15 ناۋرىزدا وتەتىن رەسپۋبليكالىق رەفەرەندۋم قارساڭىندا شىعىس جاستارى ەل تاعدىرى ءۇشىن ماڭىزدى قادامعا ءۇن قوستى. ولار ءۇشىن بولاشاق – الىس كوكجيەك ەمەس, بۇگىنگى تاڭداۋدان باستالاتىن ناقتى جاۋاپكەرشىلىك. ويتكەنى مەملەكەت ەرتەڭى ءار ازاماتتىڭ سانالى شەشىمى مەن ازاماتتىق ۇستانىمىنا بايلانىستى ايقىندالادى, دەپ حابارلايدى Egemen.kz.
جاس بۋىن وكىلدەرىنىڭ ايتۋىنشا, رەفەرەندۋم – ءۇنسىز قالاتىن ءسات ەمەس, كەرىسىنشە ءوز كوزقاراسىڭدى اشىق ءبىلدىرىپ, ەلدىڭ دامۋ باعىتىنا ۇلەس قوساتىن مۇمكىندىك.
«تاعدىر تارازىسى تەك بيىك مىنبەرلەردە عانا شەشىلمەيدى. بارلىعى سايلاۋ ۋچاسكەسىنە كەلىپ, ءوز تاڭداۋىن جاساعان ءار ازاماتتىڭ قادامىنان باستالادى», دەيدى باستاماشىل توپ وكىلدەرى.
ايدوس ادىلبەك ۇلى اتاپ وتكەندەي, جاستاردىڭ بەلسەندى ازاماتتىق ۇستانىمى – ەلدىڭ تۇراقتى دامۋىنىڭ بەرىك نەگىزى.
«جاس ۇرپاق سانالى تاڭداۋ جاساعاندا, ولار تەك ءوز بولاشاعىن عانا ەمەس, تۇتاس مەملەكەتتىڭ كەلەشەگىن ايقىندايدى», دەيدى ا.ادىلبەك ۇلى.
پرەزيدەنت: اتا زاڭىمىزعا قاتىستى تۇپكىلىكتى شەشىم جالپىۇلتتىق رەفەرەندۋمدا قابىلدانادى
شىعىس جاستارى بۇل ۇندەۋدى مىندەتتەۋ رەتىندە ەمەس, سانالى ازاماتتىڭ ەل الدىنداعى پارىزى رەتىندە قابىلداۋعا شاقىرادى. سەبەبى ازاماتتىق بەلسەندىلىك – زاڭمەن بەرىلگەن قۇقىقتى پايدالانۋ عانا ەمەس, سول قۇقىق ارقىلى قوعام دامۋىنا ىقپال ەتۋ.
«بولاشاق – سىرتتاي باقىلاۋشىلاردىڭ ەمەس, ارەكەت ەتەتىن ازاماتتاردىڭ قولىندا» دەگەن ۇستانىم بۇگىنگى بۋىننىڭ ورتاق ۇرانىنا اينالدى. سوندىقتان 15 ناۋرىز – كۇنتىزبەدەگى جاي عانا داتا ەمەس, ەل تاعدىرىنا بەيجاي قارامايتىن جانداردىڭ تاڭداۋى سىنالاتىن كۇن.
ءار داۋىس – جاۋاپكەرشىلىك. ءار تاڭداۋ – تاريحتىڭ ءبىر بولشەگى. ال تاريحتى ءوز تاعدىرىنا نەمقۇرايلى قارامايتىن حالىق جاسايدى», دەلىنگەن حابارلامادا.
رەفەرەندۋمنىڭ قاشان وتەتىنى بەلگىلى بولدى