وسىدان ون جىل بۇرىن ەلوردانىڭ العاشقى مەرەيلى داتاسى دۇبىرلەگەن تويمەن اتالىپ وتكەنى ءالى ەسىمىزدە. ءتور قالانىڭ تۋعان كۇنىندە اتى اڭىزعا اينالعان ءۇش تەنوردىڭ ءبىرى – پلاسيدو دومينگو تاۋەلسىزدىك سارايىندا كونتسەرت بەرگەن-ءدى.
وعان دەيىن قاپتاعان پوپ-جۇلدىزداردى ايتپاعاندا, مونسەررات كابالە, دميتري حۆوروستوۆسكي سىندى كلاسسيكالىق مۋزىكانىڭ مايتالماندارى دا استانانىڭ اسپانىن تالاي مارتە انگە بولەگەن. دەگەنمەن, ۇلى يسپان ءانشىسىنىڭ كونتسەرتى ەرەكشە ءوتتى, قالا حالقى كوپكە دەيىن قالا كۇنىن پلاسيدو دومينگونىڭ ەسىمىمەن بايلانىستىرىپ ءجۇردى.
ءبىز بۇل جولى دومينگونىڭ كونتسەرتى ەمەس, كونتسەرت الدىنداعى ءباسپاسوز ءماسليحاتى تۋرالى, دالىرەك ايتقاندا, ءبىر ساۋالعا بەرگەن جاۋابى تۋرالى ايتقىمىز كەلىپ وتىر. تەنور تاۋەلسىزدىك سارايىنىڭ تابالدىرىعىنان اتتاماستان ءبىر ساعات بۇرىن ۇيىمداستىرۋشىلار جۋرناليستەردى اتى ءماشھۇر مەيماننىڭ الدىندا ۇيالى تەلەفونداردىڭ دىبىسىن ءوشىرۋ, سۇحبات كەزىندە فوتواپپاراتتاردىڭ جارقىلىن باسەڭدەتۋ, انشىگە بەس قادام جەردە سىزىلعان قىزىل سىزىقتان اتتاپ كەتپەۋ... دەگەن سىندى بۇرىننان بەلگىلى ەرەجەلەردى بىرنەشە رەت قايتالاپ ءتۇسىندىردى. ماەسترونىڭ اتاق-داڭقى سوعان ماجبۇرلەسە كەرەك.
سونىمەن سەنور دومينگو مەجەلەنگەن ۋاقىتتان ءبىر مينۋت تا كەشىكپەي ماسليحاتقا كەلىپ جەتتى. قاراپايىم قالپىنان تانباي, جۋرناليستەرمەن ەمەن-جارقىن ەسەندەسىپ, سۇراقتارعا جان-جاقتى جاۋاپ بەرۋگە كوشتى. استانا كۇنىمەن قۇتتىقتاۋدى دا ۇمىتقان جوق.
وسى كەزدەسۋدە ارىپتەستەرىمىزدىڭ ءبىرى اتى اڭىزعا اينالعان انشىدەن پوپ-مۋزىكاعا قاتىستى پىكىرىن سۇراعان. شىنى كەرەك, كلاسسيكالىق مۋزىكا تارلاندارىنىڭ ەسترادا اشەكەيلەرىنىڭ ونەرىن جوققا شىعارىپ, ىسكە العىسىز ەتىپ تاستايتىنىنا بۇرىن ءجيى كۋا بولىپ جۇرگەنبىز. ال دومينگونىڭ سوزىنەن ونداي استامشىلىقتى بايقامادىق. كەرىسىنشە, ونەرگە شىن بەرىلگەن ادامداردىڭ ەڭبەگىنە ەرەكشە قۇرمەتپەن قارايتىنى سەزىلىپ تۇردى. – مەن «بيتلز», مادوننا, «U2» سياقتى ۇلى انشىلەر مەن توپتاردىڭ ونەرىنە عاشىق جاندارعا تۇسىنىستىكپەن قارايمىن. سەبەبى ولار شىن مانىسىندە تالانتتى ارتىستەر. بۇگىن بار, ەرتەڭ جوق انشىلەردى مەن تانىپ ۇلگەرمەۋىم مۇمكىن. ال ۇزاق جىل بويى كورەرمەن كوڭىلىن جاۋلاپ كەلگەن ادامدارعا قۇرمەتپەن قارايمىن,– دەدى ول.
پوپ-مۋزىكانىڭ كورولى مايكل دجەكسونعا قاتىستى كوزقاراسى دا ەرەكشە ەكەن.
