بيىل رەسەيدە وتەتىن الەم چەمپيوناتىنىڭ باستى فاۆوريتتەرىنىڭ ءبىرى – برازيليا ۇلتتىق قۇراماسى. ءبىر كەزدەرى ءدال وسى تۋرنيردە جۇلدىزداي جارقىراعان پەلە, گاررينچا, روماريو, رونالدو, رونالدينو سەكىلدى نەبىر مارقاسقالاردىڭ ءىزباسارلارى بيىل قانداي جەتىستىككە جەتۋى مۇمكىن؟!
وتكەنگە ازداعان شەگىنىس جاسايىق. برازيليا – الەم چەمپيوناتىندا بەس مارتە (1958, 1962, 1970, 1994, 2002) جەڭىسكە جەتكەن ازىرگە جالعىز كوماندا. وسى جەتىستىگىنىڭ ارقاسىندا بۇل قۇراما «پەنتەكامپەوندەر» دەپ اتالىپ كەتكەن. 1970 جىلى الەم بىرىنشىلىگىندە ءۇشىنشى مارتە جەڭىسكە جەتكەننەن كەيىن چەمپيوندىق كۋبوكتى وزدەرىندە ساقتاپ قالۋ قۇقىعىنا يە بولعان. برازيليانىڭ جەتىستىكتەرىنىڭ تاعى ءبىرى – وسىعان دەيىنگى ءدۇبىرلى دودالاردىڭ بارىنە قاتىسىپ كەلە جاتقان جالعىز قۇراما.
بۇگىنگى برازيليا. برازيليا الەم بىرىنشىلىگىنىڭ ىرىكتەۋ كەزەڭىن وتە ءساتتى ءارى سەنىمدى وتكىزدى. سوڭعى ءتورت تۋر قالعاندا ءدۇبىرلى دوداعا جولداما العان العاشقى كوماندا اتاندى. ارينە بۇل تۇستا رەسەي ۇجىمى ءتۋرنيردى ۇيىمداستىرۋشى ەل رەتىندە بارىنەن بۇرىن تىكەلەي جولداما العانىن ايتا كەتكەن ءجون. نەيمار باستاعان «پەنتەكامپەوندەر» ىرىكتەۋ كەزەڭىنىڭ 18 ويىنىندا 12 مارتە جەڭىسكە جەتىپ, بەسەۋىندە تەڭ تۇسكەن. تەك ءبىر ويىندا عانا قارسىلاسىنا ەسە جىبەرىپ, 41 ۇپايمەن توبىندا كوشباسشى بولدى. ال 2-ورىنعا تابان تىرەگەن ۋرگۋۆاي قۇراماسى ون ۇپايعا ارتتا قالدى.
برازيليا حالقى ءۇشىن فۋتبول ومىرمەن تەڭ. قۇراماسى ءدۇبىرلى جارىستان ولجاسىز كەلسە بەيرەسمي تۇردە قارالى كۇن جاريالايتىن ەل. وتكەن 2014 جىلى دودادا گەرمانيادان 1:7 ەسەبىمەن ويسىراي جەڭىلگەندەگى ستاديونداعى جانكۇيەر قاۋىمنىڭ كوز جاسى ءالى كۇنگە ەسىمىزدە.
ال بۇل جولعى برازيليا ءتورت جىل بۇرىنعى مۋنديالعا قاتىسقان قۇرامادان وزگەرەك. بۇل ۇجىمنىڭ ناتيجەسى بۇرىنعىداي نەيماردىڭ عانا ويىنىنا بايلانىستى ەمەس. نەيمار جاراقات الىپ قالعان جاعدايدا ۇجىمدى العا سۇيرەيتىن كوۋتينو, جەزۋس, ۆيلليان, فيرمينو سەكىلدى نەبىر ءجالاڭتوس جىگىتتەر بار. نەگىزگى قۇرامدا وينايتىن ويىنشىلارعا قارايتىن بولساق, ارقايسىسى ەۋروپانىڭ الپاۋىت كلۋبتارىندا ونەر كورسەتەدى.
2014 جىلعى قۇراممەن ازداپ سالىستىرىپ كورەيىك. ول كەزدەرى شابۋىل شەبىندە ونەر كورسەتكەن فرەد برازيليانىڭ «فلۋمينەنسە», حالك رەسەيدىڭ «زەنيت» كوماندالارىندا ويناسا, قازىرگى جىگىتتەردىڭ دەڭگەيى مۇلدە بولەك, كارى قۇرلىقتا ۇستەمدىك ورناتىپ وتىرعان «بارسەلونا», «پاري سەن جەرمەن», «مانچەستەر سيتي», «ليۆەرپۋل» سەكىلدى كلۋبتاردىڭ كوشباسشىلارى.
