ءبىر مەزگىلدە قورشاعان ورتانى قورعاۋدىڭ قاتاڭ ستاندارتتارىن ساقتاۋعا تىعىز بايلانىستى. گەرمانيادا بار «تومەن كومىرسۋتەكتى جاسىل ەكونوميكانى» ەنگىزۋ مەن ەكونوميكالىق پروبلەمالاردى شەشۋ, سونىمەن قاتار, قالدىقتاردى كەشەندى تۇردە وڭدەۋ ءتاجىريبەسىنە قازاقستان دا ءمۇددەلى. وسىنى ەسكەرە وتىرىپ, «سامۇرىق-قازىنا» ۇاق» اق مەتاللۋرگيا, حيميا جانە فارماتسەۆتيكا, كولىك جانە تەلەكوممۋنيكاتسيالار, ينجينيرينگ جانە ماشينە جاساۋ سەكتورلارىندا ىنتىماقتاستىققا گەرمانيالىق كومپانيالاردى شاقىرۋدا.
«بىرلەسكەن حيميا كومپانياسى» جشس باسقارما توراعاسى ءداۋرەن ەردەباي ءوز سوزىندە ءدۇنيەجۇزىلىك ۇلەسى 6 پايىز بولاتىن گەرمانيا حيميا ونەركاسىبىنىڭ الەمدىك كوشباسشى بولىپ تابىلاتىندىعىن اتاپ ءوتتى. بۇل رەتتە ەلىمىز تاراپى نەمىس حيميا يندۋسترياسىن دامىتۋ مەن تەحنيكالىق پاكەتتەرىن سالۋ ءتاجىريبەسىنە مۇددەلى. وسى ورايدا د.ەردەباي كونسالتينگ, پەرسونالدى وقىتۋ جانە بىرلەسكەن جوبالاردى قۇرۋ سالاسىندا نەمىستەر تاراپىنان قازاقستاندىق كومپانيالارمەن ىقتيمال ىنتىماقتاستىعىن كورىپ وتىرعانىن دا تىلگە تيەك ەتتى.
سونداي-اق ءوز كەزەگىندە «سيمەنس ورتالىق ازيا» جشس پرەزيدەنتى كاي تسۆينگەنبەرگەر قازاقستاندا جىلدام ءوسىپ كەلە جاتقان ەنەرگيا تۇتىنىسىنا نازار اۋداردى. ونىڭ دەرەكتەرى بويىنشا جىل سايىنعى ءوسىم 5-6 پايىزدى قۇرايدى ەكەن. ك.تسۆينگەنبەرگەر قازاقستاننىڭ ەنەرگيا ينفراقۇرىلىمىنا يننوۆاتسيالار مەن ينۆەستيتسيالار قاجەت دەپ سانايدى. ول ەلەكتر ستانسالارىنىڭ 65 پايىز جابدىعى جيىرما جىلدان استام, ال 31 پايىزى وتىز جىلدان استام ۋاقىت قولدانىلىپ كەلە جاتقانىنا توقتالدى.
باسقوسۋ بارىسىندا يندۋستريا جانە جاڭا تەحنولوگيالار ۆيتسە-ءمينيسترى البەرت راۋ, گەرمانيا ەكونوميكالىق كلۋبىنىڭ باسشىسى, BASF AG كومپانياسىنىڭ يننوۆاتسيالار ءجونىندەگى باسقارۋشى ديرەكتورى ف.كريۋكل, «سامۇرىق-قازىنا» ۇاق» اق باسقارۋشى ديرەكتورى پ.بحامرە جانە «اتامەكەن» قۇەپ ءتوراعاسى ا.مىرزاحمەتوۆ ءوزارا پايدالى ىنتىماقتاستىقتىڭ ىقتيمال باعىتتارى جايىندا اڭگىمەلەدى.
ءابدىراحمان قىدىربەك.