وسىدان 10 جىل بۇرىن, ياعني 2008 جىلدىڭ تامىز ايىندا قىتايدىڭ باس شاھارى – بەيجىڭدە الاۋى تۇتانعان وليمپيا ويىندارىندا تاەكۆوندودان اقش قۇراماسى ءۇش مەدالدى ولجالاپ, جالپى كوماندالىق ەسەپتە بەسىنشى ورىنعا تابان تىرەگەن ەدى. ءبىر عاجابى, سول جۇلدەلەردىڭ بارلىعى دا لوپەستەر وتباسى مۇشەلەرىنە تيەسىلى.
بولاشاق جۇلدىزداردىڭ اتا-اناسى نيكاراگۋادا تۋىپ-وسكەن. ازامات سوعىسى مەن ءتۇرلى قاقتىعىستان كوز اشپاعان مەملەكەتتە تۇراقتاۋدى ءجون كورمەگەن ولار جەتپىسىنشى جىلدارى اقش-قا قونىس اۋدارادى. باي-قۋاتتى امەريكادا لوپەستەر وتباسىنىڭ مۇشەلەرى تۇگەلدەي تاەكۆوندومەن تابىسادى. ۇلدارىنىڭ بۇل ەرمەگىن قۇپتاعان اكەلەرى ءوزىنىڭ كولىك قوياتىن شاعىن عانا گاراجىن سپورت زالىنا اينالدىرادى. سول جەردە ولار كورەيلەر ويلاپ تاپقان ونەردىڭ قىر-سىرىنا قانىعادى.
كوپ ۇزاماي ەرەن ەڭبەك ءوز جەمىسىن بەردى. العاشقى بولىپ وسى وتباسىنىڭ تۇڭعىشى جان لوپەس اقش ۇلتتىق قۇراما كومانداسى ساپىنا شاقىرتۋ الىپ, ءتۇرلى دودالارعا قاتىسادى. الايدا ول تولاعاي تابىستارعا قول جەتكىزە العان جوق. ەسەسىنە تۋعان ءىنىسى ستيۆەن لوپەس (1978 جىلى تۋعان) اعاسى ارمانداعان بەلەستەردى بىرىنەن كەيىن ءبىرىن باعىندىرىپ, تورتكۇل دۇنيەدەگى تەڭدەسسىز تاەكۆوندوشىلاردىڭ ءبىرى رەتىندە ءوز ەسىمىن سپورتتىق شەجىرەگە التىن ارىپتەرمەن جازدى. اتاپ ايتساق, ول 2000 جىلى سيدنەيدە جانە 2004 جىلى افينىدا وتكەن وليمپيا ويىندارىندا التىن تۇعىرعا كوتەرىلىپ, الەمنىڭ 5 دۇركىن چەمپيونى اتاندى. ودان بولەك, قۇرلىقتىق جانە باسقا دا اسا ءىرى حالىقارالىق جارىستاردا جاسىنداي جارقىرادى.
ستيۆەننەن كەيىن مارك لوپەس (1982) ءوزىنىڭ مىقتىلىعىن مويىنداتىپ, كوپتەگەن بايراقتى باسەكەدەن ولجالى ورالدى. قوس اعاسىنىڭ جەڭىستى جولى قارىنداستارى دياناعا دا (1984) جۇعىستى بولدى. ول دا دارا تالانتىمەن وقشاۋلانىپ, 2002 جىلى پانامەريكا ويىندارىنىڭ جەڭىمپازى, 2005 جىلى الەم چەمپيونى جانە 2007 جىلى الەم بىرىنشىلىگىنىڭ قولا جۇلدەگەرى اتاندى.
ءبىراز جىل بويى اقش-تا ءبىر وتباسىنان شىققان ءۇش سپورتشىنىڭ الدىن ورايتىن ەشكىم بولعان جوق. سونىڭ ناتيجەسىندە 2008 جىلى بەيجىڭ وليمپياداسىنا ەل نامىسىن قورعاۋ سول ساڭلاقتارعا جۇكتەلدى. ولاردىڭ بارلىعى دا ارتىلعان سەنىمدى اقتاپ, ۇلى دۇرمەكتە مول ولجاعا كەنەلدى. تارقاتىپ ايتساق, 57 كەلى سالماقتا ونەر كورسەتكەن ديانا جانە 80 كەلى سالماقتا سايىسقا تۇسكەن ستيۆەن قولا مەدالدى يەلەنسە, 68 كەلى سالماق دارەجەسىندە كۇش سىناسقان مارك كۇمىس جۇلدەنى موينىنا ءىلدى.
مىنە جوعارىداعى سۋرەتتە بەينەلەنگەن تاەكۆوندوشىلار وتباسى – لوپەستەردىڭ باعىندىرعان بەلەستەرى وسىنداي.
عالىم سۇلەيمەن,
«ەگەمەن قازاقستان»