نۇرسۇلتان نازارباەۆ «كومپوزيتور» كينوفيلمىنىڭ اكتەرلەرىمەن كەزدەستى, دەپ حابارلايدى اقوردانىڭ ءباسپاسوز قىزمەتى.
مەملەكەت باسشىسى قىتاي حالىق رەسپۋبليكاسىنا مەملەكەتتىك ساپارى بارىسىندا قازاقستان مەن قىتايدىڭ بىرلەسىپ تۇسىرگەن «كومپوزيتور» اتتى ءبىرىنشى كينوفيلمىنىڭ شىعارماشىلىق توبىمەن كەزدەستى. فيلم ۇلى وتان سوعىسى جىلدارىندا قازاقستاندا بولعان قىتاي كومپوزيتورى سي سينحاي مەن قازاق كومپوزيتورى باقىتجان بايقاداموۆتىڭ دوستىعىنا ارنالعان.
قازاقستان پرەزيدەنتى فيلم ترەيلەرىنىڭ تانىستىرىلىم راسىمىندە اكتەرلەر قۇرامىنا كاسىبي ونەر كورسەتكەنى ءۇشىن ريزاشىلىق ءبىلدىرىپ, ەكى ەلدىڭ مادەني سالاداعى ىنتىماقتاستىعىنىڭ جوعارى دەڭگەيگە كوتەرىلگەنىن اتاپ ءوتتى.
كوركەم ءفيلمدى ش.ايمانوۆ اتىنداعى «قازاقفيلم» كينوستۋدياسى مەن قىتايدىڭ «Shinework Pictures» جانە «China Film Coproduction Corporation» كومپانيالارى تۇسىرگەن. باستى رولدەردە قازاقستاندىق اكتەرلەر – بەرىك ايتجانوۆ, التىناي نوگەربەك, ارۋجان جازىلبەكوۆا, قىتايلىق اكتەرلەر – حۋ تسزيۋن جانە يۋان تسيۋان وينايدى.