مەملەكەتىمىزدىڭ باستى نىشاندارى تۋ, ەلتاڭبا, انۇرانعا بيىل 26 جىل تولدى. بۇگىن استانا قالاسىنىڭ اكىمدىگى قازاقستان رەسپۋبليكاسىنىڭ مەملەكەتتىك رامىزدەرى كۇنىنە وراي سالتاناتتى ءىس-شارا وتكىزدى, دەپ حابارلايدى استانا قالاسى اكىمدىگىنىڭ رەسمي سايتى.
ءانۇراندى وقۋشىلار, ستۋدەنتتەر, مەملەكەتتىك قىزمەتشىلەر بىرلەسىپ ورىندادى. اتالمىش پاتريوتتىق ءىس-شارانى استانا قالاسىنىڭ تىلدەردى دامىتۋ جانە ارحيۆ ءىسى باسقارماسى ۇيىمداستىردى. شاراعا قالالىق باسقارما جانە اۋدان اكىمدىكتەرىنىڭ وكىلدەرى قاتىستى.
«مەملەكەتتىك رامىزدەر – ەلىمىزدىڭ ەگەمەندىگى مەن تاۋەلسىزدىگىن پاش ەتۋشى ءارى تاريحىمىزدىڭ وتكەنى, بۇگىنى جانە بولاشاعى اراسىنداعى ساباقتاستىقتىڭ جارقىن بەينەسى. ەلىمىزدىڭ باس نىشانى بولىپ تابىلاتىن رامىزدەرگە قۇرمەت كورسەتۋ جانە ولار تۋرالى زاڭنامالىق ەرەجەلەردىڭ دۇرىس ورىندالۋىن قامتاماسىز ەتۋ كەز كەلگەن ازاماتتىڭ پارىزى, ال مەملەكەتتىك مەكەمەلەر ءۇشىن نەگىزگى مىندەت», – دەدى تىلدەردى دامىتۋ جانە ارحيۆ ءىسى باسقارماسى باسشىسىنىڭ ورىنباسارى قايرات قامباروۆ.
ءىس-شارانىڭ باستى قوناعى بولىپ قازاقستان رەسپۋبليكاسىنىڭ مەملەكەتتىك ەلتاڭبانىڭ اۆتورى جانداربەك مالىبەكوۆ قاتىستى.
«بۇل ەرەكشە كۇن. 1992 جىلى ءبىز قازاقستان رەسپۋبليكاسىنىڭ رامىزدەرىن قابىلدادىق. سول كۇننەن باستاپ, مىنە 26 جىل ءوتتى. سودان بەرى ءبىزدىڭ مەملەكەتتىك رامىزدەرىمىز الەم بويىنشا تانىلىپ, قۇرمەتتەلە باستادى», – دەدى جانداربەك مالىبەكوۆ.
ەسكە سالا كەتەيىك, 1992 جىلدىڭ 4 ماۋسىمىندا ەلباسى نۇرسۇلتان نازارباەۆ مەملەكەتتىك رامىزدەر تۋرالى زاڭعا قول قويعان بولاتىن.