– مايكل دجەكسون – پوپ-مۋزىكاداعى ەڭ ۇلى ارتىستەردىڭ ءبىرى. ونىڭ داۋىسى وتە جاقسى بولاتىن. ال ساحناداعى شەبەر قيمىلىن ەندى ەشكىم قايتالاي المايتىن شىعار. ول عاجاپ بيلەيتىن. مەنىڭشە, مايكل دجەكسوندى رۋدولف نۋريەۆ, ميحايل بارىشنيكوۆ سياقتى ۇلى بيشىلەرمەن ءبىر قاتارعا قويۋعا ابدەن بولادى. ءسوز جوق, ول ەرەكشە دارىندى ادام ەدى,– دەدى پوپ-مۋزىكا كورولىنىڭ تالانتىنا تاڭعالىسىن جاسىرا الماي.
ءباسپاسوز ءماسليحاتىنان كەيىن دومينگونىڭ كىشىپەيىل جاۋابىنا جۋرناليستەر ريزا بولىسىپ جاتقانىن بايقادىق.
ۆيرتۋوز سكريپكاشى, الەمنىڭ ەڭ ايگىلى سارايلارىندا كونتسەرت بەرگەن, ەڭ اتاقتى دىبىس جازۋ ستۋديالارىندا كلاسسيكالىق تۋىندىلاردى جازۋعا وركەسترگە ديريجەرلىك جاساعان جەرلەسىمىز مارات بيسەنعاليەۆتەن ەرتەرەكتە سۇحبات العانىمىز بار. سكريپكاشىنىڭ قىزى ارۋحان اكەسىنىڭ جولىن قۋىپ مۋزىكانت بولعانىمەن, باسقا جانردى تاڭداپتى. دجاز جانرىنداعى جەكە ءان ديسكىن دە شىعارعان.
– ءار ادام جۇرەگى قالاعان ىسپەن شۇعىلدانعاندا عانا جوعارى ناتيجەگە قول جەتكىزەدى. ارۋحاننىڭ تاڭداعان باعىتىنا دۇرىس قارايمىن. جالپى, دجاز, پوپ, حيپ-حوپ سىندى جانرىنداعى مۋزىكانتتاردىڭ قاي-قايسىسىنا قۇرمەتپەن قارايمىن, ساپالى تۋىندىلاردى ءسۇيسىنىپ تىڭدايمىن,– دەيدى مارات بيسەنعاليەۆ.
جالپى, دۇنيە جۇزىندە جۇرتشىلىق قىزىعا تالقىلايتىن ترەند تاقىرىپتاردىڭ كوپشىلىگى شوۋ-بيزنەستىڭ توڭىرەگىنەن ءوربيتىنى ءمالىم. باسقا ەلدەردەگى ۇدەرىستەردى تەز ۇيرەنەتىن ءبىزدىڭ حالىققا دا بۇل ادەت جۇققانىنا تالاي جىلدىڭ ءجۇزى بولدى. كەيدە كورگەنى كوپ, تۇيگەنى مول دەيتىن اعا بۋىن انشىلەرىمىزدىڭ اراسىندا, تانىمال ەسترادا انشىلەرىن جوققا شىعارىپ, سىناپ-مىنەپ جاتاتىندار كەزدەسىپ قالادى. سىننىڭ مادەنيەتتى تىلمەي, بەرىك ارگۋمەنتكە سۇيەنىپ ايتىلۋى شارت ەمەس. ول ايتتى – ءبىتتى, سەبەبى, كلاسسيكالىق ونەردىڭ وكىلى. ءسويتىپ «حايپتىڭ» كورىگى قىزىپ سالا بەرەدى دەيسىز. اتاقتى انشىگە الگى جاس ءانشىنىڭ ءوزى نەمەسە پروديۋسەرى جاۋاپ بەرەدى, وعان ەكى تاراپتىڭ «فاناتتارى» ارالاسادى, قىپ-قىزىل داۋ-داماي بىرازعا دەيىن تولاستامايدى.
سوندايدا ەسكە ۇلى ءانشى پلاسيدو دومينگونىڭ, ۆيرتۋوز سكريپكاشى مارات بيسەنعاليەۆتىڭ جوعارىداعى پىكىرلەرى ويعا ورالادى. كەيدە كوپشىلىككە ورەلى وي ايتىپ, دۇرىس باعىت نۇسقاۋ ءۇشىن تالانتتى بولۋ, اتاقتى بولۋ ازدىق ەتەتىن سياقتى. تالانتتى تۇلعانىڭ بويىنان تاربيە, تالعام, توزىمدىلىك دەگەن قاسيەتتەردىڭ دە تابىلعانىنا نە جەتسىن!..
ارنۇر اسقار, «ەگەمەن قازاقستان»