استانا ەكونوميكالىق فورۋمىنىڭ اياسىندا «دامۋ» كاسىپكەرلىكتى دامىتۋ قورى مەن ەۋرازيالىق دامۋ بانكى (ەدب) ءوزارا تۇسىنىستىك پەن ىنتىماقتاستىق جونىندەگى مەموراندۋمعا قول قويدى.
بۇل قۇجات قازاقستاندا جەكە كاسىپكەرلىكتى دامىتۋعا قولداۋ كورسەتۋ ماقساتىندا سەرىكتەستىك قارىم-قاتىناستار ورناتۋ مەن ۇزاقمەرزىمدى, ءوزارا ءتيىمدى ىنتىماقتاستىقتى دامىتۋدى كوزدەيدى.
كەلىسىم اياسىندا «دامۋ» قورىنىڭ قولداۋىمەن شوب سۋبەكتىلەرىن جانە باسقا دا جەكە كاسىپكەرلىك جوبالارىن قولداۋعا باعىتتالعان ينۆەستيتسيالىق جوبالارعا, ونىڭ ىشىندە ەدب-عا مۇشە مەملەكەتتەردە قۇرىلعان كومپانيالاردىڭ قاتىسۋىمەن جۇزەگە اسىرىلاتىن جوبالارعا ەدب قاتىسۋى كوزدەلگەن.
سونداي-اق, شاعىن جانە ورتا بيزنەس جوبالارىن دامۋ قورىمەن بىرلەسىپ ىسكە اسىرۋ ماقساتىندا قر ۇلتتىق بانكىمەن ەدب-نىڭ تەڭگەلىك وتىمدىلىگىن قامتاماسىز ەتۋ ماسەلەلەرى قوسا تالقىلانادى.
وعان قوسا ەدب-عا مۇشە مەملەكەتتەردىڭ ەكونوميكاسىنىڭ جەكە سەكتورىن دامىتۋعا ىقپال ەتەتىن الەۋەتتى ينۆەستيتسيالىق مۇمكىندىكتەرىن, «دامۋ» قورى مەن ەدب-نىڭ ستراتەگيالىق ماقساتتارىن زەرتتەۋ قوسا قاراستىرىلادى.
«ەدب جەكە كاسىپكەرلىكتى دامىتۋعا جانە شوب سالاسىندا ينۆەستيتسيالىق جوبالاردى ىسكە اسىرۋعا قارجىلىق قولداۋ كورسەتۋ مۇمكىندىكتەرىن قاراستىرۋعا دايىن. شاعىن جانە ورتا بيزنەستى قولداۋ – بۇل مەملەكەتتىك ەكونوميكانىڭ تۇراقتى دامۋىنا ىقپال ەتەتىن ەڭ ءتيىمدى قۇرالداردىڭ ءبىرى دەپ ەسەپتەيمىز», – دەدى ەدب باسقارما توراعاسى ا.بەليانينوۆ.
«بۇل مەموراندۋمعا قول قويۋ قازاقستانداعى جەكە كاسىپكەرلىكتى قولداۋ مەن دامىتۋ ماقساتىنداعى جۇمىستارىمىزعا وڭ اسەرىن تيگىزەدى. جاقىن ۋاقىتتا ءبىز ءوزارا ءتيىمدى ناقتى جوبالار مەن باعدارلامالاردى جۇزەگە اسىرۋعا كىرىسەمىز», – دەدى «دامۋ» قورىنىڭ باسقارما توراعاسى ا.سارقۇلوۆ.
ايناش ەسالي,
«ەگەمەن قازاقستان».
الماتى