مىنە, بارشا ەلىمىز تاۋەلسىزدىك كۇنىن اتاپ ءوتىپ جاتىر. ەلىنىڭ بولاشاعىنا بەيجاي قاراي المايتىن ءاربىر قازاق ازاماتىنىڭ جۇرەگىنىڭ تۇكپىرىندەگى دەربەس مەملەكەت بولساق دەگەن سەزىمدەردىڭ شىداس بەرمەي ءدۇركىن-دۇركىن بۇلقىنۋىنىڭ ناتيجەسىندە ءۇش عاسىر ۋاقىت بويى ءار كەزەڭدەردە ورىن العان ۇلت-ازاتتىق كوتەرىلىستەرى مەن قوزعالىستاردىڭ سوڭعىسى – جەلتوقساننىڭ ەكپىنىمەن كەلگەن تاۋەلسىزدىكتىڭ ءبىز ءۇشىن ورنى قاشاندا بولەك. سوندىقتان دا, تولارساقتان ساز كەشكەن باتىر بابالارىمىزدىڭ ەركىندىك ءۇشىن توگىلگەن قانىنىڭ, ۇلى مۇراتتار جولىندا قۇربان بولعان اسىل ازاماتتارىمىزدىڭ, اسقاق ارماندارىن سابيىندەي بىلەگىمەن, دالاسىن جۇرەگىمەن تەربەتكەن انالارىمىزدىڭ اقىق كوز جاسىنىڭ وتەۋىندەي تاۋەلسىزدىگىمىزدى ءبىز ارقاشان ماقتان تۇتىپ, قاستەرلەي بىلۋگە ءتيىستىمىز. بىلە بىلسەك, بۇل – ءبىزدىڭ ازاماتتىق پارىزىمىز, ادامدىق بورىشىمىز.
وزگەلەرمەن تەرەزەمىزدى تەڭ ەتكەن تاۋەلسىزدىگىمىزدى باعالاي ءبىلۋىمىز كەرەك. ءارى كەلەشەك ۇرپاق ساناسىنا وسىنى ۇعىندىرا ءبىلۋىمىز كەرەك. ۇلت تاريحىندا ماڭگى ساقتالاتىن, كەلەشەك ۇرپاق تاعىلىم الاتىن كەشەگى جەلتوقساننىڭ جىگەرىنىڭ ارقاسىندا ەلىمىزدىڭ ەركىندىككە قول جەتكىزۋىنە جيىرما جىل تولدى. تاريح ءۇشىن بۇل قامشىنىڭ سابىنداي قىسقا ۋاقىت بولعانىمەن, قازاقستان ەلباسى نۇرسۇلتان نازارباەۆتىڭ سارا ساياساتىنىڭ ارقاسىندا عاسىرلارعا تاتيتىن تولايىم ىستەردى اتقارۋعا قول جەتكىزدى.
وسى جىلدار ىشىندە قازاقستان الەمدىك ارەنادان ءوز ورنىن الا ءبىلدى. بۇگىندە ءبىزدىڭ مەملەكەت الەمدىك قوعامداستىقتىڭ قۇرمەتتى ءارى لايىقتى مۇشەسى. الەمدەگى, وڭىردەگى كوكەيكەستى حالىقارالىق ساياسي جانە ەكونوميكالىق ماسەلەلەرگە قاتىستى قازاقستاننىڭ پوزيتسياسىمەن بارلىق ەلدەر ساناسادى. وسىنىڭ بارلىعى جيىرما جىل ىشىندە اتقارىلعان تىنىمسىز ەڭبەكتىڭ, قاجىرلى جۇمىستىڭ, سىندارلى ساياساتتىڭ ارقاسى. قازاقستاننىڭ ەكونوميكالىق-الەۋمەتتىك سالالارداعى رەفورمالارى, ۇلتارالىق تاتۋلىق پەن كونفەسسياارالىق كەلىسىمدى ساقتاۋداعى قادامدارى, بەيبىتشىلىك پەن قاۋىپسىزدىكتى قامتاماسىز ەتۋدەگى جۇزەگە اسىرىپ جاتقان جۇمىستارى تمد كەڭىستىگىندە عانا ەمەس, الەمدىك دەڭگەيدە دە مويىندالىپ وتىر.
