جوعارى سوت كەڭەسىنىڭ جانىنداعى بىلىكتىلىك كوميسسياسى سۋديالىققا كانديداتتاردان ولاردىڭ ءبىلىم دەڭگەيىن ايقىنداۋ ءۇشىن بىلىكتىلىك ەمتيحانىن قابىلدادى. كوميسسيانىڭ وتىرىسىنا بايقاۋشىلار رەتىندە «نۇر وتان» حدپ جانىنداعى جەمقورلىقپەن كۇرەس جونىندەگى رەسپۋبليكالىق قوعامدىق كەڭەستىڭ مۇشەلەرى – پارلامەنت سەناتىنىڭ دەپۋتاتى ي. ءامىروۆ جانە «نۇر وتان» حدپ پارلامەنتاريزم ينستيتۋتى سىبايلاس جەمقورلىققا قارسى عىلىمي-زەرتتەۋ ورتالىعىنىڭ جەتەكشىسى ب.ءاشىتوۆ قاتىستى.
كوميسسيانىڭ رەگلامەنتىنە سايكەس بىلىكتىلىك ەمتيحانىن تاپسىرۋ ەكى كەزەڭگە ءبولىنىپ, زاڭنامانى بىلۋگە كومپيۋتەرلىك تەستىلەۋ جانە ەمتيحان بيلەتتەرى بويىنشا ۇمىتكەردىڭ ءبىلىمىن تەكسەرۋدەن تۇردى. زاڭنامانى بىلۋگە ارنالعان تەست 100 سۇراقتى قۇرادى. وعان 90 مينۋت ۋاقىت ءبولىندى. ەمتيحان بيلەتىندە ءتورت سۇراق بار. تەستىلەۋ كەزىندە 70 جانە ودان دا كوپ بالل جيناعان ادام زاڭنامانى بىلۋگە ارنالعان كومپيۋتەرلىك تەستىنى تاپسىردى دەپ ەسەپتەلەدى. ول ەكىنشى كەزەڭگە جىبەرىلەدى. ەمتيحان بيلەتتەرى بويىنشا ۇمىتكەردىڭ ءبىلىمىن تەكسەرۋ كەزىندە كوميسسيانىڭ ءاربىر مۇشەسى ءار سۇراق بويىنشا جەكە-جەكە بەس بالدىق جۇيەمەن باعا قويادى, سودان كەيىن ورتاشا اريفمەتيكالىق باعاسى شىعارىلادى.
بىلىكتىلىك ەمتيحانىن تاپسىرۋ ءۇشىن ايماقتاردان 162 كانديدات شاقىرىلدى, 90 كانديدات قاتىستى. كومپيۋتەرلىك تەستىنى تاپسىرۋدىڭ ءبىرىنشى كەزەڭىنەن 51 كانديدات ءوتتى. ولاردىڭ ىشىنەن 20 كانديدات ەكىنشى كەزەڭگە وتە المادى. 90 كانديداتتىڭ ىشىنەن سۋديا لاۋازىمىنا بىلىكتىلىك ەمتيحانىن 31 ۇمىتكەر تاپسىردى. بىلىكتىلىك ەمتيحانىن تاپسىرۋ ناتيجەسى التى جىلعا جارايدى, ال ەمتيحانداردى تاپسىرا الماعان ادام ولاردى قايتا تاپسىرۋعا ءبىر جىلدان سوڭ جىبەرىلەدى.
«ەگەمەن-اقپارات».