ادام بالاسى ءۇشىن ۋاقىتتان قىمبات دۇنيە جوق. ەگەر دە ءسىز 63 جىل ءومىر ءسۇرىپ, كۇنىنە 8 ساعات جۇمىس ىستەسەڭىز, بارلىق عۇمىرىڭىزدىڭ 21 جىلى جۇمىس ىستەۋگە كەتەدى ەكەن. تاۋلىگىنە 8 ساعات ۇيىقتاساڭىز, تاعى ءبىر 21 جىل ۇيقىعا كەتەدى. ونىڭ سىرتىندا 6 جىل تاماق ىشۋگە, 5 جىل اندا-مۇندا ساپارلارعا, 1 جىل تەلەفونمەن سويلەسۋگە كەتەتىن كورىنەدى.
قازىر دۇنيە شىركىن دوڭگەلەنىپ, اقپارات كوزى جەدەل دامىعان مىنا زامان ادامداردى ويلاندىرمايتىن بولدى. تەلەديدار اتاۋلى حالىقتى ۇزىن-سونار تەلەسەريالدارمەن الداۋدا. اسىرەسە اۋىل قازاقتارىنىڭ ءومىرى تۇرىك, كورەي, ءۇندى سەريالدارىن تاماشالاۋمەن ءوتىپ جاتىر. ولار ءبىر كۇندە ەكى نەمەسە ءۇش سەريالدان كورەدى. ءاربىر سەريال 40-60 مينۋتتان. ەندى ەسەپتەپ كەپ جىبەرەيىك. ەكى سەريالعا باقانداي 2 ساعات ۋاقىتىڭىز كەتەدى. اپتاسىنا 12-14 ساعاتتى كينو كورۋمەن وتكىزەدى ەكەنسىز. ءبىر ايدا 48-52 ساعاتتى سەريال كورۋگە جۇمسايسىز. ار جاعىندا جىلىنا قانشاما ۋاقىت تەلەديدارعا تەلمىرۋمەن ءوتىپ جاتىر, ەسەپتەپ كورىڭىز!
وسى سەريالداردى كورگەننەن نە ۇتاسىز؟ تۇك تە پايداسى جوق. انشەيىن بوسقا وتكەن ۋاقىت. بايانسىز وتكەن ۋاقىتتىڭ اقىرەتتە سۇراۋى بولماق. اقىلدى ادام ءوزىن كينو كورىپ الداندىرعانشا ەكى دۇنيەدە پايداسى بار ارەكەتپەن اينالىسار ەدى. بالا-شاعا نەسىبەسى ءۇشىن ەڭبەك ەتەر ەدى, اۋىرىپ-سىرقاعان اعايىن-جەكجاتتىڭ كوڭىلىن سۇراۋعا بارار ەدى...
ەرتە داۋىردە ءومىر سۇرگەن تانىمال تاقۋا ابدولدا ماسعۇت: «وكىنىشتەن وزەگىمدى ورتەيتىن نارسە: بوسقا وتكەن ۋاقىتتارىم» دەسە, ۇلكەن ساحابا ماعاز ءجابال دەيتىن ادام پايعامبارىمىزدىڭ (س.ع.س): «قيامەت كۇنى ءتورت نارسەدەن سۇرالمايىنشا, قۇلدىڭ ەكى اياعى تىرپ ەتپەيدى: ۋاقىتىن قالاي جۇمسادى, جاستىق شاعىن قالاي وتكىزدى, مال-دۇنيەنى قايدان تاپتى, قايدا جۇمسادى, بىلىمىنە قانداي امال جاسادى» دەيدى. وسىدان-اق ۋاقىتتىڭ ماڭىزىن بىلە بەرىڭىز.
وسى ورايدا ۋاقىتتىڭ قۇنىن تۇسىندىرەتىن مىنا ءبىر ءتامسىلدى تىڭداڭىز: بىردە پاتشاعا نوكەرلەرى شومبال ادامدى ەرتىپ كەلىپتى. بۇل ادام اسا ەپتى ەكەن. ۇلكەن تەبەن ينەنى التى اتتام جەرگە شانشىپ قويىپ, قولىنداعى ءجىپتى لاقتىرعاندا الگى ينەنىڭ كوزىنەن وتكىزىپ جىبەرەدى. پاتشا كورىپ قايران قالادى. شەبەردەن: «وسى ءىستى ۇيرەنۋ ءۇشىن قانشا جىل جۇمسادىڭ؟» دەپ سۇرايدى. شەبەر: «قىرىق جىل ۋاقىتىم كەتتى», دەيدى. حان ايتادى: «مىنا ادامعا 40 ءدىلدا التىن بەرىڭدەر, وعان قوسا اياماي 40 دۇرە سوعىڭدار», دەپتى. شەبەر: «تاقسىر, حان يەم, 40 دۇرە سوعاتىنداي قانداي ايىبىم بار, تۇسىنسەم بۇيىرماسىن…» دەيدى. سوندا حان ايتىپتى: «40 التىن ءدىلدا ەڭبەگىڭ ءۇشىن, 40 دۇرە ەشقانداي پايداسىز ىسپەن اينالىسىپ قىرىق جىل عۇمىرىڭدى بوسقا وتكىزگەنىڭنىڭ جازاسى», دەپتى. اعايىندار ويلاپ كورىڭىزدەرشى, شىنىندا تەبەن ينەگە التى اتتام جەردەن ءجىپ لاقتىرىپ كوزىنەن وتكىزگەننىڭ حالىق ءۇشىن قانداي پايداسى بار. مىنا سەريالدار دا سول سياقتى پايداسىز ءارى مازمۇنى تومەن, تاربيەلىك ءمانى ناشار دۇنيەلەر.
بەكەن قايرات ۇلى, «ەگەمەن قازاقستان»