الداعى دەمالىس كۇندەرى, ياعني 19-20 مامىردا قازاقستانداعى بالالار ءۇيىنىڭ تاربيەلەنۋشىلەرى اراسىنداعى العاشقى ۆەلوجارىس وتكىزىلەدى.
قازاقستاننىڭ 8 ءوڭىرىنىڭ بالالار ءۇيى تاربيەلەنۋشىلەرى الماتىدا «چەمپيوننىڭ جولى» اتاۋىمەن ەلىمىزدە العاش رەت وتكىزىلەتىن ۆەلوجارىستا باس قوسادى.
بۇل جارىستا 14-16 جاس ارالىعىنداعى بالالار ءۇيى مەن مەكتەپ-ينتەرناتتاردا تۇراتىن, جەتىم نەمەسە اتا-انا قامقورلىعىنان ايىرىلعان بالالار كۇش-جىگەرىن سىناۋعا مۇمكىندىك الادى.
بيىل جەڭىمپاز كوماندا تۋر دە فرانس سىندى الەمدەگى ەڭ بەدەلدى ءۇش ۆەلودودانىڭ قاتارىنا كىرەتىن «يسپانيا ۆۋەلتاسى» گراند-تۋرىنىڭ بىرنەشە كەزەڭىنە قاتىسۋ مۇمكىندىگىنە يە بولادى.
جەڭىمپاز كومانداعا ەستەن كەتپەستەي قۋانىش سىيلايتىن ۆەلوجارىستى ۇيىمداستىرۋعا ۇيىتقى بولىپ وتىرعان «BAURZHAN Foundation» جەكە قورى مەن «وليمپ» سپورتتىق-رەكرەاتسيالىق ورتالىعى» چەمپيناتقا قاتىسۋشىلاردىڭ تراسسادا ءوز كۇشتەرىن كورسەتىپ جانە ونى دالەلدەۋگە ۇلكەن مۇمكىندىك بەرمەك. تۇلعالىق بولمىس, مورالدىق جانە كوماندالىق رۋحتىڭ نىعايۋىنا, بالالاردى سالاۋاتتى ءومىر سالتىنا داعدىلاندىرۋعا باعىتتالعان باستاما ءارى بالالاردىڭ وزىنە, بولاشاعىنا دەگەن سەنىمىنىڭ نىعايۋىنا جول اشادى. ال الەمدەگى ۇزدىك «يسپانيا ۆۋەلتاسى» گراند-تۋرىن ءوز كوزىمەن كورىپ, كۋميرلەرىمەن كەزدەسۋ-بالالار ءۇشىن ومىرلەرىندەگى ەستەن كەتپەس ساتكە اينالارى ءسوزسىز.
ايناش ەسالي,
«ەگەمەن قازاقستان».
الماتى