شاقپاق جەيدەلى كوماندا وسى جولى وتە مىقتى قۇراممەن كەلگەلى تۇر. بۇل كوماندانىڭ ورتاداعى ەكى ويىنشىسىنىڭ ءوزى نەگە تۇرادى. ءبىرى «رەال» مادريد ويىنشىسى – لۋكا مودريچ, ەكىنشىسى «بارسەلونانىڭ» تىرەگى – يۆان راكيتيچ.
وتكەلدە باپكەر اۋىستىرىپ, امان قالدى
حورۆاتيا بىرىنشىلىكتىڭ جاسىرىن ءفاۆوريتى سانالعانىمەن, ىرىكتەۋدەن ارەڭ ءوتتى. ۋكراينا, تۇركيا, يسلانديا سەكىلدى مىقتى ۇجىمدارمەن ءبىر توپقا ءتۇسىپ, ءبىرشاما ماتچ-
تا تەپەرىش كوردى. يسلانديا مەن تۇركياعا قارسى وتكەن ەكى ويىندا دا شاقپاق جەيدەلىلەر جەڭىلىپ قالدى. ىرىكتەۋ اياقتالاردا ءوز الاڭىندا فينليانديامەن تەڭ ءتۇسىپ قالىپ, كۇتپەگەن قيىندىققا تاپ بولدى. بىراق سوڭعى ويىندا ۋكراينانى سىرت الاڭدا ۇتىپ, توپتاعى ەكىنشى ورىنعا يەلىك ەتتى. سونىڭ ارقاسىندا وتپەلى ويىنعا قاتىسىپ, گرەكيانى تاس-تالقان ۇتتى. بۇل ارالىقتا كوماندا باس باپكەرى انتە چاچيچ قىزمەتىنەن كەتىپ, ورنىنا زلاتكو داليچ كەلدى. جاڭا باپكەردىڭ كەلگەنى سول ەدى, قۇراما قايتا تۇلەپ, الەم چەمپيوناتىنا جولداما الدى. قازىر جاڭا باپكەر كومەكشىسى يۆيتسا وليچ ەكەۋى رەسەي جەرىندە اتوي سالۋعا دايىندالىپ جاتىر.
حورۆاتيا قۇراماسىنىڭ باستى ارتىقشىلىعى – قورعانىسى. ەۋروپاداعى ىرىكتەۋ سىنىندا بۇل ۇجىم قاقپاسىنا نەبارى 4-اق گول جىبەردى. بۇل بارلىق ىرىكتەۋگە قاتىسقان قۇرامالار ىشىندەگى ەڭ جاقسى كورسەتكىشتىڭ ءبىرى.
ساعىندىرعان – 98يۋگوسلاۆيا مەملەكەتى ىدىراعاننان سوڭ, تاۋەلسىز ەل بولعان حورۆاتيا فۋتبول قاۋىمداستىعى قۇراما كومانداسىن 1998 جىلعى فرانتسيادا وتەتىن الەم چەمپيوناتىنىڭ ىرىكتەۋىنە قاتىستىردى. العاشقى جارىسىندا جولى بولعان حورۆاتتار فرانتسيا جەرىندە جارق ەتىپ كورىندى. كوماندا سەنساتسيا جاساپ, ءمۋنديالدىڭ قولا جۇلدەسىنە قول جەتكىزدى. ال شابۋىلشى داۆور شۋكەر 6 گول سوعىپ, ۇزدىك سۇرمەرگەن اتاندى. ودان كەيىن بۇل ۇجىم 2002 مەن 2006 جىلدارداعى بىرىنشىلىكتەردە وسى ناتيجەسىن قايتالاي المادى. قيىن قارسىلاستار تاپ بولىپ, ءوز توبىنان شىعا المادى. ال 2010 جىلى وار-دا وتكەن جاھاندىق جارىسقا ءتىپتى وتە الماي قالدى. ىرىكتەۋدە ىركىلگەن حورۆاتيا وسى وقيعادان سوڭ فۋتبولشىلارمەن قوسا باپكەرلەردى دە تەگىس اۋىستىردى. برازيلياداعى چەمپيوناتقا شىعىپ, تاعى دا توپىشىلىك ماتچتاردا ءسۇرىندى. چەمپيوناتتىڭ العاشقى ويىنىندا برازيليادان جەڭىلىپ, ەكىنشى ماتچتا كامەرۋندى 4:0 ەسەبىمەن ۇتتى. سوڭعى شەشۋشى ويىندا انتە رەبيچ شاكىرتتەرى مەكسيكادان جەڭىلىپ قالىپ, چەمپيوناتپەن ەرتە قوش ايتىستى.
«اجال توبى»حورۆاتيا جەرەبە بويىنشا «D» توبىنا ءتۇستى. بۇل توپتى جۋرناليستەر «اجال توبى» دەپ باعالادى. سەبەبى مۇندا جوسپارى جويقىن حورۆاتيادان بولەك, كەز كەلگەننىڭ اپشىسىن قۋىراتىن ارگەنتينا, ىرىكتەۋدە ءدال وسى حورۆاتتاردى جەڭگەن يسلانديا جانە قارا قۇرلىقتىڭ قابىلاندارى نيگەريا بار. سوڭعىسىمەن لۋكا مودريچ باستاعان فۋتبولشىلار 16 ماۋسىم كۇنى كالينينگراد قالاسىندا كەزدەسەدى. ودان كەيىن 2-تۋردا ارگەنتينامەن شايقاسىپ, ۇلكەن سىناقتى باستان كەشەدى. ال شەشۋشى ويىن 26 ماۋسىم كۇنى يسلاندياعا قارسى بولاتىن سەكىلدى.
حورۆاتيالىق جانكۇيەرلەر كوبىنەسە يتاليانىڭ «ا» سەرياسىندا ويناپ جۇرگەن شابۋىلشىلارىنا سەنىم ارتادى. ماريو ماندجۋكيچ, يۆان پەريشيچ, نيكولا كالينيچتەر ءۇش بۇيىردەن قىسقاندا الگى اتالعان ءۇش قۇرامانىڭ قورعانىسى شىتىناۋى ءتيىس. بولجام بويىنشا حورۆاتيا ءوز توبىندا ارگەنتينانى العا سالىپ ەكىنشى ورىن الۋى ىقتيمال ەكەن. ەگەر جاعداي وسىلاي ءوربيتىن بولسا, وندا شاقپاق جەيدەلىلەردى «س» توبىنىڭ كوشباسشىسى بولۋى مۇمكىن فرانتسيا كۇتىپ تۇرادى. سوندىقتان دا كورشى توپتا ەكىنشى ورىن الۋى ىقتيمال دانيا, پەرۋ, اۋستراليا سەكىلدى ورتاڭقولدارمەن ويناۋ ءۇشىن حورۆاتتار ليونەل مەسسي باستاعان «البيسەلەستە» كومانداسىن ارتقا تاستاۋى قاجەت.
ەرمۇحامەد ماۋلەن, «ەگەمەن قازاقستان»