اتىراۋدا ۇكىمەتتىك ەمەس ۇيىمداردىڭ جۇمىسى تالقىلاندى

اتىراۋدا 600-دەي ۇيىمنىڭ 100-ءى عانا بەلسەندى. بۇل ساندار مەملەكەت پەن ازاماتتىق سەكتوردىڭ ءوزارا بايلانىسىن ءالى دە نىعايتا ءتۇسۋ كەرەك ەكەنىن كورسەتەدى. ءدىن ىستەرى جانە ازاماتتىق قوعام ءمينيسترى دارحان قالەتاەۆ اتىراۋعا جۇمىس ساپارى بارىسىندا وسى ماسەلەگە ەرەكشە ءمان بەردى.

ازاماتتىق ورتالىقتىڭ اتقاراتىن قىزمەتى اۋقىمدى

مينيستر الدىمەن ازا­ماتتىق ورتالىقتىڭ جۇمىسى­مەن تانىستى. ۇكىمەتتىك ەمەس ۇيىمدارعا ادىستەمەلىك كومەك كورسەتىپ, ۇسىنىلعان يدەيالاردى قولداۋعا باعىتتالعان ازا­ماتتىق ورتالىق ەلىمىز بويىنشا العاش رەت اتىراۋدا اشى­لعان ەدى. «ازاماتتىق قوعام ينس­تيتۋتتارىنىڭ قىزمە­تىنە قاتىستى سىن ءجيى ايتىلا­دى. اتىراۋداعى ۇكىمەتتىك ەمەس ۇيىمداردىڭ كوبى توقسا­نىن­­شى جىلدارى وقۋ ورىن­دا­رىنداعى نەمەسە جەكەلەگەن ادامداردىڭ مەرەيتويلىق داتالارىن ۇيىمداستىرۋ ماق­ساتىندا اشىلعان. قوعامدىق ۇيىمداردىڭ ناقتى قانداي جۇمىس اتقاراتىنىن بىرەۋ بىلسە, بىرەۋ بىلمەيدى. شىن مانىندە ولار قوعامدىق ماسەلەگە ءۇن قوسۋ­لارى كەرەك. وسى باعىتتا بىر­قاتار جۇمىستى قولعا الۋ جوس­پارىمىزدا بار», – دەيدى ورتالىق باسشىسى ءامينا جار­دەمقىزى.

ازاماتتىق ورتالىقتىڭ العا قويعان ماقسات-مىندەتتەرىمەن تانىسقان مينيستر: «وڭىردە قانداي اۋقىمدى جۇ­مىس­تار جۇرگىزىلگەنىن كور­دىك. جاقسى جوبالار بار ەكەن. بۇ­گىندە ازاماتتىق قوعام دەپ كوم­مەرتسيالىق ەمەس ۇيىم­داردىڭ جاسايتىن جۇمىستارىن عانا ايتۋعا بولمايدى, بۇل – حا­لىقتىڭ بارلىق مۇددەلى سانات­تارىنىڭ جۇمىسى», – دەپ اتاپ ءوتتى.

قازىر ورتالىقتا «ۇكىمەتتىك ەمەس ۇيىم مەكتەبى» جو­باسى اياسىندا ساۋات ارتتىرۋ جۇمىستارى باستالىپ جا­تىر. جاسىراتىنى جوق, اۋدان­­دارداعى ۇيىم وكىل­دەرى مەملەكەتتىك الەۋمەتتىك تاپسىرىس قۇجاتتارىن دۇرىس تول­تىرۋدىڭ ءمانىسىن بىلە بەر­مەيدى. بۇل ءوز كەزەگىندە اۋدان­دىق دەڭگەيدەگى لوتتاردى باس­قالاردىڭ ۇتىپ الۋىنا, اۋىل­داعى ازاماتتىق قوعام وكىل­دەرىنىڭ قالىس قالۋىنا اكەلىپ وتىر. وسى ولقىلىقتىڭ ورنىن تولتىرۋ ءۇشىن ازاماتتىق ورتالىقتىڭ ماماندارى ارنايى ساباق جۇرگىزۋدە. «الەۋمەتتىك كاسىپكەرلىك مەكتەبى» جوباسى اياسىندا بيزنەستىڭ قىر-سىرىن مەڭگەرۋگە بولادى. ء«وز قۇقىڭدى ءبىل!» دەپ اتالاتىن ءۇشىنشى اۋقىمدى جوبا بويىنشا زاڭگەرلەر ءدارىس بەرىپ جاتىر.

جالپى, ورتالىق ارقىلى جىل باسىنان بەرى 10 جوبا جۇزەگە اسىرىلىپ, ءتورت ۇكىمەتتىك ەمەس ۇيىم «قازاقستاننىڭ تۇڭ­عىش پرەزيدەنتى – ەلباسى قورى», «ازاماتتىق باستاما­لاردى قولداۋ ورتالىعى» ۇيىم­داس­تىرعان كونكۋرستاردىڭ گرانت­­تارى مەن مەملەكەتتىك الەۋ­­­­مەتتىك تاپسىرىس شەڭبە­رىن­دە قارجىلاي قولداۋعا يە بولعان.

