«نازارلارىڭىزعا ۇسىنىلىپ وتىرعان كىتاپ – قازاقستان سۋرەتشىلەرىنىڭ ءتاۋەلسىزدىگىمىزدىڭ 20 جىلدىق مەرەيتويىنا تارتۋى. مۇندا ۇسىنىلعان كارتينالار – وسى جىلدارى جازىلعان شىعارمالاردىڭ ءبىر پاراسى عانا. تەڭىزدىڭ ءدامىن تامشىدان دا بىلۋگە بولاتىنىنداي, ازات ەلدىڭ ەركىن ونەرپازدارىنىڭ ەڭبەگىن قالىڭ كورەرمەن ءوزى باعالاي جاتار». «جۋرنال «Made in Kazakhstan» جشس» وسى كۇندەردە جارىققا شىعارعان « ۇلى دالا ءمانەرى» اتتى البومعا جازىلعان العىسوزىنىڭ سوڭىندا قازاقستان سۋرەتشىلەر وداعى باسقارماسىنىڭ توراعاسى بايتۇرسىن ومىربەكوۆ وسىلاي دەيدى.
ءيا, بۇل البوم – ازات ەلدىڭ ەركىن ونەرپازدارىنىڭ تورقالى تويعا تاماشا تارتۋى. 200 بەتتىك كولەمدى كىتاپ-البومدا قازاقستان سۋرەتشىلەرىنىڭ جاڭا زاماندا جاڭاشا جازىلعان تۋىندىلارى توپتاستىرىلعان. مۇنداعى شىعارمالارعا, اننوتاتسيادا ايتىلعانىنداي, ەركىندىكتى اڭساعان ۇلت تۇلعالارىنىڭ ارمان-اڭسارى, ىنتىماق پەن تاتۋلىقتى مۇرات تۇتقان بۇقارا حالىق بەينەسى, ءومىردىڭ وزەگى – ماحاببات پەن سۇيىسپەنشىلىك ارقاۋ بولعان. البومداعى كارتينالاردىڭ دەڭگەيى قازاقستان بەينەلەۋ ونەرىنىڭ تاۋەلسىزدىك جىلدارىندا كەمەلدىك كەزەڭىنە اياق باسقانىن انىق دالەلدەيدى. كىتاپتاعى: «قازاقستان سۋرەتشىلەرى بۇگىنگى تاڭدا ءوز ەڭبەكتەرىن ەمىن-ەركىن دۇنيەنىڭ قاي تۇكپىرى بولسا دا اپارىپ كورسەتىپ ءجۇر. ءسويتىپ, قازاق ەلىنىڭ الۋان ءتۇرلى تابيعاتىن, ونىڭ ادامدارى مەن ادەت-عۇرپىن تانىستىرىپ جاتىر. وسى ورايدا, شەتەل اسقان سۋرەتشىلەردىڭ شىعارماشىلىعى ەۋروپامەن تەرەزەسى تەڭ بە دەگەن سۇراققا مىسال كەلتىرەيىك. ەربولات تولەپباي 2004 جىلى پاريج قالاسىندا حح عاسىردىڭ ەڭ ايگىلى سۋرەتشىسى سالۆادور دالي شىعارمالارىمەن بىرگە, ءوز ەڭبەكتەرىنىڭ كورمەسىن وتكىزدى. بۇل كورمە ءبىز ءۇشىن ونەردەگى قايتالانباس ساتتەردىڭ ءبىرى بولدى» دەگەن جولدار وسى ويدىڭ ايقىن ايعاعى.
«ەگەمەن-اقپارات».