قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ ونەر جانە مادەنيەت فاكۋلتەتىنىڭ 2-كۋرس ستۋدەنتتەرى نازەركە جۇمابەك پەن جانسايا سارسەنباي «جەتى ونەر» حالىقارالىق بالالار مەن جاستار شىعارماشىلىق فەستيۆالىندە باس جۇلدەگە يە بولدى, دەپ حابارلايدى وقۋ ورنىنىڭ ءباسپاسوز ورتالىعى.
«جەتى ونەر» شىعارماشىلىق ورتالىعىنىڭ ۇيىمداستىرۋىمەن وسىمەن ەكىنشى جىل قاتارىنان وتكىزىلىپ وتىرعان ونەر سايىسىنا قازاقستان, رەسەي جانە قىرعىزستاننان كەلگەن 30-دان استام جاس ونەرپاز قاتىستى.
ەكى كۇنگە سوزىلعان ءىس-شارانىڭ ماقساتى – پەداگوگ-ۇستازداردىڭ, كونكۋرسانتتاردىڭ بايقاۋ بارىسىندا ءوزارا دوستاسۋىنا جول اشۋ, ءبىلىم بەرۋ سالاسىنىڭ پەداگوگيكالىق قىزمەتكەرلەرىنىڭ شىعارماشىلىق قىزمەتىن دامىتۋ, بالالار مەن جاستارعا كوركەم ەستەتيكالىق تاربيە بەرۋ جانە دارىندى جاستارعا شىعارماشىلىق تۇرعىدان قولداۋ كورسەتۋ. سونىمەن قاتار, ۇلتتىق ورتانى قالىپتاستىرۋعا جول كورسەتىپ سۋىرىپ سالمالىق, امبەباپتىق قابىلەتتەرىنە باسا دەن قويۋ (اقىندىق, شەشەندىك شەبەرلىگى, ءتۇرلى ۇلتتىق اسپاپتا ويناۋ, ت.ب.) تابيعي تانىمدىق قابىلەتتەرىن ايقىنداۋ.
ونەر بايقاۋى «اسپاپتا ورىنداۋشىلىق ونەرى», ء«داستۇرلى ءان ونەرى», ء«ان سالۋ ونەرى», «حورەوگرافيالىق ونەر», «مادەني-تىنىعۋ جۇمىسى» جانە «بەينەلەۋ ونەرى جانە ساندىك ونەرى» نوميناتسيالارى بويىنشا جۇرگىزىلدى.
بايقاۋعا ەلىمىزگە بەلگىلى مادەنيەت قايراتكەرلەرى مەن ونەر مايتالماندارى قازىلىق جاسادى.
– ۇلى اباي ءوز قاراسوزىندە: «تەگىندە ادام بالاسى, ادام بالاسىنان اقىل, عىلىم, ار, مىنەز دەگەن نارسەلەرمەن وزباق. ودان باسقا نارسەمەن وزدىم عوي دەمەكتىڭ ءبارى دە اقىماقتىق» دەگەن ەكەن. عاسىر عۇلاماسىنىڭ قانشاما جىلدار بۇرىن ايتىپ كەتكەن دانالىعى, كۇنى بۇگىنگە دەيىن ءوز ومىرشەڭدىگىن جويعان ەمەس. راسىمەن دە, بۇگىنگى عاسىر – جاڭالىعى جەلمەن جارىسقان, وي ءورىسى عارىشپەن تالاسقان زاڭعار جاستاردىڭ زامانى. ۇلتتىق ءتول ونەرىمىزدى دارىپتەۋ جانە مارتەبەسىن كوتەرۋ ماقساتىندا وتكىزىلگەن «جەتى ونەر» فەستيۆالى – ءاربىر جاستىڭ كەلەشەگىنە جول اشادى. وسى تۇستا ءجۇسىپ بالاساعۇننىڭ: ء«ار بالا جۇلدىز, جارقىراۋىنا جاردەم ەت» دەگەن ءسوزى ەسكە تۇسەدى. زامان تالابىنا ساي, الەم كەڭىستىگىندە ءبىلىم دوداسىنان تايسالمايتىن جاس جەتكىنشەكتەردى تاربيەلەۋ باستى پارىز, – دەيدى شارا ۇيىمداستىرۋشىلارى.
قىزدار ۋنيۆەرسيتەتىنىڭ اتىنان قاتىسقان جانسايا سارسەنباي مەن نازەركە جۇمابەك بايقاۋدا «اسپاپتا ورىنداۋشىلىق ونەرى» اتالىمى بويىنشا ونەر كورسەتىپ, سايىستىڭ ءبىرىنشى اينالىمىندا كۇيشى-كومپوزيتور ەرمۇرات ۇسەنوۆتىڭ «كەربەز سۇلۋ» كۇيىن, ال ەكىنشى كەزەڭدە كۇيشى مالعاجدار اۋباكىروۆتىڭ شىعارماسىن ورىندادى. بايقاۋ قورىتىندىسى بويىنشا وقۋ ورنىنىڭ ستۋدەنتتەرى قازىلار القاسى تاراپىنان جوعارى ۇپايعا قول جەتكىزىپ, باس جۇلدەگە يە بولدى. ايتا كەتەيىك, ستۋدەنتتەردى فەستيۆالعا ونەر جانە مادەنيەت فاكۋلتەتىنىڭ اعا وقىتۋشىلارى ديدار احمەتجانوۆا مەن ايسۇلۋ مۇقانوۆا دايىندادى.