ساننان ساپاعا كوشۋ كەرەك

«ۇكىمەتتىك ەمەس ۇيىم­دار­دىڭ سانىنا ەمەس, ولار كور­سەتەتىن قىزمەتتىڭ ساپاسىنا باسا نازار اۋدارۋ كەرەك». وڭىردەگى ۇكىمەتتىك ەمەس ۇيىمدار وكىل­دەرىمەن كەزدەسكەن جيىندا د.قالەتاەۆ وسىلاي دەدى. ونىڭ ايتۋىنشا, جىل سايىن مەملەكەتتىك تاپسىرىستى جۇزەگە اسىرۋ ءۇشىن بيۋدجەتتەن 19 ميلليارد تەڭ­گەدەن استام قارجى بولىنەدى. تاعى 5 ميلليارد تەڭگەسى شەتەلدەن قارجىلاندىرىلادى. ال الەۋمەتتىك تاپسىرىس قان­شالىقتى ساپالى ورىندالىپ جاتىر؟

اتىراۋ وبلىسىنىڭ اكىمى نۇرلان نوعاەۆ ايماقتاعى ۇەۇ-لار مەن مەملەكەتتىك مەكە­مەلەر­دىڭ اراسىنداعى ءوزارا باي­لا­نىس بويىنشا بىرقاتار جۇمىس اتقارىلعانىن ايتتى. قوعامنىڭ بارلىق سالاسىن دەرلىك قامتىعان جوبالار پروبلەمالاردى شەشۋگە مۇمكىندىك بەرىپ وتىر. ء«بىز ءوز تاراپىمىزدان مەملەكەت باسشىسىنىڭ ازاماتتىق قوعام ينستيتۋتتارىن ودان ءارى جەتىل­دىرۋ جونىندەگى تاپسىرماسىن ورىنداي وتىرىپ, ءوزارا ءىس-قيمىل جاساۋدىڭ جاڭا جولدارىن ىزدەستىرۋدى جالعاستىرامىز. حالىقتىڭ قوعامنىڭ پروبلە­مالىق ماسەلەلەرىن تەرەڭ ءتۇسىنۋ ءۇشىن «اتىراۋ. تسيفرلى قابىلداۋ» ءموبيلدى قوسىم­شاسى مەن Telegram جەلىسىندە «اتىراۋ وبلىسىنىڭ اكىمدىگى» چات-ارناسىن ىسكە قوستىق. اقپا­راتتىق تەحنولوگيالار ارقىلى ازاماتتار وزدەرىن تولعان­دى­راتىن سۇراقتاردى قويىپ, جە­دەل جاۋاپ الا الادى. بۇل جۇيە قوسىلعالى التى اي ءوتتى, تيىم­­­دىلىگىن كورسەتتى. جۇمىس جال­عا­سادى», – دەدى ايماق باسشىسى.

ءوڭىردىڭ ۇكىمەتتىك ەمەس ۇيىم­دار وكىلدەرىمەن وتكەن كەڭەسكە قازاقستاننىڭ ازامات­تىق اليانسىنىڭ پرەزيدەنتى اسىل­بەك قوجاحمەتوۆ تە قاتىس­تى. «ازاماتتىق سەكتور­دىڭ ماعىناسى كەڭ. باتىس ەلدەرىن الىپ قاراساق, مىسالى, گول­لانديادا ەل تۇرعىندارىنىڭ 15%-ى ۇكىمەتتىك ەمەس سەكتوردا جۇمىس ىستەيدى, قازاقستاندا بار بولعانى 0,3%. ءبىزدىڭ بۇگىنگى مىن­دەتىمىز – ۇەۇ مەن مەم­لەكەت­تىك ورگانداردىڭ ارا­سىن­داعى جۇيەلى جۇمىستى جولعا قويۋ», – دەدى ول.

مينيستر د.قالەتاەۆ ازا­مات­­تىق اليانس مەملەكەت پەن قوعام ينستيتۋتتارىنىڭ ارا­سىندا ازاماتتىق ۇنقاتىسۋ الاڭىن ۇيىمداستىرۋ بويىنشا نەگىزگى ارىپتەستەردىڭ ءبىرى ەكەنىن ايتا كەلە, ازاماتتىق قوعامدى دامىتۋ سالاسىندا زاڭنامانى جەتىلدىرۋدە جانە ۇكىمەتتىك ەمەس ۇيىمدار مەن مەملەكەتتىڭ ءوزارا ءىس-قيمىلىن دامىتۋ جونىندەگى ۇلت جوسپارىن ىسكە اسىرۋدا ازاماتتىق اليانستىڭ الەۋەتىن پايدالانۋدى ۇسىندى. ازاماتتىق اليانس قازاقستاندىق ۇكىمەتتىك ەمەس ۇيىمداردىڭ باسەكەگە قابىلەتتىلىگىن ارتتىرۋ, جاڭا بىلىمگە وقىتۋ ماسەلەلەرىمەن اينالىساتىن رەسپۋبليكالىق ادىستەمەلىك ورتالىق بولۋى ءتيىس.

كەڭەستە اتىراۋداعى ۇكى­مەتتىك ەمەس ۇيىمدار وكىلدەرى ويلارىن ايتىپ, مەملەكەت پەن ازاماتتىق قوعام اراسىنداعى بايلانىستىڭ قازىعى نىق بولۋى ءۇشىن قاجەتتى ۇسىنىستارىن ورتاعا سالدى.

باقىتگۇل باباش,

«ەگەمەن قازاقستان»

اتىراۋ