بۇگىنگى تاڭدا ادامزاتتىڭ ويلاۋ جۇيەسى وزگە ارنادا قالىپتاسىپ, وعان عىلىم الەمىندەگى وزگەرىستەر ىقپال ەتۋدە. اسىرەسە جاس ۇرپاق ءۇشىن اقپاراتتىق تەحنولوگيالاردى يگەرۋ, وندىرىستىك-تەحنولوگيالىق ورتاعا بەيىمدەلۋ ماڭىزدى بولىپ وتىر.
سوندىقتان دا ەلباسى قازاقستان حالقىنا ارناعان بيىلعى جولداۋىندا ەلىمىزدىڭ بارلىق وڭىرلەرىندەگى وقۋشىلار سارايلارىنىڭ بازاسىندا كومپيۋتەرلەردى, لابوراتوريالاردى جانە 3D-پرينتەرلەردى قوسا العاندا, بارلىق قاجەتتى ينفراقۇرىلىمدارى بار بالالار تەحنوپاركتەرى مەن بيزنەس-ينكۋباتورلارىنىڭ جەلىسىن قۇرۋدى تاپسىرعان بولاتىن. ەندى ەلباسى تاپسىرعان مىندەتتى جۇزەگە اسىرۋ ماقساتىندا وڭىرلەردە ءتيىستى جوسپارلار مەن جوبالار قابىلدانىپ, ونىڭ العىشارتى ءتۇزىلۋ ۇستىندە.
الداعى وقۋ جىلىندا اۋليەاتالىق جۇرتشىلىقتى جاعىمدى جاڭالىق كۇتىپ تۇر. جامبىل وبلىستىق ءبىلىم باسقارماسىنىڭ مەكتەپ وليمپيادالارىن جانە مەكتەپتەن تىس ءىس-شارالاردى وتكىزەتىن وبلىستىق ورتالىعىندا ءىت-سىنىبى اشىلادى. اتالعان سىنىپتى جابدىقتاۋعا قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورى قولداۋ كورسەتىپ وتىر. وسى ورايدا, جامبىل وبلىسىندا قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورى كۇندەرى ءوتتى. بۇل رەتتە قور وكىلدەرى وبلىس اكىمىنىڭ ورىنباسارى ەرقانات مانجۋوۆ, م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ رەكتورى ماحمەتعالي سارىبەكوۆ جانە جاستارمەن تىكەلەي جۇمىس جۇرگىزەتىن باسقارما باسشىلارىمەن كەزدەستى. كەزدەسۋ بارىسىندا تۇڭعىش پرەزيدەنت – ەلباسى قورىنىڭ اتقارۋشى ديرەكتورىنىڭ ورىنباسارى سۇلتان ايتجانوۆ مەكتەپ وليمپيادالارىن جانە مەكتەپتەن تىس ءىس-شارالاردى وتكىزەتىن وبلىستىق ورتالىقتىڭ ديرەكتورى ءشاريا قاشقىنوۆاعا 3 ميلليون تەڭگەنىڭ سەرتيفيكاتىن تاپسىردى.
جامبىل وڭىرىندە اشىلۋى جوسپارلانىپ وتىرعان ءىت-سىنىبىنا تۇڭعىش پرەزيدەنت – ەلباسى قورى قولداۋ كورسەتىپ وتىر. مۇندا ءبىر جىلدا 200 جەتكىنشەكتى وقىتۋ كوزدەلىپ, جۇمىس ساباقتان تىس قوسىمشا ءبىلىم بەرۋ نەگىزىندە جۇرگىزىلمەك. ورتالىق ديرەكتورىنىڭ ايتۋىنشا, بارلىعى 20 توپ اشىلىپ, ءار توپقا 10 وقۋشىدان بولىنەتىن بولادى.
سونىمەن قاتار تۇڭعىش پرەزيدەنت – ەلباسى قورىنىڭ وكىلدەرى م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ بازاسىندا ستۋدەنتتەرمەن كەزدەسىپ, جاستار ساياساتىن دامىتۋ ماسەلەسى مەن مادەنيەت, عىلىم جانە الەۋمەتتىك سالالارداعى بىرلەسكەن جوبالار جايىن تالقىلادى. ءوز سوزىندە ەلباسى قورىنىڭ اتقارۋشى ديرەكتورىنىڭ ورىنباسارى سۇلتان ايتجانوۆ جاستاردى قولداۋعا, قازاقستاندىق كرەاتيۆتى جانە باسەكەگە قابىلەتتى عىلىمي قاۋىمداستىقتى قالىپتاستىرۋعا باعىتتالعان كوپتەگەن جوبالار بار ەكەنىن, وعان كەز كەلگەن ستۋدەنتتىڭ قاتىسا الاتىنىن ايتىپ ءوتتى.
