ءبىزدىڭ ءسوز ەتكەلى وتىرعان ازاماتىمىز دا قارلىعاشتىڭ قاناتىمەن سۋ سەپكەندەي شىعارماشىلىق يەلەرى مەن مۇمكىندىگى شەكتەۋلى جاندارعا كومەك قولىن سوزىپ جۇرگەن, كەيىنگى بۋىنعا ۇلگى بولارداي جانداردىڭ ءبىرى. سونىمەن بىرگە ول مادەني مۇرالارىمىزدىڭ دا جاناشىر قامقورشىسى بولىپ تابىلادى.
ساپار ىسقاقوۆتىڭ نەگىزگى ماماندىعى قۇرىلىس سالاسىنىڭ جوعارعى بىلىكتى مامانى دەسەك, اتالعان سالادا كەڭەستىك كەزەڭدە ۇزاق جىلدار بويى باسشىلىق قىزمەتتەر اتقارادى. ومىردەرەگى وسىلاي دەيدى. ال 1991 جىلدان باستاپ, جەكە كاسىپكەرلىگىمەن اينالىسۋدى باستايدى. «ومار» اتتى شاعىن قۇرىلىس كاسىپورنىن قۇرىپ, 1991-97 جىلدار ارالىعىندا بۇل مەكەمە ارقالىق قالاسى مەن سول كەزدەگى تورعاي وبلىسىنىڭ حالىقتىق-شارۋاشىلىق نىساندارىن سالۋ مەن قايتا جوندەۋدە حالىققا قالتقىسىز قىزمەت كورسەتەدى. 1998 جىلى وتباسىمەن بىرگە ەلىمىزدىڭ جۇرەگى استاناعا قونىس اۋدارىپ, جاس قالانىڭ وركەندەپ-وسۋىنە ءوز ۇلەسىن قوسۋدى ماقسات تۇتادى. مۇندا دا سۇيىكتى كاسىبىنە بەلسەنە كىرىسكەن ول «تىلەپ» اتتى جەكە سەرىكتەستىگىن قۇرىپ, ەلورداداعى تۇرعىندار يگىلىگىنە بىرنەشە ۇيلەردى تارتۋ ەتەدى. ارينە, ءوز كاسىبىنە ادال جاننىڭ ەڭبەگى قاشاندا ەلەنبەي قالماق ەمەس. 2003 جىلى جەنەۆادا (شۆەيتساريا) وتكەن بايقاۋدا حالىقارالىق «التىن مەدالمەن» ماراپاتتالادى. بۇل استاناداعى «اراسان» ساۋىقتىرۋ ورتالىعىنىڭ قۇرىلىسىنا بەرىلگەن باعاتىن. ساپار ىسقاق ۇلى «جىل ادامى, جىل مەتسەناتى» سياقتى ءتۇرلى رەسپۋبليكالىق جانە حالىقارالىق اتاققا يە بولعان.
قايىرىمى مول جاننىڭ قاي كەزدە دە بۇيرەگى ساۋاپتى ىستەرگە بۇراتىنى ايتپاسا دا تۇسىنىكتى. 2003 جىلى «تىلەپ» قايىرىمدىلىق قورىن قۇرىپ, قارتتار مەن ءمۇگەدەكتەرگە كومەك قولىن سوزۋى ازاماتتىعىنىڭ تاعى ءبىر قىرىن اشا تۇسكەندەي. سونىمەن قاتار ول قۇرعان «ءال-فارابي جانە سۇلتان بەيبارىس» قايىرىمدىلىق قورى دا قايتا قالپىنا كەلتىرۋ قۇرىلىس جۇمىستارى مەن رەستاۆراتسيادا كوپ جۇمىستار تىندىردى. سولاردىڭ ءبىرى ءال- فارابي (داماسك قالاسى) كەسەنەسى مەن مەموريالدىق كەشەنىن جانە سۇلتان بەيبارىس (كاير قالاسى) مەشىتىن, سونداي-اق كەسەنەسى, مەدرەسەسى جانە كىتاپحاناسىنا (داماسك قالاسى) جاساعان رەستاۆراتسياسى دەر ەدىك.