ال باس باپكەرى ادەنور لەوناردو باكشي ء(دۇيىم جۇرتقا تيتە دەگەن اتپەن تانىمال) كەلگەلى قۇرامانىڭ ويىنى وزگەرىپ, جاڭا ءبىر دەڭگەيگە كوتەرىلدى. بۇرىنعى لۋيس فەليپپە سكولاري تۇسىنداعى كوماندانىڭ سەنىمسىز ءارى سۇرەڭسىز ويىنىنان جۇرناق تا قالمادى دەۋگە بولار. تيتە توعىز ويىن قاتارىنان جەڭىسكە جەتىپ, ۇلتتىق قۇراما باپكەرلەرىنىڭ اراسىنداعى رەكوردتى جاڭارتتى. قازىر برازيليا قۇراماسى ءۇشىن جاڭا ءبىر كەزەڭ باستالدى.
وسىنداي ناتيجەلى ويىندارىنىڭ ارقاسىندا برازيليا ءتۋرنيردىڭ باستى فاۆوريتىنە اينالدى. ماسەلەن, ۇلىبريتانيانىڭ Opta ستاتيستيكالىق كومپانياسى برازيليانىڭ جەڭىسىن 14,2 پايىزعا تەڭەستىرىپ وتىر. ال ءتورت جىل بۇرىن ايقىن باسىمدىق كورسەتكەن نەمىستەردىڭ وزىنە 11,4 پايىز عانا بەردى. ۇزدىك ۇشتىكتى مەسسي باستاعان ارگەنتينا 10,9 پايىزبەن تۇيىندەپ تۇر. وسىعان قاراپ-اق تيتە شاكىرتتەرىنىڭ قانشالىقتى الىسقا شاپقالى تۇرعانىن بايقاۋعا بولادى.
ء«وز باسىم برازيليانى ءاچ-2018-ءدىڭ باستى ءفاۆوريتى رەتىندە ەسەپتەيمىن. بۇل كوماندادا تالانتتى ويىنشىلار جەتەرلىك. 2014 جىلعى ماسقارادان كەيىن ەسەلەرىن قايتارۋعا تىرىسادى دەپ ويلايمىن», دەدى 2006 جىلى چەمپيون اتانعان يتالياندىق اندرەا پيرلو.
ازداعان ستاتيستيكالىق مالىمەت كەلتىرەيىك: قۇرامادا وينايتىن فۋتبولشىلاردىڭ ورتاشا جاسى – 28,1 جاس. ەڭ جاس ويىنشىسى – جەزۋس. ال ەڭ ەگدە ويىنشىلارى – جۋان ميراندا, تياگو سيلۆا جانە فەرناندينو. ءبارى 33 جاستا.
برازيليا «ە» توبىنداعى العاشقى ويىنىن 17 ماۋسىم كۇنى شۆەيتسارياعا قارسى وتكىزەدى. ال 22 ماۋسىمدا كوستا ريكامەن كۇش سىناسادى. سوڭعى بولىپ 27 ماۋسىمدا سەربيامەن وينايدى.
برازيليا قۇراماسىنىڭ ءتىزىمى:
• قاقپاشىلار: اليسسون («روما», يتاليا), ەدەرسون موراەس («مانچەستەر سيتي», انگليا), كاسسيو («كورينتيانس», برازيليا);
• قورعاۋشىلار: دانيلو («مانچەستەر سيتي», انگليا), فاگنەر كونسەرۆا («كورينتيانس», برازيليا), مارسەلو («رەال», يسپانيا), فيليپە لۋيس («اتلەتيكو», يسپانيا), تياگو سيلۆا, ماركينوس (ەكەۋى دە – «پاري سەن-جەرمەن», فرانتسيا), ميراندا («ينتەر», يتاليا), پەدرو جەرومەل («گرەميو», برازيليا);
• جارتىلاي قورعاۋشىلار: كازەميرو («رەال», يسپانيا), فەرناندينو («مانچەستەر سيتي», انگليا), پاۋلينو, فيليپپە كوۋتينو (ەكەۋى دە «بارسەلونا», يسپانيا), فرەد («مانچەستەر يۋنايتەد», ۋكراينا), رەناتو اۋگۋستو («بەيتسزين گوان», قىتاي), ۆيلليان («چەلسي», انگليا), دۋگلاس كوستا («يۋۆەنتۋس», يتاليا);
• شابۋىلشىلار: نەيمار («پاري سەن-جەرمەن», فرانتسيا), تايسون («شاحتەر», ۋكراينا), گابريەل جەزۋس («مانچەستەر سيتي», انگليا), روبەرتو فيرمينو («ليۆەرپۋل», انگليا).
ايان ءابدۋالي,
«ەگەمەن قازاقستان»