بيىل مامىر ايىنىڭ باس كەزىندە, جەڭىس مەرەكەسى قارساڭىندا ارۋ قالا الماتىعا جول ءتۇستى. كەشكىلىك سپەكتاكل كورەيىك دەپ م.اۋەزوۆ اتىنداعى قازاق مەملەكەتتىك اكادەميالىق دراما تەاترىنا باردىق. ءدال سول كۇنى كورەرمەندەرگە جاس دراماتۋرگ ا.الاماننىڭ «جۇرەگىمنىڭ يەسى» اتتى پسيحوفيزيكالىق دراماسى ۇسىنىلىپ جاتىر ەكەن.
وبالى نە كەرەك, اكەمتەاتردىڭ كىشى زالىنا جينالعانداردىڭ قاراسى ەداۋىر بولدى. كوپشىلىگى جاستار, سىرتتان كەلگەن قالا قوناقتارى دا كوزگە شالىندى.
قانشا دەگەنمەن اسىقپاي جۇرگەندى ءتاۋىر كورەتىن قازاق ەمەسپىز بە, كورەرمەندەر زالعا بىرىنەن سوڭ ءبىرى ۇزدىك-سوزدىق كەلىپ جاتتى. ورنىمىز الدىڭعى قاتاردا بولعاندىقتان, كەشىگىپ كەلگەندەردىڭ ورتاعا تامان ءوتۋى ءۇشىن الدەنەشە مارتە تۇرۋىمىزعا تۋرا كەلدى. ءتىپتى كەيبىرەۋلەرى وزدەرىنىڭ ءبىزدى مازالاعانى ءۇشىن ىڭعايسىزدانىپ, عاپۋ ءوتىنۋدىڭ ورنىنا, ەشتەڭە بولماعانداي قالىپ تانىتىپ, ك ۇلىپ, ءبىر-بىرىمەن داۋىستاپ سويلەسىپ جاتتى. ولاردى قايدام, مىنالارى بىزگە ءبىرتۇرلى ەرسى كورىندى. قانشا وقتالساق تا, تەاتر اتتى كيەلى ورىنعا كەلگەن سوڭ ادەپ ساقتاپ, الگىلەرگە رەنىشىمىزدى بىلدىرمەي ىشىمىزدەن تىندىق.
كوپشىلىك ورىنعا كەلەتىنىن بىلگەننەن كەيىن ادام دەگەن ەرتەرەك قام جاساپ, بەلگىلەنگەن ورىنعا الدىن الا جايعاسىپ الماس پا. ال مۇنىڭ تۇك تە قيىندىعى جوق قوي. سوعان قاراپ, «بىزدە ءالى دە بولسا كەيبىر كورەرمەندەردىڭ مادەنيەتى تومەن ەكەن-اۋ» دەگەن ويعا قالدىق.
بالكىم, مۇنى وقىعان كەيبىرەۋلەر ويلانار دەگەن ۇمىتتەمىز.
كارىباي امزە ۇلى,
زەينەتكەر
وڭتۇستىك قازاقستان وبلىسى,
سوزاق اۋدانى