ءجۇرىپ وتكەن جولىمىزعا كوز جىبەرسەك, تاۋەلسىزدىگىنىڭ ءبىرىنشى كۇنىنەن-اق ەڭ الدىمەن ىشكى تۇتاستىعى مەن قاۋىپسىزدىگىنە ايرىقشا ءمان بەرگەن قازاقستان سىرتقى ساياساتىن دا سىندارلى جۇرگىزە ءبىلدى. ناتيجەسىندە ءبىزدىڭ ەلىمىز توقسانىنشى جىلدارى كەڭەس وداعىنىڭ قۇرامىندا بولعان ءبىرتالاي مەملەكەتتى شارپىعان قاقتىعىستاردى اينالىپ ءوتتى. ءبىر سوزبەن ايتقاندا, مەملەكەت باسشىسىنىڭ ۇستانعان دۇرىس پوزيتسياسى مەن جۇرگىزگەن سىندارلى ساياساتىنىڭ ارقاسىندا قازاقستان ىشكى تۇراقتىلىعىن ساقتاپ قانا قويماي, كوپتەگەن حالىقارالىق باستامالار كوتەرىپ, الەمگە ۇلگى كورسەتەر دەڭگەيگە كوتەرىلدى. سونىمەن ءبىر مەزگىلدە, دۇنيە ءجۇزى مەملەكەتتەرىمەن دوستىق, ارىپتەستىك بايلانىستار ورناتتى.
وتانىمىزدىڭ يادرولىق قارۋدان باس تارتىپ, سەمەي سىناق پوليگونىن جاپقانى ءوزىن بەيبىتشىلىك سۇيگىش مەملەكەت رەتىندە تانىتقانىنىڭ ايقىن ايعاعى بولدى. قازاقستان جاس تا بولسا باس بولىپ, تالايلارعا وسىلايشا ونەگە كورسەتتى.
جالپى, تاۋەلسىزدىك قازاققا ءوز اسكەرىن قۇرۋعا, ءتول تەڭگەسىن شىعارىپ پايدالانۋعا, تاعدىر تالكەگىمەن شەت ەلدەرگە كەتكەن قانداستارىن ەلگە قايتارىپ قاۋىشۋعا, سولاقاي ساياساتتىڭ كەسىرىنەن جابۋلى كۇيىندە قالىپ قويعان مادەني مۇرالارىن تۇگەندەۋگە, تۇپتەپ كەلگەندە, ءوز ەلىندە, ءوز جەرىندە ەركىن تىنىستاۋعا مۇمكىندىك تۋعىزدى. بۇل شەشىمدەردىڭ بىرقاتارى ۇزاق ۋاقىت ەلوردا بولعان الماتىدا قابىلدانسا, باسىم كوپشىلىگى وتانىمىزدىڭ جۇرەگى استانادان باستاۋ الدى.
تاۋەلسىزدىگىمىزدىڭ بولاشاعى, مەملەكەتىمىزدىڭ كەلەشەگى, قازاقستان حالقىنىڭ تاعدىرى ءۇشىن ەلباسىنىڭ ەلوردانى الماتىدان اقمولاعا كوشىرۋى دە شىن ءمانىندە تاريحي شەشىم بولعاندىعىن بۇگىنگى كۇن ءدالەلدەپ وتىر. استانا قازاقستاندىقتار ارمانىن ارقالاعان ءتاۋەلسىز قازاقستاندى بيىك شىڭدارعا جەتەلەگەن شاھارعا اينالىپ كەلەدى. ولاي بولسا, جاراتقان ءدايىم ەلىمىزدى امان, جۇرتىمىزدى تىنىش ەتسىن, حالقىمىزدىڭ باسىنان باق-بەرەكە, بىرلىك كەتپەسىن! مەرەيلى مەرەكە – ءتاۋەلسىزدىگىمىزدىڭ 20 جىلدىق تورقالى تويى قۇتتى بولىپ, ۇزاعىنان ءسۇيىندىرسىن! تەڭدىك اپەرگەن تاۋەلسىزدىگىمىزدى قاشاندا كوزىمىزدىڭ قاراشىعىنداي ساقتاپ, باعالاي بىلەيىك!
سۇيىندىك جۇماعۇلوۆ, استانا قالاسى ادىلەت دەپارتامەنتى باستىعىنىڭ ورىنباسارى.