سەنات توراعاسى: قازاق جاستارى زەرەك جانە ەرەكشە دارىندى

– جاڭا يدەيالاردى جاس ۇرپاق اكەلەتىنىن ءاردايىم ەستەن شىعارماۋىمىز قاجەت. جاستاردىڭ جالىنى مەن دارىنىندا عالامات كۇش-قۋات بار ەكەنىن جاقسى بىلەمىز. سىزدەردىڭ بويىڭىزدا بار ءبىلىم, ىسكەرلىك پەن تاپقىرلىق, باستاماشىلدىق پەن جاڭاشىلدىق ءبىزدىڭ ەلىمىزدىڭ باياندى بولاشاعى ءۇشىن وتە قاجەت ەكەنىن ەستەن شىعارماڭىزدار.

الاش ارىسى ءاليحان بوكەيحانوۆ ايتقانداي: «بوتەن كىسى قازاققا ەشقايدان ەشتەڭە جاقسىلىق اكەپ بەرمەيدى». وسى ورايدا, مەنىڭ ايتارىم: جارقىن بولاشاق – سىزدەردىڭ قولدارىڭىزدا.

قازاق جاستارى بىلىمگە وتە زەرەك جانە تىم ەرەكشە دارىندى بولىپ كەلەدى. جاستارعا ايتارىم: باتىلدىقپەن العا ۇمتىلىڭىزدار, جارقىن بولاشاقتىڭ كىلتى ءوز قولدارىڭىزدا, ەڭسەلەرىڭىزدى تىك ۇستاپ, ءاردايىم دەم بەرەتىن اسقاق رۋحتان اجىراماۋ كەرەك.

ەڭ باستىسى – ەڭبەك. قاي كەزدە دە, الدىمەن كاسىبي بىلىكتىلىك پەن قاجىرلى ەڭبەك قاجەت بولادى. كەلەشەكتىڭ ەكونوميكاسى مەن ساياساتىندا جالقاۋ, ەنجار, ءبىلىمى تاياز ادامدارعا ورىن بولمايدى. بۇل دا ۋاقىتتىڭ تالابى.

ءوز حالقىنىڭ تاريحىن, سالت-ءداستۇرى مەن مادەنيەتىن قۇرمەتتەيتىن رۋحتا تاربيەلەنگەن, پروگرەسس پەن يننوۆاتسياعا بەيىم جاڭا بۋىن – قازاق جاستارى تۇبەگەيلى رۋحاني جاڭعىرۋدى جۇزەگە اسىراتىن اسا قۋاتتى كۇش جانە بۇل ىستە شەشۋشى ءرول اتقارۋى ءتيىس.