ساپار ىسقاق ۇلى جاس دارىندى مۋزىكانتتاردى قولداپ وتىرۋدى دا نازاردان تىس قالدىرعان ەمەس. وعان ءبىرىنشى كەزەكتە ايگىلى قوبىزشى كومپوزيتور تىلەپ اسپانتاي ۇلىنىڭ تىكەلەي ۇرپاعى ەكەندىگى دە سەبەپ بولعان شىعار. قانمەن كەلگەن ونەرگە دەگەن شەكسىز ماحابباتى وعان «بۇلاق كورسەڭ, كوزىن اش» دەگەن حالىق ناقىلىن ءجيى ەسىنە سالاتىنداي. باباسىنان قالعان «باقسى», «اللام جار», «تولعاۋ» كۇيلەرىنە اۆتورلىق قۇقىق الۋىندا مۇراگەرلىك پارىزىن تانىتتى. «باقسى» كۇيى ءبۇگىندە ەلىمىزدىڭ التىن قورىنا ەنگەن. وسى رەتتە مۋزىكا مايتالمانى, ەڭبەك ەرى ەركەعالي راحماديەۆ: «ساپەكەڭنىڭ ونەرسۇيگىش جۇرەگى قىلقوبىز ونەرىن دارىپتەۋدە ايتارلىقتاي ەرەن ەڭبەكتەرىمەن باعالى. ستۋدەنت بالالارعا ارنايى تاعايىنداعان ستيپەنديالارى, قىلقوبىزدان قۇرالعان اتاسى تىلەپ اتىنداعى العاشقى كۆارتەت, قۋات شىلدەباەۆ, بەيبىت دالدەنباەۆ, سەرىك ءابدىنۇروۆ سياقتى تالانتتى-وسكەلەڭ ازاماتتارعا ارنايى جاڭا شىعارمالار جازدىرتىپ, قىلقوبىزدىڭ رەپەرتۋارلارىنىڭ ءورىسىن كەڭەيتكەنى, استانادان قوبىز سارايىنىڭ قۇرىلىسىن باستاۋى, شەتەل كومپوزيتورلارىن شاقىرتىپ وركەستردىڭ سۇيەمەلدەۋىمەن قىلقوبىزعا ارناپ شىعارما جازدىرتۋى, ولاردى انگليا, جاپونيا سياقتى وركەنيەتتى ەلدەردىڭ اتاقتى كونتسەرت زالدارىندا ورىنداتۋى, تەك قىلقوبىزدىڭ ابىرويىن اسپانداتىپ قانا قويماي, بۇكىل قازاق ونەرىنىڭ ابىرويىن ارتتىرعانى», – دەسە, عالىم-جازۋشى, مەملەكەتتىك سىيلىقتىڭ لاۋرەاتى قويشىعارا سالعارا ۇلى: «ساپار – ءمۇمكىندىگىنشە ۇلتتىق ءداستۇردىڭ ۇدەسىنەن شىعۋعا ۇمتىلىپ جۇرگەن ازامات. ول وتكىزىلەتىن بەلگىلى ءبىر ءىس-شارالارعا دەمەۋشىلىك جاساي ما, بولماسا تانىلماي جۇرگەن تالانتتى جاستاردىڭ قابىلەت كوزىن اشىپ, ونەرىنىڭ ءورىس الۋىنا كومەكتەسە مە, نەمەسە ماڭايىنداعى جوق-جىتىك, كەمتارلارعا قول ۇشىن سوزا ما, ءبارىبىر نە ىستەسە دە سونىڭ ءبارىن ءوز ىقىلاسىمەن, ىشكى جان دۇنيەسى قالاۋىنىڭ قاجەتتىلىگىن وتەۋ ءۇشىن جاسايدى», – دەيدى.
ونەرگە جاساعان دەمۋشىلىگىنىڭ ءبىرشاماسى جوعارىدا ايتىلدى. ونىڭ ەلىمىزدىڭ اتىن شىعارۋدا ساياحات سالاسىنا كورسەتكەن دەمەۋشىلىگى ۇشان-تەڭىز. ول كوپتەگەن قازاقستاندىق عىلىمي ەكسپەديتسيالاردىڭ دەمەۋشىسى بولدى. ولار تاياۋ شىعىس, كيپر, موڭعوليا, سولتۇستىك افريكا جانە ەۋروپا ەلدەرىندە ساپارلاعان.
س.ىسقاق ۇلى وتباسىمەن بىرگە الەمنىڭ جۇزدەن استام ەلىن ارالاعان جيھانكەز. ساياحاتشىنىڭ ەرەن ەڭبەگى دەپ 2007 جىلدىڭ 6 جەلتوقسانىندا وڭتۇستىك پوليۋسكە (انتاركتيدا) كوك تۋىمىزدى جەلبىرەتە تىگۋىن ايتساق تا ارتىق ەمەس. بۇل ەلىمىزدەن تىگىلگەن تۇڭعىش تۋ بولاتىن. مۇنى ەلدىڭ ابىرويىن ءار كەز جوعارى بولسىن دەپ ويلاپ جۇرەتىن تىلەۋلەس جاننىڭ وتانىنا دەگەن ەرەكشە سىي-قۇرمەتى دەپ بىلگەن ابزال.
بۇگىندە وتاعاسى سۇيىكتى جارى كۇمىس بەيسەكقىزى ەكەۋى ۇل-قىزدار تاربيەلەپ, ولاردان نەمەرەلەر ءسۇيىپ وتىرعان باقىتتى جاندار. جۇرەگى جومارت جاننىڭ ەندىگى تىلەگى ەل تىنىشتىعى. ەگەمەندىگىمىزدىڭ تۇعىرى بيىك بولىپ, ەلىمىزدىڭ ابىرويىنىڭ اسقاقتاي بەرۋىنە نيەتتەستىگى ونىڭ بىزبەن بولعان اڭگىمەسىندە ءجيى ايتىلىپ وتىردى. الداعى كەلە جاتقان ايتۋلى مەرەكە تاۋەلسىزدىگىمىزدىڭ 20 جىلدىق تورقالى تويى حالقىمىزعا قۇت-بەرەكەسىن الا كەلسىن دەگەن اعالىق تىلەك تە ايتىلماي قالمادى. «مەن قانداي دا ءبىر يگىلىكتى جۇمىستار جاساسام, سول حالقىمنىڭ ىستىق ىقىلاسى مەن ەلىمىزدىڭ تىنىشتىعى ارقاسىندا بولىپ جاتقانىن سەزەمىن. سوندىقتان دا مەن قۇداي قۋات بەرىپ تۇرعاندا ەل ءۇشىن جۇمىستارىمدى جالعاستىرا بەرەمىن», – دەيدى ساپار ىسقاق ۇلى.
ءابدىراحمان قىدىربەك,
استانا.