قر پرەمەر-ءمينيسترى باقىتجان ساعىنتاەۆ مەملەكەت باسشىسىنىڭ تاپسىرماسى بويىنشا ماڭعىستاۋ وبلىسىنا جۇمىس ساپارى اياسىندا اقتاۋدا «ماڭعىستاۋ» كاسىپكەرلەرگە قىزمەت كورسەتۋ (كقكو) ورتالىعىنا باردى. وندا ۇكىمەت باسشىسى كاسىپكەرلىك تۋرالى جاڭا زاڭ اياسىندا قىزمەت كورسەتۋگە دايىندىق بارىسىمەن تانىستى, دەپ حابارلايدى primeminister.kz.
ساپار بارىسىندا پرەمەر-مينيسترگە تىركەۋ ءبولىمى, وپەراتسيالىق زال, جاڭادان باستاۋشى كاسىپكەرلەردى وقىتۋعا ارنالعان كونفەرەنتسيا زالدارى كورسەتىلىپ, «اتامەكەن» شاعىن قارجى ۇيىمى مەن «باستاۋ-بيزنەس» مەكتەبىنىڭ قىزمەتى تانىستىرىلدى.
كقكو-دا بارلىعى 72 ادام جۇمىس ىستەيدى. وڭىرلىك كاسىپكەرلەر پالاتاسىنىڭ ديرەكتورى ن. قاراساەۆ ورتالىقتىڭ قىزمەتى جانە جەرگىلىكتى بيزنەسمەندەردى قولداۋ شارالارى تۋرالى ايتىپ بەردى. وبلىستا «اتامەكەن» وڭىرلىك كاسىپكەرلەر پالاتاسى جانىندا 2 كقكو جۇمىس ىستەيدى. ولار اقتاۋ جانە جاڭاوزەن قالالارىندا. سونىمەن قاتار وبلىستىڭ بارلىق اۋداندارىندا كقكو قىزمەتكەرلەرى بار.
2017 جىلى بارلىعى 22 مىڭعا جۋىق قىزمەت كورسەتىلگەن, وسى جىلدىڭ 5 ايىندا - 9 مىڭنان استام قىزمەت ۇسىنىلعان. كقكو كەلەسى باعىتتاردا ء«بىر تەرەزە» قاعيداتى بويىنشا قىزمەتتەر كورسەتەتىنىن اتاپ وتكەن ءجون: سەرۆيستىك جانە كونسالتينگتىك قىزمەتتەر, كاسىپكەرلىك نەگىزدەرى مەن «جاڭا سەرپىن» جۇمىس كاسىپتەرىنە وقىتۋ, ينۆەستيتسيالىق جوبالاردى, حقكو قىزمەتتەرىن, سالىق تولەۋشى تەرمينالىن سۇيەمەلدەۋ. سونىمەن قاتار مۇندا كوممۋنالدىق قىزمەتتەرگە قوسىلۋعا وتىنىمدەر تسيفرلىق فورماتتا قابىلدانادى.
ن. قاراساەۆ سونداي-اق وڭىرلىك كاسىپكەرلەر پالاتاسى جانىنداعى كقكو اۋماعىندا «باستاۋ - بيزنەس» جوباسى بويىنشا وقىتۋ جۇرگىزىلەتىنىن باياندادى. 2017 جىلى جوباعا ءوز ءىسىن جاڭا باستاعان 930 بيزنەسمەن قاتىسقان. 2018 جىلعى بەس ايدىڭ ىشىندە كاسىپكەرلىك نەگىزدەرىنە نيەت بىلدىرگەن 292 ادام وقىتىلدى.