– بۇل جوبالار ەلباسى جولداۋىندا قويىلعان مىندەتتەرگە سايكەس ازىرلەنىپ, ىسكە اسىرىلۋدا. جوعارى تەحنولوگيالار كۇن ساناپ جاڭارىپ وتىرعان كەزەڭدە دامىعان ەلدەر ءبىر-بىرىنەن قارا ءۇزىپ قالماۋ ءۇشىن جاڭا يدەيالاردى جۇزەگە اسىرۋعا تالپىنىپ جاتىر. سوندىقتان قور جاستار جوبالارىن الەمدىك دەڭگەيگە شىعارۋدى كوزدەيدى. قازىرگى تاڭدا ەكونوميكانى دامىتۋعا باسىمدىق بەرىلگەن كوپتەگەن ستارتاپ جوبالار قولعا الىنۋدا. قوردىڭ جۇمىسى ارقىلى ەلىمىزدەگى مىڭعا جۋىق جاس عالىمداردىڭ ۇزدىك جوبالارى ىرىكتەلدى. ەندى جاز ايلارىندا سينگاپۋردا وتەتىن الەمدىك بايقاۋدا وزىق جوبالاردىڭ كوشىن باستاساق دەگەن ويىمىز بار, – دەيدى ول.
بۇگىندە ەلىمىزدىڭ ءاربىر وڭىرىندەگى جاستارمەن بەرىك بايلانىستا جۇمىس اتقارىپ كەلە جاتقان قور وتكەن جىلدان بەرى جۇمىس باعىتىن ءبىرشاما وزگەرتىپ, «تسيفرلى قازاقستان» باعدارلاماسىنا سايكەس Smart Zholy جانە Method PRO جوبالارىن ازىرلەگەن ەدى. ناتيجەسىندە كومپيۋتەر باعدارلامالارىن جاساۋمەن اينالىسىپ جۇرگەن دارىندى جاستار مەن ولاردىڭ ونىمدەرىن تۇتىناتىن ەلىمىزدىڭ جانە شەتەلدىڭ ءىرى كومپانيالارىمەن ءوزارا بايلانىس ورناتۋعا مۇمكىندىك تۋىپ وتىر.
كەزدەسۋ بارىسىندا بيىل ونىنشى رەت وتكىزىلىپ وتىرعان «بولاشاق عالىمدار» اتتى ستۋدەنتتەردىڭ ۇزدىك عىلىمي جۇمىستارى انىقتالدى. اتالعان باسەكەدە توپ جارعان تاراز قالاسىنىڭ ەكولوگيالىق پروبلەمالارىن شەشۋ جولدارىن زەرتتەگەن يسلام ديامۋرشاەۆ, نيكيتا سامويلەنكو, باعجان تۇمان مەن ەمدىك قاسيەتتەرى بار تريكوتاج قۇرىلىمىنا زەرتتەۋ جاساعان جانەركە مايروۆا, قىمبات انياربەكوۆا سياقتى تارمۋ ستۋدەنتتەرى ماراپاتتالدى. ايتا كەتەيىك, وسى ۋاقىتقا دەيىن تارمۋ-دىڭ 30-عا جۋىق ستۋدەنتى ەلباسى قورىنىڭ ءار جىلدارداعى ستيپەنديانتى اتانعان ەكەن.
جامبىل وڭىرىندە وتكەن قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورى كۇندەرىنىڭ اياسىندا سمارتفوندار مەن پلانشەتتەرگە ارنالعان لاتىن قارپى بار «Qazaq Latyn Keyboard» كلاۆياتۋرا جوباسىنىڭ تۇساۋى كەسىلدى. سونىمەن قاتار ەلباسى قورىنىڭ قولداۋىمەن ازىرلەنگەن قازاق ءتىلىن وقىتاتىن «Soyle.kz» ونلاين-كۋرسى مەن بىرقاتار ءموبيلدى قوسىمشالار تۋرالى ماعلۇمات بەرىلىپ, جاستارعا شەبەرلىك ساباقتارى ۇيىمداستىرىلدى.
حاميت ەسامان, «ەگەمەن قازاقستان»
جامبىل وبلىسى