بۇگىن استانادا حالىقارالىق تۇركى اكادەمياسىنىڭ (TWESCO) ۇيىمداستىرۋىمەن « ۇلى دالا» III گۋمانيتارلىق عىلىمدار فورۋمى ءوز جۇمىسىن باستادى.
يگى داستۇرگە اينالعان القالى جيىننىڭ اشىلۋ سالتاناتىنا قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا مەن تۇركى كەڭەسىنىڭ قۇرۋشى باس xاتشىسى حاليل اقىنجى, تۇركيا پرەمەر-ءمينيسترىنىڭ باس كەڭەسشىسى, پروفەسسور ايگۇن اتتار, تۇركيا يۋنەسكو ۇلتتىق كوميسسياسىنىڭ توراعاسى, پروفەسسور ءوجال وعىز, تۇرىك ءتىل قۇرىلىمىنىڭ باسشىسى, پروفەسسور مۇستافا كاچالين, تۇركى كەڭەسى باس xاتشىسىنىڭ ورىنباسارى ومەر قوجامان, تۇركيا جۋرناليستەر فەدەراتسياسىنىڭ باسشىسى مەxمەت الي ديم سىندى حالىقارالىق ۇيىم باسشىلارى مەن وكىلدەرى قاتىسىپ جاتىر.
بيىلعى فورۋم استانا قالاسىنىڭ 20 جىلدىق مەرەكەسى مەن تۇركىستاننىڭ اقيىق اقىنى ماعجاننىڭ 125 جىلدىعىنا, شىڭعىس ايتماتوۆتىڭ 90 جىلدىعىنا, ازەربايجان حالىق رەسپۋبليكاسىنىڭ 100 جىلدىعىنا ارنالىپ وتىر. جيىننىڭ نەگىزگى ماقساتى - ۇلى دالا قۇندىلىقتارىنىڭ ادامزات وركەنيەتى دامۋىنداعى ورنى مەن ماڭىزىن پايىمداۋ. سونىمەن قاتار قازىرگى زامانعى گۋمانيتارلىق عىلىمداردىڭ دامۋ ۇردىستەرىن سارالاي وتىرىپ, تۇركى الەمىن زەرتتەۋ سالاسىنداعى تاجىريبەنى جيناقتاپ, يدەيالارمەن الماسۋ جانە ىرگەلى باعىتتاردى انىقتاۋ كوزدەلگەن.
اشىلۋ سالتاناتىن قۇتتىقتاۋ سوزىمەن اشقان قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا الەم وركەنيەتىندەگى تۇركى مادەني مۇراسىن ايشىقتاۋدا الەم عالىمدارى باس قوسقان فورۋمدا كوتەرىلەتىن مىندەتتەر مەن تاقىرىپتار اۋقىمدىلىعى تۋراسىندا ايتىپ ءوتتى.
«استانادا الەمنىڭ جيىرماعا جۋىق ەلىنەن كەلگەن عالىمدار باس قوسىپ, وسىمەن ءۇشىنشى رەت ۇيىمداستىرىلىپ وتىرعان « ۇلى دالا» گۋمانيتارلىق عىلىمي فورۋمىنا قوش كەلدىڭىزدەر. باس قالامىزدىڭ عىلىمي جانە ينتەللەكتۋالدىق ورتالىق رەتىندە يگى ىقپالىن تيگىزىپ وتىرعان عىلىمي فورۋم قوردالانعان عىلىمي ماسەلەلەردى شەشۋدە تىڭ كونتسەپتۋالدى شەشىمدەر بەرەتىنىنە سەنىمدىمىن», – دەگەن ول فورۋم جۇمىسىنا ساتتىلىك تىلەدى. «بيىل قازاقستاننىڭ بايتاعى, جاھاندىق مەگاپوليس استانانىڭ 20 جىلدىعى. سونداي-اق مۇسىلمان الەمىندەگى تۇڭعىش زايىرلى مەملەكەت ازەربايجان دەموكراتيالىق مەملەكەتىنىڭ قۇرىلۋى, اقيىق اقىن ماعجان جۇماباي ۇلىنىڭ 125, زاڭعار جازۋشى شىڭعىس ايتماتوۆتىڭ 90 جىلدىعى سىندى مەرەيلى داتالار قامتىلعان ۇلى دالا فورۋمىنا قاتىسۋشى عالىمدار سانى 250 ادامعا جۋىقتاعانى كوڭىل قۋانتادى. « ۇلى دالا» III گۋمانيتارلىق عىلىمدار فورۋمى بۇكىل تۇركى الەمىنىڭ باسىن بىرىكتىرەتىن, اياسى كەڭ, ماعىناسى تەرەڭ كيەلى ۇعىم. ەلباسى نۇرسۇلتان ءابىش ۇلى قازاق حاندىعىنىڭ 550 جىلدىعىنا ارنالعان سالتاناتتى جيىنىندا ء«بىزدىڭ قاسيەتتى جەرىمىزدى ۇلى دالا دەپ, ال بابالارىمىزدى ۇلى دالانىڭ ۇرپاقتارى دەپ اتاعان. ءبىز سولاردىڭ جالعاسىمىز, ءبىز ۇلى دالانىڭ مۇراگەرىمىز» دەپ بەكەر ايتقان جوق. وسى ورايدا اتالعان حلىقارالىق فورۋمدا ادامزات دامۋىنداعى تۇركى الەمىنىڭ ورنى مەن مادەني قۇندىلىقتارى تالقىلانىپ, جاھاندىق جانە ايماقتىق ماڭىزى بار وزەكتى ماسەلەلەر جونىندە ۇسىنىستار جاسالاتىن ينتەللەكتۋالدى سۇحبات الاڭى مارتەبەسىنە يە بولىپ وتىر. سونىمەن قاتار فورۋىم الەمگە تانىمال عالىمدار اراسىنداعى بايلانىستى نىعايتا تۇسەدى دەپ سەنەمىن. قازاقستان پرەزيدەنتى نۇرسۇلتان نازارباەۆتىڭ جاھاندىق ساياساتتاعى تەگەۋرىندى تۇلعاسىن, تۇركى الەمىندەگى جەتەكشىلىك ءرولىن, رۋحاني جاڭعىرۋ جوباسىنداعى يدەيالارىن كەڭىنەن ناسيحاتتاۋ فورۋمنىڭ نەگىزگى مىندەتتى بولىپ سانالادى», دەدى گۇلشارا ابدىقالىقوۆا.
ازەربايجان, قازاقستان, قىرعىزستان,تۇركيا, تۇركىمەنستان, وزبەكستان, تاجىكستان, موڭعوليا, اقش, ۆەنەسۋەلا, رەسەي, باشقۇرتستان (رف), تاتارستان (رف), چۋۆاشيا (رف), ساحا (رف), التاي (رف), گەرمانيا, قىتاي, ماجارستان, پولشا, مولدوۆا مەملەكەتتەرىنەن كەلگەن 200-گە جۋىق عالىم-زەرتتەۋشى مەن ساراپشىلار پانەلدى وتىرىستا مازمۇندى باياندامالار جاساپ, فورۋم اياسىندا حالىقارالىق تۇركى اكادەمياسىنىڭ سوڭعى جىلدارى جارىققا شىعارعان كىتاپتارىنىڭ كورمەسى ۇيىمداستىرىلدى.
ايا ءومىرتاي,
«ەگەمەن قازاقستان»