وسلو قالاسىندا (نورۆەگيا) ەقىۇ-نىڭ از ۇلتتار ىستەرى جونىندەگى جوعارعى كوميسسار ءوفيسىنىڭ ۇيىمداستىرۋىمەن ء«تىل ساياساتى جانە جانجالداردى بولدىرماۋ: از ۇلتتاردىڭ تىلدىك قۇقىقتارىنا قاتىستى وسلو ۇسىنىستارىن قايتا قاراۋ» تاقىرىبىندا حالىقارالىق كونفەرەنتسيا ءوتتى.
فورۋم جۇمىسى بارىسىندا قازاقستان تاراپىنان پرەزيدەنت اكىمشىلىگىنىڭ قازاقستان حالقى اسسامبلەياسى حاتشىلىعىنىڭ حالىقارالىق ىنتىماقتاستىق بويىنشا ينسپەكتورى عالىمجان ماحان قاتىستى.
ەقىۇ-نىڭ از ۇلتتار ىستەرى جونىندەگى جوعارعى كوميسسارى لامبەرتو زانەر, نورۆەگيا سىرتقى ىستەر مينيسترلىگىنىڭ مەملەكەتتىك حاتشىسى ايدۋن حالۆورسەن, بۇۇ-نىڭ از ۇلتتار ىستەرى جونىندەگى ارنايى بايانداماشىسى, پروفەسسور فەرنارد دە ۆارەنە فورۋم قاتىسۋشىلارىنا كىرىسپە ءسوز سويلەدى.
بەلگىلى ساياساتكەر, نورۆەگيانىڭ بۇرىنعى سىرتقى ىستەر ءمينيسترى جانە ەقىۇ-نىڭ از ۇلتتار جونىندەگى جوعارعى كوميسسارى كنۋت ۆوللەبەك وسلو ۇسىنىستارىن ىسكە اسىرۋ جونىندەگى نەگىزگى بايانداماسىندا «ەقىۇ ايماعىندا از ۇلتتاردىڭ سانى تۇراقتى تۇردە ءوسىپ كەلەدى» دەپ اتاپ ءوتتى.
فورۋم بارىسىندا ع.ماحان قاتىسۋشىلارعا قازاقستان حالقى اسسامبلەياسىنىڭ قازىرگى جۇمىسىن ايتا وتىرىپ, ەلىمىزدەگى قوعامدىق كەلىسىم مەن ۇلتتىق بىرلىك مودەلى, حالىقارالىق ىنتىماقتاستىقتى, ونىڭ ىشىندە ۇزاق تاريحى بار ەقىۇ-نىڭ اۇجك ءوفيسى جونىندە ايتتى.
ءسوز سويلەۋ بارىسىندا 2017-2018 وقۋ جىلدارىندا رەسپۋبليكا بويىنشا وزبەك, ۇيعىر, تاجىك تىلدەرىندە ءبىلىم بەرەتىن 27 مەكتەپتە 16 442 وقۋشى وقيتىنى, جانە 140 ارالاس مەكتەپتە 100 مىڭ وقۋشى قازاقستاندا مەكەن ەتەتىن ەتنوستار تىلدەرىندە ءبىلىم الاتىنى جونىندە ايتىلدى.
فورۋم اياسىندا ك.ۆوللەبەك ءبىزدىڭ ەلىمىزگە كەلگەن تۇراقتى ساپارلارىن ۇلكەن ريزاشىلىقپەن ەسكە الدى. نورۆەگيالىق ساياساتكەر «ۇيىم تاريحىندا قازاقستان ەقىۇ-دا ەڭ تابىستى توراعالىق ەتكەندەردىڭ ءبىرى بولدى» دەپ اتاپ ءوتتى.
ءوز كەزەگىندە ەقىۇ-نىڭ جوعارعى كوميسسارى كەلەسى جىلى ءبىزدىڭ ەلگە كەلۋدى جوسپارلاپ وتىرعانىن ايتتى.
«ەگەمەن-اقپارات»