وسىنداي جالىندى ۇرانمەن وبلىس ورتالىعىنداعى «استانا» مۇز سارايىندا «تاۋەلسىزدىكتىڭ 20 شىڭى – 20 جۇلدىزدى كۇن» جوباسى شەڭبەرىندە «بولاشاق ءوز قولىمىزدا!» اتتى جاستار فورۋمى بولىپ ءوتتى.
تاۋەلسىزدىك قۇرداستارىنا قۇرمەت كورسەتىلدى. سونىمەن بىرگە, ەلىمىزدە قۇرىلعان بىرلەستىكتەر, بالالار مەن جاسوسپىرىمدەردىڭ «جاس ۇلان» ۇيىمىنا العاشقى رەت سالتاناتتى قابىلداۋ ءراسىمى وتكىزىلدى. فورۋمعا وبلىس اكىمى باقىتجان ساعىنتاەۆ قاتىسىپ, جاستارعا تىلەك ءبىلدىردى. مۇز ايدىنى الاڭىنا ەلىمىزدىڭ نامىسىن تالاي بايراقتى باسەكەلەردە ابىرويمەن قورعاپ جۇرگەن سپورتشىلار شىقتى.
بۇدان كەيىن مەرەكەلىك شەرۋدى عىلىم, ءبىلىم, ونەر سالالارىنىڭ ۇزدىكتەرى جالعاستىردى. وبلىس جاستارى, مەكتەپ وقۋشىلارى حالىقارالىق وليمپيادالاردا 17 التىن, 26 كۇمىس, 23 قولا مەدالداردى جەڭىپ الدى. ونەرلى ماريا مۋدرياكتىڭ ورنى بولەك. بۇل رەتتە, جينالعاندار نازارىنا يتاليانىڭ لا سكالا اكادەمياسىنىڭ ستۋدەنتى م.مۋدرياكتىڭ قۇرلىق اسىپ جەتكەن بەينەسالەمدەمەسى تىكەلەي ەفير ارقىلى بەرىلدى. «ءبىز تاۋەلسىز, جاس مەملەكەتىمىزبەن قاشاندا ماقتانۋىمىز قاجەت. ەلىمىزدىڭ جەتىستىكتەرىن كورگەندە بويىمدى تۋعان ەلىمە, جەرىمە دەگەن ەرەكشە قۋانىش سەزىمى بيلەيدى. وسى رەتتە, جاستاردىڭ قاناتىن شىڭداپ, قولداۋ كورسەتىپ, ارمانىمىزدىڭ ورىندالۋىنا مۇمكىندىك جاساپ وتىرعان ەلباسىنا العىسىمدى بىلدىرەمىن. وزىمە ارتىلعان سەنىمدى اقتايمىن. سەبەبى, مەن – قازاقستاندىقپىن!», – دەدى ءوز سالەمدەمەسىندە ماشا.
سونداي-اق, شارا بارىسىندا «ديپلوممەن – اۋىلعا!», «اۋىلدىڭ گۇلدەنۋى – قازاقستاننىڭ گۇلدەنۋى!» سياقتى باعدارلامالاردىڭ ورىندالۋ بارىسى, ستۋدەنتتىك قۇرىلىس جانە جاستار جاساقتارىنىڭ ءۇشىنشى ەڭبەك ماۋسىمىنىڭ قورىتىندىلار شىعارىلدى. «جاسىل ەل» ەڭبەك جاساقتارىنىڭ كومانديرلەرى, بەلسەندىلەرى وبلىس اكىمىنىڭ اتىنان باعالى سىيلىقتارمەن ماراپاتتالدى. ەڭبەك جاساعىنىڭ ۇزدىك ساربازى «نيۆا» اۆتوكولىگىنە يە بولدى. فورۋم سوڭىندا « ۇلىتاۋ», «وردا» توپتارى مەن جەرلەستەرىمىز رينات مالتساگوۆ پەن جانار دوعالوۆا ونەر كورسەتتى.
فاريدا بىقاي,
پاۆلودار.