ءبىزدىڭ حالىقتا ءوزى ەشتەڭە بىتىرمەسە دە اقىل ايتىپ, قۇلاقتى سارسىتاتىندار كوپ قوي.
ءبىر كىسى تاڭەرتەڭگىلىك بەس ەشكىسىن ىسقىرىپ ايداپ, ورىسكە شىعارىپ كەلە جاتىپ, وزەننەن بالىق اۋلاپ وتىرعان ادامدى كورىپ قالادى. تاڭ اتپاي ەرىگىپ بالىق اۋلاپ وتىرعان ادامنىڭ قاسىنا بارعان «بەس ەشكىلى باي» ءبىراز اقىل ايتىپ تاستايدى. اقىلىن ۇرىسىپ باستايدى عوي. ادام دەگەن ەڭ الدىمەن وتباسىنىڭ جاعدايىن ويلاۋ كەرەك. بالا-شاعاڭدى امان-ەسەن ءوسىر. وقىت, توقىت, ۇلدى ۇيلەندىر, قىز ۇزات. ءۇي-جاي قىل, قىزمەتىن قامدا. دۇنيەدەن تارىقپاۋ ءۇشىن كاسىپكەرلىكپەن اينالىس, بالا-شاعاڭدى سوعان باۋلى. وسىنىڭ ءبارىن بىتىرسەڭ قول بوس, سوسىن بالىق اۋلا.
بۇرقىراپ بارىپ توقتايدى. سويتسە, بالىق اۋلاپ وتىرعان كىسى كۇلەدى. «اۋ, اقساقال, مەن نە ىستەپ وتىرمىن؟! ءسىز ايتقاننىڭ ءبارىن ورىنداپ قويعانبىز» دەيدى. بەس ەشكىسى بار باي بۇرىلىپ قاراسا وزەن جاعاسىندا پىلدەي ماشينا تۇر.
زەينەتكە شىققاندا بال اراسىن وسىرۋمەن شۇعىلدانۋدى باستاعان ارال اۋدانى, قۇمبازار اۋىلىنىڭ تۇرعىنى سەرىك ياكۋداەۆتىڭ بۇگىنگى تىرلىگى بالىق اۋلاپ وتىرعان ادامعا كوبىرەك ۇقسايدى. بالالارىنىڭ ءبارى اياقتانعان. ءۇي-جايلارى, وزدەرىنە جەتەتىن داۋلەتى بار.
بال اراسىن ءوسىرىپ جاتقان س.ياكۋداەۆ وسى كاسىبى جاندانىپ جاتسا, جەتىم-جەسىرلەرگە, مۇگەدەك جاندارعا, مەشىتكە, جاعدايى تومەن وتباسىلارعا كومەك كورسەتپەكشى. ويتكەنى قۇرانداعى ارا سۇرەسىندە: «ارادان تۇسكەن پايدانىڭ ون پايىزىن مۇقتاج جاندارعا, ون پايىزىن تۋىسقاندارعا كومەك رەتىندە بەر», دەلىنگەن. «بازارعا بارا قالساق, ءتۇرلى قوسپامەن جاسالىپ كەلگەن سىرتتىڭ ونىمدەرىن الامىز. وسىنى دا ەسكەرىپ, اۋدان حالقىن تابيعي تازا ونىممەن قامتاماسىز ەتەمىن», دەيدى ول.
قىزمەتىنىڭ دەنى ۆەتەريناريا سالاسىندا وتكەن سەرىك ياكۋداەۆ زەينەتكە شىققان سوڭ قاراپ وتىرا الماعان. وزىنە لايىق كاسىپپەن اينالىسقىسى كەلگەندە بال اراسىن ءوسىرۋدى قولاي كورگەن. سودان سوڭ قىزىلوردا قالاسىنا بارىپ, ومارتاشىلارمەن اڭگىمەلەسكەن, ەكى اپتالىق كۋرسىن وقىعان. بيزنەس-جوسپار جاساپ «اتامەكەن» كاسىپكەرلەر پالاتاسىنا بارعان. جۇمىس ىستەيمىن دەپ جوسپارىن بەلگىلەپ كەلگەن ادامعا قارجى بار. جوباسى ۇزدىك دەپ تانىلعان ياكۋداەۆقا «دامۋ» قورى قايتارىمسىز گرانت ۇسىنادى. 1 ملن 275 مىڭ تەڭگە گرانتتى ۇتىپ العان كاسىپكەر 20 ۇيا «كارپات» تۇقىمدى ارا مەن بال الۋعا قاجەتتى قۇرال-جابدىقتار ساتىپ الادى. ارا جەرسىنۋ ءۇشىن العاشقىدا قولدان ءشاربات دايىنداعان كاسىپكەر كەيىن ومارتاسىن داريا جاعاسىنا كوشىرەدى. قالىڭ جىنىستا اراعا شىرىن كوپ. وسىلايشا جۇمىس باستالىپ كەتكەن.
ءبىر ۇيادان ورتاشا ەسەپپەن التى-جەتى كەلى بال الۋعا بولادى ەكەن ال جيىرما ۇياشىقتان ءبىر ماۋسىمدا ەكى ءجۇز كەلىگە دەيىن بال جينالادى.
كاسىپكەردىڭ ءاۋ باستاعى نيەتىن ايتتىق. وزىنەن ارتىلعانىن قايىرىمدىلىق ماقساتقا جۇمساماق. بۇگىندە ادامداردان مەيىر قاشىپ تۇرعان زاماندا اتىمتاي جومارتتار ەلگە كەرەك.
كوپ جاستار جۇمىس جوق دەگەندى وزىنە جاقسى سىلتاۋ ەتىپ, ءشوپ باسىن سىندىرمايدى. تىرلىك جاساۋعا ق ۇلىقسىز بولىپ بارادى. زەينەتكە شىقسا دا وزىنە مولشىلىق اكەلەر جاڭا تابىس كوزىن تاۋىپ العان قاريا وسىنداي جىگەرسىز جىگىتتەرگە ۇلگى بولسا, قانەكي.
باقتيار تايجان, «ەگەمەن قازاقستان»
قىزىلوردا وبلىسى