اتىراۋدىڭ مادەني ءومىرى استانانىڭ 20 جىلدىعىنا ارنالعان شارالارمەن تولىعۋدا. جەرگىلىكتى ونەر ۇجىمدارىنىڭ كونتسەرتتىك باعدارلامالارىنان بولەك اتىراۋ وبلىسىنداعى «استانا قالاسىنىڭ مادەنيەت كۇندەرى» اياسىندا بىرقاتار شارالار ۇيىمداستىرىلدى.
مۇنايلى ءوڭىر تۇرعىندارى ەلورداداعى مەملەكەتتىك اكادەميالىق فيلارمونيانىڭ كلاسسيكالىق جانە ەسترادالىق ۆوكال ءبولىمى, «سارىارقا» حالىق مۋزىكا ءانسامبلى, «شالقىما» حالىق ءبيى ءانسامبلى, ەسترادالىق بي ءانسامبلىنىڭ ونەرلەرىنە ءتانتى بولدى. وبلىستىق حالىق شىعارماشىلىعى ورتالىعىندا وتكەن «استانادان اق تىلەكپەن», «ەلوردادان ەلگە سالەم» اتتى كونتسەرتتەر دە اتىراۋلىقتارعا ايرىقشا كوڭىل كۇي سىيلادى.
جايىق جاعاسىن اسەم انمەن تەربەگەن ونەرپازدارمەن قاتار قولونەر شەبەرلەرى دە بۇيىمدارىن الا كەلدى. ش.ساريەۆ اتىنداعى كوركەمسۋرەت جانە ونەر مۋزەيىندەگى كورمەگە وتاندىق سۋرەتشىلەردىڭ 100-دەن استام تۋىندىسى قويىلدى.
استانا قالاسى مەملەكەتتىك اكادەميالىق فيلارمونياسىنىڭ ءبولىم جەتەكشىسى ارايلىم راحىمقىزى: «اتىراۋلىق كورەرمەننىڭ ونەرگە دەگەن ىقىلاسى شابىت سىيلادى. قۇرمەت-قوشەمەتكە ريزا بولدىق. استانا مەرەيتويىنىڭ قارساڭىندا بارلىق وڭىرلەرگە گاسترولدىك ساپارمەن شىعۋدى جوسپارلادىق, ەندىگى باعىتىمىز ماڭعىستاۋ وبلىسى», – دەيدى.
استاناداعى جاستار تەاترى دا مۇنايلى ايماققا كەلىپ, رەپەرتۋارلارىنداعى ميۋزيكل, ساحنالىق پوۆەست, حالىق ەرتەگىسى سەكىلدى قويىلىمداردى اتىراۋلىقتاردىڭ نازارىنا ۇسىندى. ەلوردا تورىندە شىعارماشىلىقتارىن شىڭداپ جۇرگەن ونەر ۇجىمدارىنىڭ قاي-قايسىسىنىڭ دا دەڭگەيى جوعارى ەكەنىن باعامداعان تالعامپاز كورەرمەن وڭ باعا بەرىپ, قوشەمەت كورسەتتى.
باقىتگۇل باباش, «ەگەمەن قازاقستان»
اتىراۋ